Тӱҥ48
1Тидын деч вара Иосифлан увертареныт: «Тыйын ачат черле». Иосиф кок эргыжым, Манассий ден Ефремым, пырля налын, [Иаков деке каен].2Иаковлан тидын нерген шижтарен каласеныт: «Иосиф эргыч тый декет толеш». Израиль вийжым погалтен да верыштыже кынел шинчын.3Иаков Иосифлан каласен: «Чылакертше Юмо мыланем Ханаан мландыште, Лузышто, кончен да мыйым суапландарен.4Тудо мыланем каласен: ”Мый тыйым, тукыметым кугун шукемдем да чот шарем, тый дечет шуко калыкым ыштем. Тый дечет варасе тукыметлан тиде мландым курымешлан пуэм”.5Мыйын Египетыш толмем деч ончыч Египет мландыште шочшо тыйын кок эргыч ынде мыйын улыт. Ефрем ден Манассий, Рувим ден Симеон семынак, мыйын лийыт.6А нунын деч вара тый дечет шочшо моло икшыве тыйын лийыт. Нуно шке изаштын тукымыштлан шотлалташ тӱҥалыт да нунын пайышт гыч югыпогым налыт.7Месопотамий гыч толмем годым Ханаан мландеш, Ефрафа деке изишак миен шуде, [тыйын] Рахиль [ават] колыш. Мый тудым тушан тойышым». Ефрафам кызыт Вифлеем маныт.8Израиль Иосифын эргыже-влакым ужын да йодын: «Нине кӧ улыт?»9Иосиф ачажлан каласен: «Тиде мыйын эргым-влак улыт, нуным Юмо мыланем тыште пуэн». Иаков каласен: «Нуным мый декем лишкырак кондо, мый нуным суапландарем».10Шоҥго велешыже Израильын шинчаже начарештын, садлан тудо раш ужын кертын огыл. Иосиф эргыже-влакым тудын деке конден, Иаков нуным ӧндалын да шупшалын.11Израиль Иосифлан каласен: «Тыйым ужам манын, ӱшаненат омыл ыле, но теве Юмо мыланем шочшет-влакымат ончыктыш».12Иосиф эргыже-влакым тудын йолжо воктеч кораҥден да вуйжым мланде марте савен.13Вара Иосиф кок эргыжымат налын да пурла кидше дене Ефремым Израильын шола могырышкыжо, а шола кидше дене Манассийым Израильын пурла могырышкыжо конден шогалтен.14Но Израиль пурла кидшым шуялтен да Ефремын вуйышкыжо пыштен, кеч тудыжо изирак эрге лийын, а шола кидшым – Манассийын вуйышкыжо. Манассий кугэрге лийын гынат, Израиль тыге лӱмынак ыштен.15Тудо Иосифым суапландарен тыге каласен: «Авраам ден Исаак ача-кочамын колышт илыме Юмышт – шочмем гыч тачысе кече марте мыйым кӱтен ашныше Юмо,16чыла тӱрлӧ осал деч мыйым утарыше Суксо – нине рвезе-влакым суапландарыже. Нуно мыйын да ача-кочамын, Авраам ден Исаакын, тукым лӱмнам шуйышт, мландымбалне чот шукемышт».17Иосиф ужын: ачаже пурла кидшым Ефремын вуйышкыжо пыштен – тидым тудо йоҥылышлан шотлен. Ефремын вуй гычше налын, Манассийын вуйышкыжо пышташ манын, тудо ачажын кидшым кучен.18Иосиф ачажлан каласен: «Ачай, тыге огыл. Теве ончыч шочшо эргым – пурла кидетым тудын вуйышкыжо пыште».19Но ачаже келшен огыл да каласен: «Палем, эргым, палем. Тудын дечат калык лиеш, тудат кугу айдеме лиеш. Но шольыжо тудын деч кугурак лиеш, да тудын тукымжо деч шуко калык лектеш».20Тудо кечын нуным суапландарен каласен: «Израиль калык тендан лӱмда дене тыге суапландараш тӱҥалеш – ”Юмо тыйым Ефрем ден Манассий гайым ыштыже”». Тыге тудо Ефремым Манассий деч кӱшкӧ шынден.21Израиль Иосифлан каласен: «Ынде мыланем колаш жап шуын. Но Юмо тендан дене пырля лиеш да тендам кугезе мландыш пӧртылта.22Иза-шольыч-влак коклаште тый кугурак лият, да тыланет мый курык тайылым пуэм. Тиде верым мый аморрей-влак деч керде да пикш дене сеҥен налынам».
Institute for Bible Translation, Finland