Суд14
1Икана Самсон Фимнаш каен да тушто ик филистим ӱдырым ужын. [Тиде ӱдыр тудлан келшен шинчын].2Пӧртылмеке, ачаж ден аважлан каласен: «Фимнаште мый ик филистим ӱдырым ужым, тудым мылам марлан налза».3Ачаж ден аваже тудлан вашештеныт: «Шке тукымышто але шке калык коклаште ӱдыр-влак уке улыт мо? Молан тый пӱчдымӧ филистим-влак деке ӱдырым налаш кает?» Самсон ачажлан каласен: «Мылам тиде ӱдырым нал, тудо мыланем келшен».4Тыште Господьын кидше лиймым ачаж ден аваже пален огытыл. Господь чыла тидым филистим-влаклан ӱчым шукташ манын ыштен. Вет нунышт тиде жапыште Израиль дене озаланеныт.5Самсон шке ача-аваж дене Фимнаш каен. Кунам нуно тусо виноград аҥа деке лишемыныт, Самсон ваштареш самырык лев ырлен лектын.6Самсон ӱмбаке Господьын Шӱлышыжӧ волен, да тудо левым казапача семын яра кид дене кӱрышт кышкен. Ачаж ден аважлан мом ыштымыжым каласен огыл.7Вара тудо саде ӱдыр деке толын да кутырен, тудыжо Самсонлан келшен.8Икмыняр жап гыч Самсон тушко саде ӱдырым марлан налаш пӧртылын. Кайышыжла, колышо левым ончалаш пурен. Левын капыштыже Самсон мӱкш ешым да мӱйым ужын.9Тудо мӱйым урзешыже налын да корнышто кочкын каен. Ача-аваж деке пӧртылмеке, нунымат мӱй дене сийлен. Но мӱйым левын колышо капше гыч налмым каласен огыл.10Тудын ачаже саде ӱдырын пӧртышкыжӧ толын. Самсон тушто качымарий-влакын йӱлашт почеш [шым кечаш] пайремым ыштен.11Самсонын толмыжым ужмеке, тудын сӱан йолташыже лияш кумло еҥым ойыреныт.12Самсон нунылан каласен: «Мый тыланда туштым туштем. Пайрем шуйнымо шым кече жапыште чын вашмутым муыда гын, мый тыланда кумло йытын тувыр ден кумло сай алмаштыш вургемым пуэм.13А вашмутым пуэн огыда керт гын, те мылам кумло йытын тувыр ден кумло пайрем вургемым пуэда». Нунышт тудлан каласеныт: «Тушто туштетым, ме колыштына».14Самсон нунылан туштен: «Кочшо гыч кочкыш, виян гыч шере лектын». Кум кече нуно туштылан вашмутым муын кертын огытыл.15Шымше кечын Самсонын ватыжлан каласеныт: «Шке мариетым кӧндаре, тек тудо мыланна вашмутым каласа, уке гын тыйым да ачатын суртшым йӱлалтена. Мемнам те агаш манын ӱжында мо?»16Самсонын ватыже тудын ончылно тыге шортын ойлен: «Тыйын мыйым ужмет ок шу, тый мыйым от йӧрате! Тый калыкемлан туштым туштенат, а мылам вашмутым от ойло». Тудо ватыжлан каласен: «Мый ачам ден авамланат вашмутым ойлен омыл. Тылат каласем шонет мо?»17Пайрем кайыме шым кече мучко тудо Самсон ончылно шортын. Ватыже тудым чот рӱден, да шымше кечын Самсон содыки тудлан вашмутым каласен. А тудыжо шке калыкшылан ойлен.18Шымше кечын кече шичме деч ончыч олаште илыше-влак Самсонлан тыгай вашмутым пуэныт: «Мо мӱй дечын шерырак? Мо лев дечын виянрак?» Тудо нунылан каласен: «Мыйын тунам дене ода курал ыле гын, туштемлан вашмутым огыда пале ыле».19Самсон ӱмбаке Господьын Шӱлышыжӧ волен. Тудо Аскалоныш каен, тушто кумло еҥым пуштын, вургемыштым кудашын да туштылан вашмутым каласыше-влаклан пуэн. Вара тудо, пеш чот шыдешкыше, ачажын пӧртышкыжӧ каен.20А Самсонын ватыжым тудын эн лишыл сӱан йолташыжлан марлан пуэн колтеныт.
Institute for Bible Translation, Finland