Иер44
1Египет мландысе Мигдол, Тафнис, Ноф олалаште да Пафрос мландыште илыше Иуда тукым еҥ-влак нерген Иеремийлан тыгай шомак лийын:2«Тыге ойла Господь Саваоф, Израильын Юмыжо: Иерусалим да Иуда мландысе моло ола ӱмбаке могай азапым колтенам, те ужында. Нуно кызыт шалатыме улыт, тушто нигӧ ок иле.3Вет тушто илыше-шамыч осал пашам ыштеныт, Мыйын шыдем луктыныт: вес юмо-влаклан тӱтыреныт да кумалыныт. Нине юмо-влакым нунат, теат, ача-кочада-шамычат пален огытыл.4Мый тендан дек пророк тарзем-влакым угыч да угыч тыгай шомак дене колтенам: ”Ида ыштыл тыгай йырнык пашам, кудым Мыйын ужмем ок шу!”5Но нуно колыштын огытыл, пылышыштым савырен огытыл. Шке осал пашашт деч нуно кораҥын огытыл, вес юмо-влаклан тӱтырымыштым чарнен огытыл.6Сандене Мыйын кугу шыдем опталме лийын, тиде шыде тулем Иуда мландысе ола-влак ден Иерусалимын уремлаштыже йӱлен. Нунын деч кӱ ора веле кодын, нуно пуста верыш савырненыт – кызыт те тидым ужыда.7Господь Юмо Саваоф, Израильын Юмыжо, кызыт тыге ойла: молан те шкаланда тыгай кугу осалым ыштеда? Молан Иуда мландысе пӧръеҥ ден ӱдырамашым, йоча ден азам икте кодде пытараш пуэда?8Молан те шке пашада дене, илаш толмо Египет мландыштыда вес юмо-влаклан тӱтырымӧ дене Мыйым шыдештареда? Те шкендам пытареда, мландымбалысе чыла калык коклаште тендам каргаш да мыскылаш тӱҥалыт!9Иуда мландыште да Иерусалимын уремлаштыже ача-кочадан, Иуда кугыжа-влакын да ватыштын осал пашаштым, шкендан да ватыдан ыштыме осал пашадам те монденда мо?10Таче кече мартеат те торешланеда, Мый дечем огыда лӱд, тыланда да ача-кочаланда пуымо закон ден пунчалем-влак почеш огыда иле.11Сандене Господь Саваоф, Израильын Юмыжо, тыге ойла: пӱтынь Иуда калыкым пытараш манын, Мый шке чурием тендан ваштареш савырем.12Иуда калык гыч утаралт кодшо-влакым, кӧмыт Египет мландыш каяш да тушто илаш шонен пыштеныт, Мый пытарем. Нуно Египетыште изи гыч кугу марте чыланат колат – керде деч пытат але шужен колат. Нуно каргымаш ден шучкылык, воштылчык ден мыскылтыш лийыт.13Мый Египетыште илыше-влакым Иерусалимым наказатлыме семынак керде, шужымаш да шучко чер дене наказатлем.14Иуда калыкын утаралт кодшыжо-шамыч кокла гыч, кӧмыт Египет мландыш жаплан илаш толыныт, нигӧ ок утло, нигӧ ок утаралт. Уло чонышт дене нуно Иуда мландыш пӧртылнешт да тушто илынешт, но огыт пӧртыл. Лач икмынярын, кӧмыт Египет гыч куржыт, тушко пӧртылыт».15Тунам чыла пӧръеҥ, кӧмыт шке ватыштын вес юмо-влаклан тӱтырымыштым паленыт, тыгак кашак дене шогышо чыла ӱдырамаш да Египет мландысе Пафросышто илыше уло калык Иеремийлан каласеныт:16«Мом тый мыланна Господьын лӱмжӧ дене ойлет, ме колышташ огына тӱҥал!17Мом ышташ сӧренна, ме умбакыжат ышташ тӱҥалына – кавасе ӱдырамаш кугыжалан