Иер45
1Варух, Нирий эрге, Иеремийын каласыме шомакше-влакым книгаш возен улмаш. Теве мом Иеремий тудлан Иуда кугыжа Иоакимын, Иосий эргын, нылымше ий вуйлатымыж годым каласен:2«Тыге ойла Господь, Израильын Юмыжо, тыланет, Варух:3Тый ойлет: ”Ойго мыланем! Господь мыйын орлыкем эшеат чот кугемден. Йӧсын кечкыжмем деч ноенам, уке мылам ласкалык”.4Каласе тудлан: ”Тыге ойла Господь: мом Мый чоҥенам – шалатем, мом шынденам – куклен шуэм, мланде мучко тыге лиеш.5Шкаланет тый пеш шукым йодат. Ит йод, вет чыла илыше ӱмбак Мый ойгым колтем, – ойла Господь. – Но кеч-кушко кает гынат, тыйын чонетым арален кодем, тый илаш тӱҥалат”».
Institute for Bible Translation, Finland