Суд11
1Галаад кундем гыч Иеффай лӱддымӧ еҥ лийын. Тудын аваже яжар ӱдырамаш улмаш, ачажын лӱмжӧ Галаад лийын.2Галаадын шке ватыжат тудлан эрге-влакым ыштен. Кушкын шумеке, ватыжын эргыже-шамыч Иеффайым поктен колтеныт. Нуно тудлан каласеныт: «Тый вес ӱдырамашын эргыже улат, сандене ачанан пӧртыштыжӧ нимогай югыпогым от нал».3Иеффай шке шольыж-влак деч куржын да Тов мландыште илен. Тудын йыр шотдымо еҥ-шамыч погыненыт да пеленже коштыныт.4Икмыняр жап гыч аммон-влак Израиль ӱмбак сар дене каеныт.5Тунам Галаадысе кугурак-шамыч Тов мланде гыч Иеффайым кондаш каеныт.6Нуно тудлан каласеныт: «Тол мемнан деке, вуйлатышына лий да мемнам аммон-влак дене кредалаш вӱден наҥгай».7Иеффай Галаадысе кугурак-влаклан вашештен: «Те огыл мо мыйым ужмышудымо лийында да ачамын пӧртшӧ гыч поктен луктында? Молан те, ойгыш логалмеке, мый декем толында?»8Галаадысе кугурак-влак Иеффайлан каласеныт: «Мемнам аммон-шамыч дене кредалаш наҥгай манын, тый декет толынна. Тый мемнан вуйлатышына, пӱтынь Галаадын вуйлатышыже лият».9Иеффай нунылан вашештен: «Аммон-влак дене кредалаш манын, те мыйым мӧҥгеш наҥгаеда лийже. А Господь нуным мыйын кидыш пуа гын, мый тендан вуйлатышыдак кодам мо?»10Галаадысе кугурак-влак Иеффайлан каласеныт: «Господь мыланна танык лиеш, ме тыйын каласымет семынак ыштена!»11Тыге Иеффай Галаадысе кугурак-влак дене пырля каен. Калык тудым шке вуйлатышыжлан да онжылан шогалтен. Господь ончылно Мицпаште Иеффай тидын деч ончыч каласыме чыла шомакшым угыч ойлен.12Вара тудо аммон кугыжа деке уверзе-влакым тыге каласаш колтен: «Мо тыланет кӱлеш? Молан тый мыйын мландышкем кредалаш толынат?»13Аммон кугыжа Иеффайын уверзыже-влаклан вашештен: «Кунам Израиль Египет гыч толын, тудо мыйын мландем Арнон гыч Иавок да Иордан марте руалтен налын. Мылам тудым тыныс дене пӧртылтӧ, [тунам мый мӧҥгеш каем]».14[Уверзе-влак Иеффай деке пӧртылыныт.] Тудо нуным аммон кугыжа деке кокымшо гана15тыге каласаш колтен: «Тыге Иеффай ойла: Израиль моав ден аммон-шамычын мландыштым руалтен налын огыл.16Египет гыч толмеке, Израиль ир мланде гоч Йошкар теҥыз дек каен да Кадесыш толын.17Тушеч Израиль Едом кугыжа дек уверзе-влакым каласаш колтен: ”Поро лий, шке мландет гоч эртен каяш пу”. Но Едом кугыжа колыштын огыл. Моав кугыжа декат колтен, тудат келшен огыл. Сандене Израиль Кадесыштак кодын.18Вара израильтян-влак ир мланде гоч каеныт, Едом ден Моав мланде воктеч эртеныт. Моав мландын эрвел чекше деке лишеммеке, нуно Арнон эҥер вес велне стан дене шогалыныт. Но моав мландыш израильтян-шамыч пурен огытыл, вет Арнон моав чек лийын.19Израиль Есевонышто вуйлатыше аморрей кугыжа Сигон деке уверзе-влакым колтен, тудлан каласен: ”Шке элышкына мландет гоч эртен каяш пу”.20Но Сигон Израильым шке мландыж гоч колташ кӧнен огыл. Сигон уло сарзывийжым поген, Яацыште стан дене шогалын да Израиль ӱмбак кержалтын.21Господь, Израильын