Ос4
1«Израиль эрге-влак, Господьын шомакшым колыштса! Тиде мландыште илыше-шамычлан Господь судым ышта, вет тыште нимогай чынлык, порылык да Юмым палымаш уке.2Шояклен товатлымаш, ондалымаш, пуштмаш, шолыштмаш да яжарланымаш пеш чот шарленыт, вӱр йоктарымылан мучаш уке.3Сандене тиде мланде ойгыра, тушто илыше-влак, янлык ден кайык-шамыч лунчыргат, теҥызысе кол-влакат пытат.4Но тек нигӧ ок судитлалт, нигӧ весым ок шылтале, калыкет иерей-шамыч дене ок ӱчаше.5Тый кечывалым шӱртнет, тый денет пырля йӱдым пророк камвозеш, да Мый тыйын аватым пытарем.6Мыйын калыкем шинчымашыже укелан кӧра пыта. Кузе тый шинчымашым кораҥденат, тыгак Мыят тыйым Шке ончылнем служитлыме деч кораҥдем. Кузе тый шке Юметын законжым монденат, тыгак Мыят тыйын йочат-влакым мондем.7Иерей-шамыч кунар шукемыт, тунар шуко Мыйын ваштарешем сулыкыш пурат, садлан Мый нунын чапыштым намысыш савырем.8Нуно Мыйын калыкемын сулык верч кондымо надырже-влакым кочкын илат, сандене сулык ыштымыже нунылан келша.9Мо калык дене лиеш, тидак иерей денат лиеш: мом ыштымыштлан Мый мут кучаш шогалтем, нунылан пашашт почеш пӧртылтем.10Нуно кочкаш тӱҥалыт, но огыт тем, яжарланаш тӱҥалыт, но огыт шукем, вет Господьлан ӱшанле лиймыштым чарненыт.11Нунын уш-акылыштым яжарланымаш да йошкар аракам йӱмаш авалтеныт.12Мыйын калыкем каҥашым пушеҥге деч йодеш, пондо тудлан вашмутым пуа. Яжар шӱлыш калыкемым чын корно гыч кораҥден, нуно яжарланеныт да шке Юмышт деч кораҥыныт.13Курык вуйлаште нуно надырым кондат, кӱкшакалаште тумо, тополь, теревинф йымалне тӱтырат, вет тушто нунылан ӱмыл келшен. Сандене ӱдырда-влак яжарланат, шешкыда-шамыч вес пӧръеҥ дене коштыт.14Но Мый ӱдырда-влакым яжарланымыштлан да шешкыда-шамычым вес пӧръеҥ дене коштмыштлан мут кучаш ом шогалте, вет пӧръеҥ-влакат яжар ӱдырамаш-шамыч деке коштыт да кумалме верласе яжар-влак дене пырля надырым кондат. Умылен моштыдымо калык пыта!15Израиль, тыйже яжарланет гын, тунам кеч Иудаже сулыкым ынже ыште ыле! Галгалыш ида кошт, Беф-Авеныш ида кӱзӧ да ”Господь дене товатлем!” манын ида ойло.16Израиль ӱскырт туна гай вустык лийын. Кумда пасушто пача-влакым кӱтымӧ семын Господь нуным кӱташ тӱҥалеш мо?17Ефрем тукым шояк юмо-влак деке шӱмаҥын – коден кай тудым!18Аракам шуко йӱмекышт, нуно яжарланымашлан вуйыштым пуэныт, вуйлатышышт намысле пашам йӧратат.19Мардежын шулдыржо нуным ӱштыл шуа, да нуно надырышт деч вожылыт.
Institute for Bible Translation, Finland