Иер29
1Теве серыш, кудым пророк Иеремий пленыш логалше кокла гыч илен кодшо он-влаклан, иерей ден пророк-шамычлан да уло калыклан Иерусалим гыч колтен. Нине еҥ-влакым Навуходоносор Иерусалим гыч Вавилоныш наҥгаен улмаш.2Тидыже Иехоний кугыжам, тудын аважым, евнух-влакым, Иуда мланде ден Иерусалимын онжо-шамычым, плотник ден апшат-влакым Иерусалим гыч пленыш наҥгайыме деч вара лийын.3Иеремий серышым Шафан эрге Елеас ден Хелкий эрге Гемарийлан кучыктен. Нуныжым Иуда кугыжа Седекий Вавилоныш Навуходоносор кугыжа деке колтен.4«Тыге ойла Господь Саваоф, Израильын Юмыжо, чылалан, кӧм Мый Иерусалим гыч Вавилон пленыш колтенам:5пӧртым чоҥыза да тушто илыза, сад-пакчам шындыза да тудын саскажым кочса.6Ӱдырым налза да эрге-ӱдырым шочыктыза, эргыланда ӱдырым налза да ӱдырдам марлан пуыза – тек нунынат йочашт шочыт. Шукемза тушто, ида шагалем!7Кушко Мый тендам колтенам, тудо олан эсенлыкше верч тыршыза, тудын верч кумалза, вет тушто эсен лиеш гын, тенданат эсен лиеш.8Господь Саваоф, Израильын Юмыжо, тыге ойла: тек коклаштыда улшо пророк ден мужедше-влак тендам огыт ондалкале, тыгак ужмо омыланда ида ӱшане.9Мыйын лӱмем дене нуно тыланда шояк пророк шомакым увертарат, Мый нуным колтен омыл, – ойла Господь.10Тыге ойла Господь: Вавилонлан палемдыме шымле ий эртымеке, Мый тендан дек мелын савырнем да сайым сӧрымӧ шомакем шуктем – тендам тиде верыш пӧртылтем.11Мом тендан шотышто ышташ шонем, Мый палем: Мый тыланда азапым огыл, а эсен илышым пӧлеклем, ончыкылык ден ӱшаным пуэм,– ойла Господь. –12Тунам те Мыйым сӧрвален йодыда, каеда да Мыланем кумалыда, да Мый тендам колам.13Те Мыйым кычалаш тӱҥалыда да муыда. Уло шӱм-чон дене кычалаш тӱҥалыда гын,14те Мыйым муыда, – ойла Господь, – да Мый тендам плен гыч пӧртылтем. Чыла калык деч, чыла мланде гыч, кушко поктен колтенам, Мый тендам погем, – ойла Господь, – кушеч тендам наҥгаенам, тушкак пӧртылтем.15Те ойленда: ”Господь мыланна пророк-влакым Вавилоныштат пуэн”.16Тыге Господь ойла Давидын престолыштыжо шинчыше кугыжа нерген, тыгак тиде олаште илыше уло калык нерген – пленыш наҥгайыдыме иза-шольыда-влак нерген, –17тыге Господь Саваоф ойла: Мый нунын ӱмбак кердым, шужымашым да шучко черым колтем. Мый нуным шӱйшӧ смоква саска гайым ыштем, кудышт кочкашат огыт йӧрӧ.18Мый нуным керде, шужымаш да шучко чер дене поктылаш тӱҥалам. Нуным ужын, мландымбалысе чыла кугыжаныш лӱдеш. Чыла калык коклаште, кушко поктен колтем, нуно каргымаш ден шучкылык, воштылчык ден мыскылымаш лийыт.19Вет нуно Мыйын шомакем колыштын огытыл, – ойла Господь, – тудым Мый пророк тарзем-влак гоч колтенам, угыч да угыч колтенам, но нуно колыштын огытыл.20А те, пленыш наҥгайыме-влак, кӧмытым Мый Иерусалим гыч Вавилоныш колтенам, Господьын шомакшым колыштса.21Колай эрге Ахав ден Маасей эрге Седекий шотышто, кӧмыт Мыйын лӱмем дене тыланда шоя пророк шомакым увертарат, Господь, Израильын Юмыжо, тыге ойла: Мый нуным Вавилон кугыжа Навуходоносор кидыш пуэм, да тудо нуным шинча ончылныда пуштеш.22Иуда мланде гыч Вавилоныш наҥгайыме-влак коклаште нунын дене кылдалтше тыгай каргымаш шочеш: ”Мом Господь Седекий да Ахав дене ыштен, тек тудымак тый денетат ышта – нуным Вавилон кугыжа тулеш йӱлалтен”.23Вет нуно Израильыште йырнык пашам ыштылыныт: лишылъеҥыштын ватышт дене маленыт, тыгак Мыйын лӱмем дене шояк мутым ойленыт – тидым ышташ Мый нунылан кӱштен омыл. Мый тидым палем, тидлан Мый танык улам, – ойла Господь».24Нехелам гыч Шемайлан каласе:25«Тыге ойла Господь Саваоф, Израильын Юмыжо: Иерусалимысе уло калыклан, иерей Софонийлан, Маасей эргылан, да моло иерейлан тый серышым шке гыч колтенат. Тушто Софонийлан возенат:26”Господь тыйым Иодай олмеш иерейлан шогалтен. Господьын пӧртыштыжӧ эскерен шогаш кӱлеш: кажне ушдымылан, кӧ пророкла ойлаш тӱҥалеш, калып ден кепшылым чиктыман.27А молан тый тендан дене пророклен ойлышо Анафоф гыч Иеремийым от чаре?28Вет тудо мемнан декат Вавилоныш тыге ойлаш колтен: пленыште кужу жап лийыда. Пӧртым чоҥыза да тушто илыза, сад-пакчам шындыза да тудын саскажым кочса”».29Иерей Софоний тиде серышым пророк Иеремийлан лудын.30Тунам Иеремийлан Господьын шомакше лийын:31«Пленыш наҥгайыме еҥ-влаклан тыге каласаш колто: Нехелам гыч Шемай нерген Господь тыге ойла: Мый тудым колтен омыл, но Шемай тендан дене пророкла ойлен да шояк ӱшаным пуэн, –32тыге ойла Господь, – сандене Нехелам гыч Шемайым да тудын тукымжым мут кучаш шогалтем. Тиде калык коклаште тудын тукымжо ок код, могай порылыкым Мый шке калыкемлан ыштем, тудо ок уж, вет Шемай Господь ваштареш шогалаш таратен, – ойла Господь».
Institute for Bible Translation, Finland