Иер28
1Тудо ийынак визымше тылзынже – Иуда кугыжа Седекийын кугыжаланаш тӱҥалмекше, тудын нылымше ий вуйлатымыж годым – Гаваон гыч пророк Ананий, Азур эрге, Господьын пӧртыштӧ иерей ден уло калыкын шинча ончылнышт мыланем каласен:2«Тыге ойла Господь Саваоф, Израильын Юмыжо: Мый Вавилон кугыжан омытажым шалатем.3Кок ий гыч Господьын пӧртшын чыла ате-ӱзгаржым, кудым Вавилон кугыжа Навуходоносор тышеч налын да Вавилоныш наҥгаен, Мый тиде верыш пӧртылтем.4Мый Иуда кугыжа Иехонийым, Иоаким эргым, тыгак пленыш налме да Вавилоныш наҥгайыме чыла Иуда эрге-влакым тиде верыш пӧртылтем, – ойла Господь, – вет Мый Вавилон кугыжан омытажым шалатем».5Пророк Иеремий Господьын пӧртыштыжӧ шогышо иерей ден уло калыкын шинча ончылнышт пророк Ананийлан тыгай вашмутым пуэн.6Пророк Иеремий каласен: «Тек тыге лиеш, тек Господь тыге ышта! Тек Тудо ойлымо пророк шомакетым шукта – Вавилон гыч Господьын пӧртшын чыла ате-ӱзгаржым да пленыш налме еҥ-влакым тиде верыш пӧртылта!7Но колышт, мом мый тыланет да уло калыклан каласем:8тый дечет да мый дечем ончыч лийше пророк-влак шуко мланде ден кугу кугыжанышлан нунын дене сар, туткар да чер лийшаш нерген шукертсек ойленыт.9А иктаж пророк тыныс лийшашым ойлен гын, тудым Господьын колтымо чын пророклан тунам шотленыт, кунам шомакше шукталтын».10Тунам пророк Ананий пророк Иеремийын шӱйжӧ гыч омытам кудашын да шалатен.11Уло калык ончылно тудо тыгай шомакым каласен: «Тыге ойла Господь: теве тыге Мый кок ий гыч Вавилон кугыжа Навуходоносорын чыла калыкын шӱйышкышт чиктыме омыташтым шалатем!» Вара пророк Иеремий шке корныж дене ошкылын.12Пророк Иеремийын шӱйыштыжӧ лийше омытам пророк Ананийын шалатымекыже, Иеремийлан Господьын шомакше лийын:13«Кай да Ананийлан каласе: ”Тыге Господь ойла: тый пу омытам шалатенат, но олмешыже кӱртньӧ омытам ыштет.14Господь Саваоф, Израильын Юмыжо, тыге ойла: нине калык Вавилон кугыжа Навуходоносорын кулжо лийышт манын, Мый шӱйышкышт кӱртньӧ омытам чиктем. Нуно тудын кид йымалныже лийыт. Мый тудын кидыш эсогыл янлык-влакым пуэм”».15Пророк Иеремий пророк Ананийлан каласен: «Колышт, Ананий! Господь тыйым колтен огыл: тиде калыклан тый шояк ӱшаным пуэнат.16Садлан Господь тыге ойла: Мый тыйым мландымбач ӱштын кудалтем. Тый еҥ-влакым Господь ваштареш шогалаш таратенат, сандене тиде ийынак колет».17Тудо ийынак шымше тылзынже пророк Ананий колен.
Institute for Bible Translation, Finland