Юмыжо, Сигоным да тудын уло калыкшым израильтян-влак кидыш пуэн. Нуно Сигоным кырен шалатеныт да тушто илыше аморрей-шамычын чыла мландыштым налыныт.22Арнон деч Иавок марте да ир мланде деч Иордан марте нуно аморрей-влакын пӱтынь мландыштым сеҥен налыныт.23Тыгеракын, Израильын Господь Юмыжо аморрей-влакым шке Израиль калыкше деч поктен колтен, а тый тиде мландым поген налнет?24Тый Хамос юметын пуымо мландыжым кучен илет, а ме Господь Юмынан мыланна пуымо мландым кучен илена.25Мо дене тый моав кугыжа Валак деч, Сепфор эрге деч, сайрак улат? Тудо Израиль дене иктаж-мом тавален але тудын дене кредалын мо?26Израиль ынде кумшӱдӧ ий Есевонышто да тудын йыр улшо илемлаште, Ароерыште да тудын йыр улшо илемлаште, Арнон воктене улшо олалаште ила. Молан те тиде жапыште нине мландым шупшын налын огыдал?27Мый тыйын ончылнет титакан омыл. А тый, ваштарешем сарым тӱҥалын, мыланем осалым ыштет. Тек кызыт израиль эрге ден аммон-влак коклаште Господь Шкеак судья лиеш!»28Но аммон кугыжа Иеффайын колтымо уверзыже-влакын каласымыштым колыштын огыл.29Тунам Иеффай ӱмбаке Господьын Шӱлышыжӧ волен. Галаад ден Манассий мланде гоч эртымеке, тудо Галаадысе Мицфэш толын, тушеч аммон-влак деке каен.30Иеффай Господьлан сӧрымӧ мутым каласен: «Аммон-влакым мыйын кидыш пуэт гын,31нуным сеҥен толмеке, пӧрт капкам гыч мо икымше ваштарешем лектеш – тудо Господьлан лиеш, тудым мый йӱлалтен пуымо надырлан кондем».32Иеффай аммон-влак деке каен да нунын дене кредалын. Господь аммон-влакым тудын кидыш пуэн.33Иеффай нуным Ароер гыч Минниф ден Авель-Керамим марте пытарен каен, чылаже коло олам сеҥен налын. Тыге Израиль аммон-влакым кырен шалатен.34Кунам Иеффай шке мӧҥгыжӧ Мицпаш пӧртылын, тудын ваштареш ӱдыржӧ тимпан дене куштен лектын. Тудын улыжат ик ӱдыржӧ лийын, моло шочшыжо – ӱдыржӧ да эргыже – лийын огыл.35Ӱдыржым ужмеке, Иеффай шке вургемжым кушкедын да каласен: «Ох, ӱдырем! Мом тый ыштышыч?! Тый мылам ойгым кондышыч, вет мый Господь ончылно [тыйын шотышто] сӧрымашым пуэнам. Тудым мый пудыртен ом керт».36Ӱдыржӧ тудлан вашештен: «Ачаем! Господь ончылно сӧрымашым пуэнат гын, мый денем сӧрымет семынак ыште. Вет Господь тыйын кидет дене аммон-влаклан, тыйын тушманетлан, ӱчым шуктен».37Вара ешарен: «Тый дечет иктым гына йодам: мыйым кок тылзылан колто. Мый йолташ ӱдырем-влак дене пырля курыкыш каем да ӱдыр ӱмырем лугыч лийме шотышто шорташ тӱҥалам».38«Кай», – каласен ачаже да тудым кок тылзылан колтен. Тудо йолташ ӱдыржӧ-влак дене каен да курыкышто ӱдыр ӱмыржӧ лугыч лийме шотышто шортын.39Кок тылзе эртымеке, тудо ачаж деке пӧртылын, да Иеффай шке сӧрымыжым шуктен – ӱдыржӧ пӧръеҥым пален налын огыл. Тунам Израильыште тыгай йӱла шочын –40кажне ийын израиль ӱдыр-влак Галаад гыч улшо Иеффайын ӱдыржӧ шотышто ныл кечылан шортмо йӱлам эртараш коштыныт.
Institute for Bible Translation, Finland