Нав22
1Иисус тидын деч вара Рувим ден Гад тукым-влакым да Манассийын пел тукымжым шкеж деке ӱжын, нунылан каласен:2«Те Моисейын, Господьын тарзыжын, чыла кӱштымыжым шуктенда. Мыйынат кӱштымӧ чыла шомакем колыштында.3Шуко жап, тачысе кече марте, те иза-шольыда-влакым коден огыдал да Господь Юмыдан мом кӱштымыжым шуктен шогенда.4Господь Юмыда, ойлымыж семынак, ынде иза-шольыда-влаклан тыныслыкым пуэн. Те кызыт мӧҥгышкыда, шке мландышкыда пӧртыл кертыда. Тудым тыланда Моисей, Господьын тарзыже, Иордан вес велне пуэн.5Но те Моисейын, Господьын тарзыжын, тыланда пуымо кӱштымаш ден законжо-влакым шуктен шогышаш улыда: тиде – Господь Юмыдам йӧраташ, Тудын корныж дене кошташ, Тудын кӱштымашыжым шукташ, Тудлан ӱшанле лияш да уло шӱм-чон дене служитлаш».6Иисус нуным суапландарен да колтен, нуно мӧҥгышкышт каеныт.7Манассийын пел тукымжылан Моисей мландым Васаныште, а вес пелыжлан Иисус мландым моло иза-шольышт воктене Иордан деч касвелныла пуэн улмаш. Кунам Иисус калыкым мӧҥгышкыжӧ колтен, тудо нуным суапландарен8да каласен: «Мӧҥгышкыда те поян пӧртылыда – тендан ынде шуко вольыкда, ший ден шӧртньыда, той ден кӱртньыда, тыгак шуко вургемда уло. Тушман деч поген налме поянлыкдам моло иза-шольыда дене пайлыза».9Моло израильтян-влакым да Ханаан мландысе Силомым коден, Рувим ден Гад тукым-влак да Манассийын пел тукымжо Галаадыш, шке озаланыме мландышкышт, каеныт. Тиде мландым нуно Господьын Моисейлан кӱштымыж почеш налыныт.10Кунам Рувим ден Гад тукым-влак да Манассийын пел тукымжо Ханаан мландын Иордан воктенысе кундемыш толыныт, нуно тушан пеш кугу жертвенникым чоҥеныт.11Тидын нерген моло израильтян-влак колыныт. Нуно пален налыныт: Рувим ден Гад тукым-влак да Манассийын пел тукымжо Ханаан мланде чек дене, Иорданын Израиль велысе серыште, жертвенникым чоҥеныт.12Тунам уло израиль калык Силомыш нунын ваштареш сар дене каяш погынен.13Эн ончыч израиль эрге-шамыч Рувим ден Гад тукым-влак да Манассийын пел тукымжо деке Галаад мландыш иерей Финеесым, Елеазар эргым, колтеныт.14Тудын дене пырля лу он, кажне израиль тукым гыч икте дене, миеныт. Нунын кокла гыч кажныже ик израиль тукымысо урлыкын вуйлатышыже лийын.15Нуно Рувим ден Гад тукым-влак да Манассийын пел тукымжо деке Галаад мландыш толыныт да каласеныт:16«Господьын уло калыкше тыге ойла: ”Молан те Израильын [Господь] Юмыжлан ӱшанле кодын огыдал? Молан те Господь деч, [Израильын Юмыж деч,] кораҥында? Шкаланда жертвенникым ыштен, те Господь ваштареш шогалында.17Фегорышто ыштыме сулык мыланна ок сите мо? Ме тудын деч таче кече мартеат эрналтын огынал. Тиде сулык верч Господьын калыкше пытарыме лийын!18А те таче Господь деч кораҥыда! Таче те Господь ваштареш шогалында, а эрла Тудо пӱтынь Израиль калыклан шыдешка.19Шке мландыда ару огылла чучеш гын, Господьын мландышкыже кусныза, куштыжо Господьын скинийже шога, да мландым мемнан коклаште налза. Господь Юмынан жертвенникше улмо ӱмбач шкаланда вес жертвенникым чоҥен, Господь ваштареш да мемнан ваштареш ида шогал.20Вет кунам Ахан, Зерах