Ис20
1Тудо ийын, кунам Ассирий кугыжа Саргонын колтымо тартан Азот деке толын да, ваштарешыже кредалын, тудым сеҥен налын,2Господь Исаийлан, Амос эргылан, тыге каласен улмаш: «Кыдалыште кечыше чоштыра вургеметым да йолет гыч сандальым кудаш». Исаий тыгак ыштен – чараматын да чарайола коштын.3Господь каласен: «Кузе Мыйын Исаий тарзем кум ий чараматын да чарайола коштын – тиде Египет ден Эфиопий шотышто палдарыше пале лийын, –4туге Ассирий кугыжа Египетыште пленыш налме да Эфиопий гыч наҥгайыме еҥ-влакым, самырык ден шоҥгымат, чараматын да чарайолын, чара коварчаным поктен наҥгая – Египетым намысыш пурта.5Тунам Эфиопийлан инаныше да Египет дене моктаныше-влак пеш чот лӱдыт, намысыш пурат.6Тудо кечын тиде теҥыз серыште илыше-влак каласат: ”Теве мо лийын нунын дене, кӧмытлан ме инаненна да, Ассирий кугыжа деч аралалташ манын, кӧмыт дек полышым йодын миенна! Кузе мыланна кызытше утаралташ?”»
Institute for Bible Translation, Finland