Тӱҥ30
1Рахиль ужын: тудо Иаковлан шочшым ыштен ок керт, сандене акажлан кӧранен илен. Иаковлан тудо каласен: «Мыланем икшывым пӧлекле. Уке гын, мый колем».2Иаков тудлан сырен пелештен: «Мый Юмо улам мо? Тылат йочам ышташ чаракым мый ыштенам мо?»3Тунам Рахиль каласен: «Теве мыйын Валла тарзем. Мален лек тудын дене, тек тудо мыланем азам ышта. Тыге мый тудын гоч шочшан лиям».4Вара шке Валла тарзыжым Иаковлан ватылыкеш пуэн. Тудыжо Валла дене мален лектын.5[Рахильын] Валла [тарзыже] мӱшкыраҥын да Иаковлан эргым ыштен.6«Юмо мый денем чыным ыштен, Тудо мыйын йӱкем колын, – манын Рахиль, – мыланем эргым пуэн». Сандене эргыжлан Дан лӱмым пуэн.7Валла, Рахильын тарзыже, эше мӱшкыраҥын да Иаковлан вес эргым ыштен.8«Мый акам дене таҥасен чот кучедалынам да сеҥенам», – манын Рахиль. Эргылан Неффалим лӱмым пуэн.9Лия ужын: тудо аза ыштымым чарнен, сандене шке Зелфа тарзыжым Иаковлан ватылыкеш пуэн. [Тудыжо Зелфа дене мален лектын.]10Зелфа, Лиян тарзыже, [мӱшкыраҥын да] Иаковлан эргым ыштен.11«Пиал лие», – манын Лия да эргылан Гад лӱмым пуэн.12Лиян Зелфа тарзыже [эше мӱшкыраҥын да] Иаковлан вес эргым ыштен.13Тунам Лия каласен: «Тиде мыйын пиалешем, ынде ӱдырамаш-влак мыйым пиалан манаш тӱҥалыт». Эргылан Асир лӱмым пуэн.14Икана шыдаҥым тӱредме годым Рувим пасушко каен, мандрагор саскам муын да Лия аважлан поген конден. Рахиль Лия [акаж] деч йодын: «Эргычын кондымо мандрагор саскажым мыланемат пу».15Но тудыжо Рахильлан каласен: «Мыйын марием поген налмет ок сите мо? Эше эргымын мандрагор саскажымат налнет». Рахиль манын: «Эргычын погымо саскажым пуэт гын, тиде йӱдым Иаков тек тыйын пеленет возеш».16Кастене Иаковын пасу гыч толмыж годым ваштарешыже Лия лектын да тудлан каласен: «[Таче йӱдым] мый денем малышаш улат, мый тыйым эргымын мандрагор саскаж дене налынам». Тудо йӱдым Иаков Лия пелен эртарен.17Юмо Лиям колын, тудыжо мӱшкыраҥын да Иаковлан визымше эргым ыштен.18«Мариемлан шке тарзем пуымылан Юмо мыланем пӧртылтен», – манын Лия да эргыжлан Иссахар лӱмым пуэн.19Лия адак мӱшкыраҥын да Иаковлан кудымшо эргым ыштен.20«Юмо мыланем моткоч чапле пӧлекым ыштен. Ындыже марием мый денемак илаш тӱҥалеш, вет мый тудлан куд эргым ыштенам», – ойлен Лия да эргыжлан Завулон лӱмым пуэн.21Тиддеч вара Лия эше ӱдырым ыштен, тудлан Дина лӱмым пуэн.22Юмо Рахиль нергенат шарналтен, тудым колын да авагудыжым почын.23Тудо мӱшкыраҥын да [Иаковлан] эрге азам ыштен, «Юмо мый дечем намысым кораҥден» манын каласен.24Рахиль эргыжлан Иосиф лӱмым пуэн да каласен: «Тек Господь мыланем эше вес эргымат пуа».25Рахильын Иосифым ыштымыж деч вара Иаков Лаванлан манын: «Мыйым колто, мый мӧҥгышкем, шке