Иона1
1Амафий эрге Ионалан Господь деч тыгай шомак лийын:2«Кынел да кугу Ниневий олаш кай, тушто илыше-влаклан шижтарен ойло, вет осал пашам ыштымыштым Мый палем».3Но Иона, Господьын чурийже деч куржаш манын, Фарсисыш каяш лектын. Иоппийыш толын шумеке, Фарсисыш кайыше корабльым муын. Корнылан тӱлен да, Господь деч куржаш шонен, корабльыш шинчын.4Но Господь теҥызыште тале мардежым тарватен, да моткоч кугу тӱтан тӱҥалын, тудо корабльым шалатышашла толашен.5Корабльыште ыштыше-влак моткоч лӱдыныт, кажныже шке юмыжым кугу йӱкын сӧрвалаш тӱҥалын. Корабльым куштылемдаш манын, нуно теҥызыш ӱзгарым кышкаш тӱҥалыныт. А Иона корабльын ӱлыл ужашышкыже волен, возын да чот мален колтен.6Тудын деке корабль оза толын лектын да каласен: «Мом мален киет, кынел да шке Юметым сӧрвале! Ала Тудо мемнам шарналта да колымаш деч утара».7Вара корабльыште ыштыше-влак икте-весыштлан ойленыт: «Айста, шеревам кудалтен, пален налына: кӧлан верч мемнан ӱмбак тыгай азап толын». Шеревам кудалтеныт, тудо Ионалан логалын.8Тунам тудлан каласеныт: «Каласе, кӧн верч тыгай азап мемнан ӱмбак возын? Могай пашам тый ыштет? Кушеч толат? Кушеч, могай калык гыч улат?»9Иона нунылан вашештен: «Мый еврей улам, теҥызым да мландым ыштыше кавасе Господь Юмылан кумалам».10Нуно пален налыныт: Иона Господь деч шылын куржын, тидын нерген тудо шкежак каласен. Тунам еҥ-влак пеш чот лӱдыныт, нуно тудлан «Мом тый ыштылынат?!» маныныт.11А теҥызыште тӱтан эшеат чот талышнен, да нуно тудын деч йодыныт: «Теҥыз лыпланыже манын, мыланна тый денет мом ыштыман?»12Иона нунылан вашештен: «Мыйым кучыза да вӱдыш кудалтыза, тунам теҥыз лыплана. Мый палем: тыгай кугу тӱтаныш те мылам верч логалында».13Сер деке лишемаш манын, еҥ-влак кольмышт дене писынрак куаш тӱҥалыныт, но лектын кертын огытыл – теҥыз нунын ваштареш ончычсылак лӱшкен.14Тунам нуно Господьым кугу йӱкын сӧрвалаш тӱҥалыныт: «Господь, Тыйым сӧрвалена – тек тиде еҥын чонжо верч ме огына коло! Титакдыме еҥым пуштмылан мемнам мут кучаш ит шогалте! Вет Тый, Господь, Шкаланет келшышын ыштет».15Вара нуно Ионам кученыт да вӱдыш шуэныт. Лӱшкышӧ теҥыз тунамак лыпланен.16Корабльыште ыштыше-влак Господь деч моткоч чот лӱдыныт, Тудлан надырым конденыт да сӧрымӧ мутым пуэныт.
Institute for Bible Translation, Finland