Суд15
1Икмыняр жап гыч, шыдаҥым тӱредме жапыште, Самсон казапачам налын да шке ватыжым ужаш толын. Тудо каласен: «Ватем деке, тудын пӧлемышкыже, пурынем». Но ватыжын ачаже тудым пуртен огыл.2Тудо Самсонлан ойлен: «Тудо тылат ужмышудымо лийын манын шоненам, сандене ӱдыремым сӱан йолташетлан пуэн колтенам. Теве шӱжарже эшеат моторрак, олмешыже тудым нал».3Самсон каласен: «Ӱчым шуктымемлан ынде филистим-влак шкеак титакан улыт!»4Тудо каен, кумшӱдӧ рывыжым кучен, нуным кокыт дене почышт гыч кылден да кажне мужырын почышкыжо факелым кылден.5Вара факел-влакым ылыжтен да рывыж-шамычым филистим пасулаш колтен – шурно копна-влакым, тӱредшаш киндым, виноград аҥам, олив пушеҥгылам йӱлалтен.6«Кӧ тидым ыштен?» – йодыныт филистим-влак. Нунылан каласеныт: «Самсон, Фимна гыч улшо еҥын веҥыже. Самсонын ватыжым тудо веҥыжын йолташыжлан марлан пуэн колтен». Филистим-влак каеныт да тиде ӱдырамашым, тыгак ачажын [суртшым] йӱлалтеныт.7Самсон нунылан каласен: «Ну тыге гын, ынде мый тыланда ӱчым шуктымешке ом чарне!»8Тудо ӱмбакышт кержалтын да нуным пеш чот кырен, чыла луштым пудыртен. Вара тушеч каен да Етам воктенысе курыкпомышеш верланен.9Филистим-влак Иуда мландыш толыныт да станышт дене тушан шогалыныт, Лехи кундем мучко шуйненыт.10Иуда мландыште илыше-влак йодыныт: «Молан те мемнан дене кредалаш толында?» Нунышт вашештеныт: «Ме Самсоным кучен кылдаш да мемнан дене тыге ыштымыжлан ӱчым шукташ толынна».11Иуда мланде гыч кум тӱжем еҥ Етам воктенысе курыкпомыш дек толын. Нуно Самсонлан каласеныт: «Филистим-влакын мемнан дене озаланымышт нерген от пале мо? Мом тый мемнан дене ыштенат?» Тудо вашештен: «Кузе нуно мый денем ыштеныт, мыят нунын дене тыгак ыштенам».12Тудлан каласеныт: «Ме тыйым кучен кылдаш да филистим-влакын кидышкышт пуаш толынна». Самсон нунылан вашештен: «Мыйым ода пушт манын товатлыза».13Нуно тудлан каласеныт: «Ме тыйым кылдена да нунын кидышкышт гына пуэна. Ме тыйым она пушт». Нуно тудым кок у кандыра дене кылденыт да курыкпомыш гыч луктыныт.14Кунам Самсон Лехи дек толын шуын, филистим-влак тудым кычкырлен вашлийыныт. Самсон ӱмбаке Господьын Шӱлышыжӧ волен – пидме кандыраже йӱлен пытыше йытын гай лийын да кидше гыч мучыштен.15Тудын шинчажлан осёлын эше кошкен шудымо оҥылашлужо пернен. Самсон оҥылашлум налын да тудын дене тӱжем еҥым кырен пуштын.16Самсон каласен: «Осёл оҥылашлу дене калык тӱшкам пуштым, кашак ӱмбак кашакым пыштышым! Осёл оҥылашлу дене – тӱжем еҥым!»17Тыге каласымеке, тудо кидше гыч оҥылашлум кудалтен да тиде верым Рамаф-Лехи манын лӱмден.18Самсонын пеш чот йӱмыжӧ шуын. Тудо Господьым сӧрвален кумалын: «Тый шке тарзетын кидше дене тиде кугу сеҥымашым конденат. А мый теве ынде йӱмӧ шумо деч колем да пӱчдымӧ-влакын кидышкышт логалам».19Тунам Юмо Лехиште лакым почын, тушеч вӱд йоген лектын. Самсон йӱын темын, тудын дек вий-куат пӧртылын, да тудо ылыжын. Садланак тиде верым «Сӧрвален кумалше еҥын памашыже» манын лӱмденыт. Тудо Лехиште таче кече мартеат аралалт кодын.20Филистим-влакын озаланыме жапыште Самсон Израильын судьяже коло ий лийын.
Institute for Bible Translation, Finland