мландышкем каем.26Мыланем ватем ден шочшем-влакым пу, да мый каем. Нунын верч мый тыланет пашам ыштенам. Кунар пашам ыштенам, тый шкеат палет».27Лаван тудлан вашештен: «О, тыйын поро кумылетым мый сулем ыле гын! Мый пален налынам: тылат верч мыйым Господь суапландарен».28Вара ешарен: «Каласе, мом мыланем тылат пуаш, мый чыла пуаш ямде улам».29Тидлан Иаков вашештен: «Кузе тыланет пашам ыштенам, мыйын годым вольыкетын чотшо кузе кугемын, тый палет.30Толмем деч ончыч тыйын погет шагал лийын, а ынде чот шукемын. Мыйын толмем дене тыйым Господь суапландарен. А шке суртемлан, ешемлан кунам мый пашам ышташ тӱҥалам?»31«Мом тыланет пуаш?» – Лаван туддеч йодын. Иаков манын: «Мыланем нимоат ок кӱл. Но мом йодмем ыштет гын, мый адакат тыйын шорыкетым кӱташ, оролаш тӱҥалам.32Мый таче тыйын вольык кӱтӱэт-влакым ончал савырнем. А тый тушечын чыла ола-вула ден тамган-тамган вольыкым ойыро. Шорык-влак кокла гыч чыла шем тӱсаным да каза-влак кокла гыч ола-вула ден тамган-тамганым ойырен пу. Тиде вольык мыйын пашадарем лиеш.33Вара мыланем пуымо вольыкым ончалаш толмекет, мыйын чын ыштымем тергаш тылат куштылго лиеш. Кӱтӱштем ола-вула да тамган-тамган деч посна эше вес тӱсан каза але шеме огыл шорык уло гын, вигак пале лиеш: нуно шолыштмо улыт».34Лаван вашештен: «Йӧра, ойлымет семынак лийже».35Но Лаван тудо кечынак чыла ола-вула ден тамган-тамган казатагам, чыла ола-вула ден тамган-тамган казам, кудыштын кеч изишак ош тӱс лийын, тыгак чыла шем шорыкым ойырен налын да эргыж-влаклан пуэн.36Шкенжын да Иаковын кӱтӱшт-влак коклам кум кече кайышаш кутышым ышташ кӱштен. А Иаков Лаванын кодшо тыгыде вольыкшым кӱтен.37Тунам Иаков топольын, миндальын да платан пушеҥгын нӧргӧ воштырыштым пӱчкеден да шӱмыштым ошо коймешке корнын-корнын шӱмлен налын.38Вара тиде воштырым вольык ончыко, нунын йӱктымӧ волышкышт, оптен. Вольык тышке вӱд йӱаш толын да коштмо жап годым тыште тӱжаҥын.39Олача воштыр ончылно коштын, нунын пачаштат ола-вула але тамган-тамган шочыныт.40Нине пача-влакым Иаков шкаланже ойырен. Моло вольыкым тудо Лаванын ола-вула да тамган-тамган вольыкшо деке савырен шогалтен. Шке кӱтӱжым посна кучен, Лаванын вольыкшо дене ушен огыл.41Кӱтӱштӧ таза вольык коштмо годым Иаков кажне гана вӱд йӱктымӧ волыш нунын ончык олача воштырым оптен. Тидым тудо воштыр ончылан тӱжаҥышт манын ыштен.42А начар вольык тӱжаҥме годым воштырым пыштен огыл. Тыге начар вольык Лаванлан, а таза вольык Иаковлан логалын.43Тыге Иаков моткоч поян еҥыш савырнен. Тудын пеш шуко тыгыде [да шолдыра] вольыкшо, ӱдырамаш ден пӧръеҥ кулжо, верблюдшо, осёлжо лийын.
Institute for Bible Translation, Finland