Тӱҥ47
1Иосиф фараон деке миен да увертарен каласен: «Мыйын ачам, иза-шольо-влакем тыгыде да шолдыра вольыкышт, чыла погышт дене Ханаан мланде гыч толыныт. Кызыт Гесем мландыште улыт».2Тудо иза-шольыж-влак кокла гыч визытшым налын, нуным фараон деке конден.3Фараон нунын деч йодын: «Могай пашам ыштен иледа?» Нунышт вашештеныт: «Ме, тыйын кулет-влак, ача-кочана семынак шорык кӱтӱчӧ улына».4Нуно фараонлан эше каласеныт: «Ме тиде мландышке жаплан илаш толынна. Вет Ханаан мландыште кугу шужымаш, да тыйын кулет-влакын вольык пукшаш шудан верышт уке. Садлан мемнам, кулет-влакым, Гесем мландыште илаш кодаш йодына».5Фараон Иосифлан каласен: «Тый декет ачат ден иза-шольо-влакет толыныт.6Египет мланде – тыйын ончылнет. Ачат ден иза-шольо-влакетым элнан эн сай кундемыштыже вераҥде. Тек нуно Гесем мландыште илат. Нунын коклаште уста еҥ-влак улмым палет гын, нуным мыйын кӱтӱэм ончышо-влакын вуйлатышыштлан шогалте».7Иосиф Иаковым, шке ачажым, фараон деке конден. Иаков фараон дене саламлалтын да тудым суапландарен.8Фараон Иаков деч йодын: «Тый мыняр ияш улат?»9Иаков фараонлан вашештен: «Мыйын илыш корнем шӱдӧ кумло ийыш шуын. Илыме кечем-влак кӱчык да неле лийыныт. Ача-кочамын илыме ӱмырышт марте шуын омыл».10Вара Иаков фараоным суапландарен да тудын деч лектын.11Иосиф ачажлан, иза-шольыж-влаклан илыме верым ойырен. Нунылан Египетын эн сай ужашыштыже, Раамсес кундемыште, фараонын кӱштымыж семынак мландым пуэн.12Иосиф ачажланат, иза-шольыж-влакланат да уло тукымыштлан, кажне ешыште мыняр айдеме улмым шотыш налын, киндым пуэн шоген.13Уло мланде мучко кинде лийын огыл, а шужымаш эре талышнен толын. Шужымашлан кӧра Египет ден Ханаан мланде пеш чот явыгеныт.14Киндым ужален, Иосиф Египет ден Ханаан мландыште улшо чыла шийвундым поген да фараонын казнашкыже колтен.15Египет ден Ханаан мландыште шийвундо пытен шуын. Египтян-влак Иосиф деке толыныт да каласеныт: «Мыланна киндым пу. Мемнан шийвундо пытен гын, ме тыйын ончылнет колышаш улына мо?»16Иосиф вашештен: «Вольыкдам поктен кондыза. Шийда пытен гын, мый киндым вольыкда дене вашталташ тӱҥалам».17Нуно Иосиф деке шке вольыкыштым поктен конденыт. Иосиф нунын имньыштым, тыгыде ден шолдыра вольык кӱтӱштым, осёлыштым киндылан вашталтен. Тудо ийын Иосиф, вольыкыштым кинде дене вашталтен, калыкым пукшен.18Тиде ий эртен каен. Вес ийын Иосиф деке нуно уэш толыныт да ойленыт: «Мемнан озана деч огына шылте: шийна кодын огыл, вольыкнамат чыла пуымо. Мемнам шкенам да мландынам шотлаш огыл гын, ынде тыланет пуаш мемнан нимоат кодын огыл.19Мыланна ынде мландына дене пырля тыйын шинча ончылнетак пытыман мо? Нал мемнам мландына дене пырля да тидын олмеш киндым пу. Ме мландына дене пырля фараонын кулжо лийына. А мыланна колаш огыл, но илыше кодаш да мландынат яра ынже кий манын, тый мыланна урлыкаш пырчым пу».20Тыге Иосиф Египетысе чыла мландым фараонлан налын. Египетыште илыше кажне еҥ шке пасужым киндылан вашталтен, вет шужымаш нуным чаманыде ишыктен толын. Тыге уло мланде фараон кидыш куснен.21Иосиф пӱтынь Египетысе калыкым кулыш савырен.22Лач онаеҥ-влакын мландыштым гына налын огыл, вет фараон, оксам тӱлен, нуным ашнен. Нуно тидын дене иленыт, сандене шке мландыштым ужален огытыл.23Иосиф калыклан каласен: «Мый фараонлан ынде шкендамат, мландыдамат налынам. Теве тыланда урлыкаш – мландым ӱдыза.24Шурным поген налме деч вара визымше ужашыжым фараонлан пуыза, а ныл ужашыже тыланда пасудам ӱдаш, шкаланда, мӧҥгыштыда улшо-влаклан, тыгак шочшыланда кочкаш кодеш».25Нунышт каласеныт: «Тый мемнан илышнам утарен коденат, сандене, озанан поро кумылжым сулен налын, ме тек фараонын кулжо лийына».26Иосиф Египетысе мланде законыш тыгай ешартышым пуртен: шурнылектышын визымше ужашыжым фараонлан пуаш. Тышке онаеҥ-влакын мландышт пурен огытыл – нуно фараонын лийын огытыл. Тыгай пунчал тачысе кечынат вийым йомдарен огыл.27Тыге Израиль тукым Египет элысе Гесем мландеш верланен да ты мланде дене пайдаланен илен. Тушто нунын шуко икшывышт шочын, да нуно чот шукемыныт.28Египет мландыште Иаков латшым ийым илен. Чылаже тудо шӱдӧ нылле шым ийым илен.29Кунам Израильын ӱмыржӧ мучашке лишемын, тудо шкеж деке Иосиф эргыжым ӱжыктен да тудлан каласен: «Мый тыйын поро кумылетым суленам гын, кидет дене эрдышкем тӱкнӧ да товатле: мыйым тышан Египетеш от тойо, а ача-кочам-влак дене пырля кияш манын, мыйым тышеч наҥгает да нунын шӱгарешышт тоет. Тидын дене тый мыланем шке порылыкетым да ӱшанле улметым ончыктет». Иосиф вашештен: «Тыйын каласымет семынак ыштем».31Иаков каласен: «Товатле мылам». Иосиф товатлен. Израиль кийыме верыштыже вуйжым тауштен савен.
Institute for Bible Translation, Finland