тӱтырена да йошкар арака надырым йоктарена. Тыге ончыч Иудан олалаштыже, Иерусалимын уремлаштыже ме да ача-кочана-влак, кугыжа ден онна-влак ыштенна. Тунам ме теммеш кочкынна, сайын иленна, ойгым пален огынал.18А кунам кавасе ӱдырамаш озалан тӱтырымым да йошкар арака надырым йоктарымым чарныме, ме нужналыкым чытена, мемнам керде ден шужымаш пытарат».19А ӱдырамаш-влак каласеныт: «Кунам ме кавасе ӱдырамаш озалан тӱтыренна да йошкар арака надырым йоктаренна, марийна-шамыч тиде юмылан тудын сынжым ончыктышо когыльым кӱэштмынам да йошкар арака надыр кондымынам пален огытыл мо?»20Тунам Иеремий уло калыклан – тудлан вашмутым пуышо пӧръеҥ ден ӱдырамаш-влаклан, чыла еҥлан – тыге каласен:21«Иудан олалаштыже да Иерусалимын уремлаштыже тендан да ача-кочада-влакын, он ден кугыжада-шамычын, элысе калыкын тӱтырымыштым огыл мо Господь шарналтен? Тидын нерген огыл мо Тудо шоналтен?22Тендан ыштыме осал да йырнык пашадам Господь тетла чытен кертын огыл, сандене мландыда пустаҥдыме, шучко да каргыме лийын, еҥ илыдыме верыш савырнен. Кызыт те тидым ужыда.23Тӱтырымыда дене те Господь ончылно сулыкыш пуренда. Те Тудым колыштын огыдал, Тудын законжо, пунчал ден кӱштымашыже-влак почеш илен огыдал, санденак кызыт ужмо тиде туткар тендан ӱмбаке толын».24Вара Иеремий уло калыклан, чыла ӱдырамашлан каласен: «Египет мландыште илыше Иуда калык, Господьын шомакшым колыштса!25Тыге ойла Господь Саваоф, Израильын Юмыжо: мом те да ватыда ойленда, тудым ыштенда. Те ойленда: ”Шке сӧрымашнам ме шуктена: кавасе ӱдырамаш озалан тӱтыраш да йошкар арака надырым йоктараш тӱҥалына!” Ну мо, тугеже мутдам кучыза, мом сӧрымыдам шуктыза!26Но колыштса Господьын шомакшым, Египет мландыште илыше уло Иуда калык! Шке кӱдыратле лӱмем дене товатлем, – ойла Господь, – Египет мландыште илыше Иуда калык кокла гыч нигӧ тетла Мыйын лӱмем дене товатлаш ок тӱҥал, нигӧ ок каласе: ”Господь Юмо дене товатлем!”27Мый тендам эскераш тӱҥалам, тиде тыланда сайым огыл, а ойгым конда. Египет мландыште илыше Иуда эрге-влак керде ден шужымаш деч колат, нигӧ илыше ок код.28Икмынярын гына керде деч утаралтыт да Египет гыч Иуда мландыш пӧртылыт. Египет мландыш илаш кайыше да утаралт кодшо Иуда эрге-влак кӧн шомакше – Мыйын але нунын – шукталтмым тунам пален налыт.29Палыза: тендам Мый тиде кундемыште наказатлем да Мыйын шомакем тыланда ойгым кондаш шукталтеш, – ойла Господь. – Теве тыланда тидын шотышто палдарыше пале.30Тыге ойла Господь: фараон Вафрийым, Египет кугыжам, Мый тушманже-влакын да тудым пушташ шонышо-шамычын кидышкышт пуэм. Лач тыге Мый Седекийым, Иуда кугыжам, тудым пушташ шонышо тушманжын, Вавилон кугыжа Навуходоносорын, кидышкыже пуэнам».
Institute for Bible Translation, Finland