тукым эрге, пытараш кӱлмӧ арверым шкаланже налмыж дене сулыкыш пурен, тидлан Юмын шыдыже уло израиль калык ӱмбаке возын. Шке сулыкшылан верч тудо шкет гына огыл колен”».21Рувим ден Гад тукым-влак да Манассийын пел тукымжо израиль урлык вуйлатыше-шамычлан вашештеныт:22«Господь, юмо-влакын Юмышт! Господь, юмо-влакын Юмышт! Господь пала, да тек Израиль пала: ме Господь ваштареш шогалына да Тудын деч кораҥына гын, тек таче Тудо мемнам ок чамане.23Ме жертвенникым Господь [Юмына] деч кораҥаш да тушан йӱлалтен пуымо надыр ден кинде надырым але татулык надырым кондаш ыштенна гын, тек Господь Шкежак мемнам мут кучаш шогалта!24Уке, ме тудым вес амал дене чоҥенна. Ме теве мо деч лӱдынна: илен-толын, тендан тукым йочада-влак мемнан шочшына-шамычлан каласен кертыт: ”Господь дене, Израильын Юмыж дене, тендан могай пашада?25Мемнан да тендан коклаште, Рувим ден Гад эрге-влак, Господь чеклан Иорданым ыштен. Господь дене тендан нимогай пашада уке”. Тыге лиеш гын, тендан йочада-влаклан кӧра мемнан-шамыч Господьым жаплымыштым чарнат.26Садланак ме тиде жертвенникым чоҥаш шонен пыштышна, но йӱлалтен пуымо ден моло вес надырым кондашлан огыл.27Тек тудо мемнан да тендан коклаште, мемнан ончыкылык тукымна-влак коклаште танык лиеш: йӱлалтен пуымо надырнам, пӧлекнам да татулык надырнам конден, меат Господьлан служитлен кертына. Тунам, илен-толын, тендан тукым йочада-влак мемнан-шамычлан каласен огыт керт: ”Господь дене тендан нимогай пашада уке”.28Ме шонышна – мыланна але мемнан тукымланна иктаж-кунам тыге каласат гын, тыгай вашмутым пуэна: ”Господьын жертвенникшыла койшо тиде жертвенникым ончалза. Тудым мемнан ача-кочана-влак йӱлалтен пуымо надыр ден пӧлекым кондаш огыл, а мемнан да тендан, [тыгак йочана-влак] коклаште танык лияш чоҥеныт.29Господь ваштареш шогалаш да таче Тудын деч кораҥаш, Господь Юмынан скинийже ончылно шогышо жертвенник улмо ӱмбач, вес жертвенникым чоҥен, тушан йӱлалтен пуымо надырым, кинде надырым але моло надырым кондаш мемнан ушыштат лийын огыл!”»30Рувим, Гад да Манассий тукым эрге-влакын тыге ойлымыштым колмеке, иерей Финеес да тудын дене пырля улшо калык он-влак – Израильын урлык вуйлатышыже-влак – куаненыт.31Иерей Финеес, Елеазарын эргыже, Рувим, Гад да Манассий тукым эрге-влаклан каласен: «Таче ме пален нална: Господь – мемнан дене пырля, Тудын ончылно те ӱшанле кодында. Таче те Израильым Господьын кидше деч утарышда».32Иерей Финеес, Елеазарын эргыже, да калык он-влак Рувим ден Гад тукым-шамыч [да Манассийын пел тукымжо] деч израиль эрге-влак деке Ханаан мландыш пӧртылыныт, нунылан вашмутым конденыт.33Израиль эрге-влак тыгай вашмутым куанен вашлийыныт. Нуно Юмым моктеныт да Рувим ден Гад тукым-влак [да Манассийын пел тукымжо] ваштареш сар дене каяш, нунын илыме мландыштым пустаҥдаш шонымышт деч кораҥыныт.34Рувим ден Гад тукым-влак [да Манассийын пел тукымжо] тиде жертвенникым «Таныклыше» манын лӱмденыт. Нуно каласеныт: «Тиде жертвенник мыланна Господьын Юмо улмыж нерген таныкла».
Institute for Bible Translation, Finland