Иер25
1Иуда кугыжа Иоакимын, Иосий эргын, нылымше ий вуйлатымыж годым – Вавилон кугыжа Навуходоносор тунам икымше ий кугыжаланен – пӱтынь Иуда калык шотышто Иеремийлан теве тыгай шомак лийын.2Тудым пророк Иеремий Иуда калыклан да Иерусалимыште илыше чыла еҥлан каласен:3«Иуда кугыжа Иосийын, Амон эргын, латкумшо ий вуйлатымыж гыч тачысе кече марте – чылаже коло кум ий – Господь мылам шке шомакшым ойлен шоген. Мый тудым тыланда угыч да угыч ойленам, но те мыйым колыштын огыдал.4Господь тендан деке пророк тарзыже-влакым угыч да угыч колтен, но те нуным колыштын огыдал, пылышдам савырен огыдал.5Тыланда ойленыт: ”Тек кажныже шке осал корныж гыч, осал пашаж деч кораҥеш! Тунам те Господьын тыланда да ача-кочаланда курым-курымешлан пуымо мландыштыже илаш тӱҥалыда.6Вес юмо-влак почеш ида кошт, нунылан ида служитле да ида кумал, Мыйым осал паша дене ида шыдештаре, тунам Мый тыланда ойгым ом колто”.7Но те Мыйым колыштын огыдал, – ойла Господь. – Осал пашада дене Мыйын шыдем луктында, шке ӱмбакыда ойгым конденда.8Садлан Господь Саваоф тыге ойла: ”Мыйын мутем те колыштын огыдал,9сандене Мый йӱдвелысе чыла калыкым да шке тарзем, Вавилон кугыжа Навуходоносорым, ӱжын кондем. Нуным Мый тиде мланде, тыште илыше-влак да йыр улшо чыла калык ӱмбаке колтем, – ойла Господь. – Тыште Мый чыла пытарем – шучкылык ден воштылчыкыш савырем, да тиде мланде курымешлан пустаҥеш.10Мый куаныме ден веселитлыме йӱклан, каче ден оръеҥ йӱклан, вакшкӱ йӱк ден светильникын волгыдыжлан мучашым ыштем.11Тиде мланде пӱтынек шучкылыкыш савырна, пустаҥдыме лиеш. А нине калык-влак шымле ий Вавилон кугыжан кулжо лийыт.12Но шымле ий эртымеке, Мый Вавилон кугыжам да тудын калыкшым осал пашаштлан мут кучаш шогалтем, – ойла Господь. – Халдей-влакын мландыштым Мый курымешлан пустаҥдем.13Мом Мый тиде мланде шотышто каласенам – мом тиде книгаште возымо да Иеремий калык-влак ваштареш пророклен ойлен – Мый чылажымат шуктем.14Вет нуно шкештат шуко калыкын, кугу кугыжа-влакын кулышт лийыт – Мый нунылан мом ыштымышт почеш, пашашт почеш пӧртылтем”».15Господь, Израильын Юмыжо, мылам тыге каласен: «Шыдемын аракажым темыман тиде чашым кидем гыч нал да, кӧмыт деке Мый тыйым колтем, нине калыклан йӱктӧ.16Нуно йӱыт да тайнышташ тӱҥалыт, а Мыйын колтымо кердым ужмекышт, ушышт кая».17Мый Господьын кидше гыч чашым налынам да чыла калыкым, кӧмыт деке мыйым Господь колтен, тушеч йӱктенам:18Иерусалимым, Иуда мландын олаже-влакым, тудын кугыжа ден онжо-шамычым – нуным пустаҥдаш, шучкылык ден воштылчыкыш лукташ, каргымашыш савыраш манын, тыге ыштенам. Тидым те кызыт ужыда.19Тыгак фараоным, Египет кугыжам, тарзе ден тӧраже-влакым, тудын уло калыкшым йӱктенам,20нунын коклаште илыше чыла йот тукым еҥ-влакым, Уц мландын чыла кугыжажым, Филистим мландын чыла кугыжажым, Аскалоным, Газам, Екроным, Азотын утаралт кодшыжо-влакым,21Едомым, Моавым, Аммон эрге-шамычым,22Тирын чыла кугыжажым, Сидонын чыла кугыжажым, теҥыз вес велысе отро-влакын кугыжаштым,23Деданым, Фемам, Бузым да вуйвичкыжысе ӱпыштым тӱредше чыла еҥым,24Аравийын чыла кугыжажым, ир мландыште илыше тӱрлӧ калыкын кугыжаштым,25Зимрин чыла кугыжажым, Еламын чыла кугыжажым, Мидийын чыла кугыжажым,26йӱдвелысе чыла кугыжам, лишне да умбалне улшымат – икте почеш весым. Мый мландымбалысе чыла кугыжанышым йӱктенам, а Сесах кугыжа пытартышлан йӱын.27«Каласе нунылан: ”Тыге ойла Господь Саваоф, Израильын Юмыжо: Йӱза, руштса, укшичса, ӱмбакыда колтымо кердем деч камвочса, тетла ида кынел!”28А кидет гыч чашым налаш да йӱаш тореш лийыт гын, нунылан каласе: ”Господь Саваоф тыге ойла: тыланда садак йӱаш логалеш!29Мыйын лӱмем дене лӱмдымӧ тиде ола ӱмбак Мый ойгым колтем. А те мут кучаш шогалтыде кодыда мо? Уке, те мут кучыде огыда код, вет Мый мландымбалне илыше чыла еҥ ӱмбаке кердым ӱжам, – ойла Господь Саваоф”.30Сандене нунылан чыла тиде пророк шомакым увертаре. Каласе нунылан:”Кӱшычын Господь лев семын ырла,святой илыме верже гыч йӱкшым кугемда,шке шорык кӱтӱжӧ ӱмбаке шучкын ырла.Мландымбалне илыше чыла еҥ ӱмбакеТудо виноградым тошкышо семын кычкыралеш.31Мланде тӱр марте гӱжлымӧ йӱк солна,вет Господь калык-влакым судитла:кажныжым Тудо мут кучаш шогалта,осал еҥым кердылан пуа, – ойла Господь”.32Тыге ойла Господь Саваоф:”Теве ик калык деч вес калык дек туткар толеш,мланде тӱр гыч кугу тӱтан нӧлталтеш!”33Господьын пуштмыжо-влак тудо кечын чыла вере – ик мланде тӱр гыч весе марте – кияш тӱҥалыт. Нунын шотышто огыт ойгыро, нуным поген огыт нал, огыт тойо – мландымбалне нуно терыс семын кияш тӱҥалыт.34Шортса, кӱтӱчӧ-влак, магырыза,кӱтӱм вӱден наҥгайыше-шамыч, ломыжышто пӧрдалза!Вет тендам шӱшкылмӧ да шалатыме кече толын шуын –шергакан ате семын камвозын пудыргеда.35Огеш лий кӱтӱчӧ-влаклан шылын утлымо вер,кӱтӱм вӱден наҥгайыше-шамычлан – утаралтмаш.36Шокта кӱтӱчӧ-влакын шортмо йӱкышт,кӱтӱм вӱдышӧ-шамычын магырымышт –вет Господь кӱтымӧ верыштым пустаҥден.37Господьын йӱлышӧ шыдыж дечтымык кӱтымӧ вер-влак пытат.38Тудо – илыме верже гыч лекше лев гай!Пустаҥдышын кугу шыдыж деч,Тудын йӱлышӧ шыдыж дечты кундем ир мландыш савырнен».
Institute for Bible Translation, Finland