Иов30
1А кызыт мыйым воштылыт мый дечем самырык-влак –нуно, кӧмытын ачаштым кӱтӱэм оролышо пий-влак пеленат ом шогалте ыле.2Молан мылам нунын кид куатышт?Нунын вийышт лунчырген.3Нужналык ден шужымаш деч улнышо,нуно пуста да пычкемыш ир мландыш куржыт,кошкышо рокым нултат.4Вондер воктене погат коншудым,пӱнчывӱкшерме вож – нунын кочкышышт.5Калык кокла гыч нуным поктат,шолыштшылан кычкырыме семын почешышт кычкырат,6илаш перна нунылан лапверысе коремлаште,курык шелше ден мланде рожлаште.7Вондер кокла гыч нуно кычкырат,коршаҥге коклаште икте-весышт дек пызнат.8Шотдымо еҥ-влак, лӱмдымӧ тӱча,чыла верла гыч поктен колтымо!9А кызыт нуно мыйым мурыштышт оҥарат,мыйын нергенем воштылын кутырат.10Йырнат мый дечем, каят кораҥын,огыт вожыл шӱвалаш ӱмбакем.11Юмо пӱчкын пикшвӱчем да мыйым ыштен начарым,сандене нуно, мыйым ужмеке, огыт керт шкеныштым кучен.12Тиде тӱча кержалтеш пурла могырым,мыйым сӱмырен кудалташ да пушташ манын,корныжым мый декем виктара.13Петыреныт корнем, ямдылат мылам пытымашым –ок кӱл нунылан нигӧ полшышат.14Пырдыжысе кумда рож гоч толмыла ӱмбакем толыт,чыла сӱмырен, ӱмбакем кержалтыт.15Шучкылык ӱмбакем лупшалалтын –чапемым пуйто мардеж пуал наҥгаен,сай илышем пыл семын ийын каен.16Вӱд семын йоген кая илышемже,орлыкан кече-влак мыйым авыреныт.17Коржеш йӱдым луэм,корштымаш мыйым чарныде нулта.18Куат дене кушкедеш Юмо вургемем;чийыме тувырем мыйым иша.19Тудо мыйым лавыраш кудалтен,пурак да ломыж гай мый лийынам.20Тый дечет полышым йодын кычкырем –Тый от вашеште,Тыйын ончылнет шогем,а Тый лач ончалат ӱмбакем.21Чаманыдыме лийынат Тый мый декем,куатан кидет дене мыйым темдет.22Мыйым нӧлталын, тӱтан мардеж ӱмбаке шындет,тушечын мыйым мландымбаке шуэт.23Палем: мыйым наҥгает колымашке,чыла илыше-влаклан ямдылыме верышке!24Азапыш логалше еҥ полышым йодын кычкыра гын,тудын дек Юмо кидшым шуялта мо? 25Ойгыш логалше-влак верч шортын омыл мо?Чонем корштен огыл мо йорло-влак верчын?26Кунам мый сайым вученам, толын осал,волгыдым вученам – толын пычкемыш.27Кӧргем мыйын вургыжеш, ок чарне –орлыкан кече-влак толыныт мый декем.28Ойго мыйым авалтен, кече ок куандаре,погынымаште шогалам да полышым йодын кычкырем.29Тулпире-влаклан лийынам мый изашт,страус-шамычын йолташышт улам.30Шемемын коваштем, шелышталтын,луэм-влак шокшо деч йӱлат.31Шӱлыкаҥын мыйын кӱслем,шиялтышем лийын шортшо йӱкан.
Institute for Bible Translation, Finland