Тӱҥ34
1Дина, Лиян Иаков деч шочшо ӱдыржӧ, икана ты мландысе ӱдыр-влакым ончалаш лектын.2Тудым евей Емморын, тусо мландын онжын, Сихем эргыже ужын. Тудо Динам шкеж деке пуртен да виешлен.3Рвезын шӱмжӧ Иаковын Дина ӱдыржӧ пелен пижын, ӱдырым тудо йӧратен шынден, ныжыл мут-влакым ойлен.4Сихем шке Еммор ачаж деч тиде ӱдырым ватылан налын пуаш йодын.5Иаков Дина ӱдыржым [Емморын эргыже] намыслыме нерген колын, но эргыже-влак тораште вольыкым кӱтенытат, толмешкышт шып коштын.6А Сихемын Еммор ачаже Иаков деке кутыраш толын.7Кӱтӱ гыч пӧртылмекышт, тидын нерген Иаковын эргышт-влак колыныт да пеш чот шыдешкен ажгыненыт. Вет Сихем, Иаковын ӱдыржӧ дене мален, Израильын чапшым волтен, а тыге ышташ ок йӧрӧ.8Еммор нунылан тыге манын: «Мыйын Сихем эргым тендан ӱдырда деке чот шӱмешкен, тудым эргымлан марлан пуыза.9Айста родо лийына: те ӱдырда-влакым мыланна пуэда, а мемнан ӱдыр-влакым [шке эргыланда] налыда.10Илыза мемнан дене пырля. Мланде теве шинча ончылныдак, [тудо кугу]. Кушто шонеда, тушто илыза. Тудым шкаланда налын кертыда».11Вара Сихем Динан ачаж ден изаж-влаклан эше каласен: «Кумылдам гына савырышаш ыле, мом йодыда, мый тыланда чыла пуэм.12Йодса эн кугу олным да эн шерге пӧлек-влакым. Мом каласеда, мый тыланда чыла пуэм, ӱдырдам гына мылам марлан пуыза».13Дина шӱжарыштым намыслымыжлан кӧра Сихемлан да тудын Еммор ачажлан Иаковын эргыже-влак осал чоян вашештеныт.14[Динан Симеон ден Левий изаже-влак, Лиян эргыж-влак,] нунылан тыге маныныт: «Йодмыдам шукташ огеш лий: шӱжарнам ме пӱчмӧ йӱлам эртыдыме пӧръеҥлан марлан пуэн огына керт, тиде мыланна кугу намыс лиеш.15Уло пӧръеҥ тукымдам мемнан семынак пӱчса, тунам веле йодмыда дене келшен кертына [да тендан дене илаш тӱҥалына].16Тунам ӱдырна-влакым тыланда марлан пуаш, а тендан-влакым шкаланна налаш да тендан дене пырля ик калык семын илаш тӱҥалына.17Пӱчмӧ йӱлам эрташ огыда келше гын, ме шӱжарнам налына да каена».18Тыге манме Емморлан да тудын Сихем эргыжлан келшен.19Йодмыштым рвезе тунамак шуктен, вет тудо Иаковын ӱдыржым йӧратен. Тудо ачажын суртыштыжо эн пагалыме еҥ лийын.20Еммор да тудын Сихем эргыже ола капка воктенысе погынымо верыш толыныт да шке олаштышт илыше-влаклан тыге ойленыт:21«Нине еҥ-влак мемнан дене келшен илынешт. Тек нуно мемнан мландеш верланат да кушто шонат, тушто илаш тӱҥалыт, вет нунылан тыште вер ситышын уло. Ме нунын ӱдырыштым налаш тӱҥалына, шкенаным нунылан марлан пуэна.22Но мемнан уло пӧръеҥ тукым нунын семынак пӱчмӧ лиймеке веле нуно мемнан дене пырля ик калык семын илаш келшат.23Мемнанак огыт лий мо вара нунын кӱтӱшт, погышт, чумыр вольыкышт? Йодмышт дене келшена гын, нуно мемнан дене илаш тӱҥалыт».24Оласе погынымо верыш толшо-влак Еммор да тудын Сихем эргыже дене келшеныт. Тыге олаште илыше уло пӧръеҥ тукым пӱчмӧ йӱлам эртен.25Кумшо кечын нуно пеш чот йӧсланеныт. Тунам Иаковын кок эргыже, Симеон ден Левий, Динан изашт, кердыштым руалтеныт да ола ӱмбак нимогай чарак деч посна керылтыныт, чыла пӧръеҥым пуштын коденыт.26Нуно Еммор ден тудын Сихем эргыжымат керде дене руал пуштыныт. Вара Сихемын пӧртшӧ гыч Динам налыныт да тушеч каеныт.27Тидын деч вара Иаковын эргыже-влак пуштедылме верыш толыныт да, шӱжарыштым намыслымылан ӱчым шуктен, уло олам аген коденыт.28Нунын тыгыде да шолдыра вольыкыштым, осёлыштым, олаште да нурышто мо улым, чумыр погыштым, йочаштым, ватыштым пленыш налыныт – [олаште да] пӧртлаште мо лийын – чыла аген каеныт.30Симеон ден Левийлан Иаков тыге каласен: «Те мыланем ойгым кондышда. Ты мландыште илыше хананей ден ферезей калык-влак коклаште мый декем ужмышудымашым тарватышда. Мыйын еҥем шагал. Нуно мыйын ваштарешем погынен тарванат гын, мемнам сеҥат да шкемымат, уло тукымемат чыла пытарат».31Нунышт вашештеныт: «А мемнан шӱжарнам яжар ӱдыр семын кучылташ лиеш ыле мо?!»
Institute for Bible Translation, Finland