Суд12
1Ефрем эрге-влак погыненыт да Цафон ола велыш вонченыт. Нуно Иеффайлан каласеныт: «Молан тый аммон-влак дене кредалаш кайымет годым мемнам ӱжын отыл? Ме пӧртетым да тыйым шкендымат йӱлалтена».2Иеффай нунылан вашештен: «Мыйын да калыкемын аммон-влак дене пеш кугу келшыдымаш лийын. Мый тендам ӱжынам, но те мыйым нунын деч ышда утаре.3Мый ужым: тендан деч полыш ок лий, сандене, шке илышем чаманыде, аммон-влак ваштареш кайышым. Господь нуным мыйын кидыш пуыш. Молан те кызыт мый денем кредалаш толында?»4Иеффай Галаадыште илыше пӧръеҥ-влакым поген да Ефрем эрге-шамыч дене кредалын. Галаадыште илыше-влак нуным кырен шалатеныт, вет нунышт тыге ойленыт: «Те, Галаадыште илыше-влак, Ефрем ден Манассий тукым гыч куржында».5Галаадыште илыше-влак Иордан гоч Ефрем тукым мландыш вончымо верлам руалтен налыныт. Кунам утлен кодшо Ефрем эрге «эҥер вес могырыш вончаш пуыза» манын ойлен, Галаадыште илыше-влак тудын деч йодыныт: «Тый Ефрем эрге отыл?» Тудо вашештен: «Уке».6Нуно тудлан ойленыт: «”Шибболет” манын каласе». Тудыжо чын каласен кертын огыл да «сибболет» манын гын, нуно тудым кученыт да Иордан гоч вончымо вер дене пуштыныт. Тиде жапыште нылле кок тӱжем Ефрем эрге колен.7Иеффай Израильын судьяже куд ий лийын. Вара Галаад кундем гыч Иеффай колен, тудым Галаадын ик олаштыже тоеныт.8Иеффай деч вара Израильын судьяже Вифлеем гыч Есевон лийын.9Тудын кумло эргыже улмаш. Кумло ӱдыржым тудо шке суртшо гыч [марлан пуэн] колтен, а эргыж-влаклан кумло ӱдырым вес тукым гыч марлан налын. Есевон Израильын судьяже шым ий лийын.10Вара Есевон колен, тудым Вифлеемеш тоеныт.11Тудын деч вара лу ий Израильын судьяже Завулон тукым гыч Елон лийын.12Вара Елон колен, тудым Завулон мландысе Аиалонеш тоеныт.13Тудын деч вара Израильын судьяже Пирафон гыч Авдон, Гиллел эрге, лийын.14Тудын нылле эргыже да кумло эрге уныкаже лийын, нунышт шымле самырык осёлым кушкыж коштыныт. Авдон Израильын судьяже кандаш ий лийын.15Вара Пирафон гыч Авдон, Гиллел эрге, колен. Тудым Ефрем мландысе Пирафонеш, амалик-влакын курыкешышт, тоеныт.
Institute for Bible Translation, Finland