Тӱҥ29
1Иаков кынелын да эрвел еҥ-влакын илыме мландышкышт [арамей Вафуилын Лаван эргыж деке] каен. [Лаванже Иаков ден Исавын Ревекка аваштын изаже лийын.]2Иаков ужын: теве таве, воктеныже кум шорык кӱтӱ. Тыште вольык йӱктымӧ вер лийын. Таве аҥыште кугу кӱ киен.3Чыла кӱтӱ погынен шумеке, кӱм таве аҥ гыч кораҥден, шорык-влакым йӱктеныт да вара тудым адакат олмышкыжо, таве аҥышке, пыштеныт улмаш.4Иаков кӱтӱчӧ-влак деч йодын: «Иза-шольым-влак! Кушеч те улыда?» Нунышт вашештеныт: «Ме Харран гыч улына».5Тунам тудо йодын: «Те Лаваным, Нахорын эргыжым, паледа мо?» Нуно маныныт: «Палена».6Вара адак йодын: «Кузерак тудо илыштеш?» Кӱтӱчӧ-влак вашештеныт: «Сайынак, теве тудын Рахиль ӱдыржӧ шорык-влакым поктен толеш».7«Кас марте эше жап уло, кӱтӱм чумыраш але эр, шорыкдам йӱктыза да кӱтымӧ верыш наҥгайыза», – манын Иаков.8Но кӱтӱчӧ-влак каласеныт: «Уке, тыге ыштен огына керт. Чыла кӱтӱ погынымеке да таве ӱмбач кӱм кораҥдымеке веле ме шорыкнам йӱктен кертына».9Иаковын кӱтӱчӧ-влак дене мутланен шогымыж годым [Лаванын] Рахиль [ӱдыржӧ] ачажын шорык кӱтӱж дене толын шуын, тудо [ачажын шорык кӱтӱжым] кӱта улмаш.10Лаван чӱчӱжын Рахиль ӱдыржым да шорык-влакшым ужмеке, Иаков таве аҥ деке миен, кӱм кораҥден да чӱчӱжын шорыкшо-влакым йӱктен.11Вара Рахильым шупшалын да йӱкын шортын колтен.12«Мый тыйын ачатын родыжо, Ревеккан эргыже улам», – манын Иаков Рахильлан. Тудыжо ачаж деке куржын да тидын нерген каласен.13Шӱжаржын Иаков эргыже нерген колмеке, Лаван тудын ваштарешыже куржын лектын, тудым ӧндал шупшалын да пӧртышкыжӧ вӱден пуртен. Иаков мо лийме нерген чылажымат Лаванлан каласкален.14«Чынак, ме тый денет ик вӱр улына», – манын Лаван. Иаков тудын дене ик тылзым илен.15Лаван Иаковлан каласен: «Родо улметлан кӧра мыланем тый пашам яра ыштынет мо? Каласе, мо дене тылат тӱлаш?»16А Лаванын кок ӱдыржӧ улмаш: кугуракше – Лия лӱман, изиракше – Рахиль.17Лиян шинчаже начаррак лийын, а Рахиль капкыл денат, чурий денат мотор улмаш.18Иаков Рахильым йӧратен шынден, сандене Лаванлан тыге каласен: «Тыйын изирак Рахиль ӱдырет верчын мый тыланет шым ий пашам ышташ тӱҥалам».19«Иктаж-кӧлан весылан пуымешке, лучо тудым тыланет пуаш. Иле мый денем», – манын Лаван.20Рахиль верч Иаков шым ий пашам ыштен. Шым ийже тудлан икмыняр кечыла веле чучын, вет тудо Рахильым йӧратен.21Иаков Лаванлан каласен: «Мылам налшаш ӱдырем ынде пу, тудым марлан налаш жап шуын».22Лаван тудо верысе чыла еҥым ӱжын да сӱаным ыштен.23А кастене тудо Иаков деке Лия ӱдыржым пуртен, да Иаков тудын дене мален.24Лаван Зелфа лӱман шке тарзе ӱдырамашыжым Лия ӱдыржылан тарзылыкеш пуэн.25Эрдене Иаков Рахиль олмеш Лиям ужын. Иаков Лаванлан каласен: «Мом тый мый денем ыштенат? Рахиль верч огыл мо мый тыланет пашам ыштенам? Молан тый мыйым ондаленат?»26Лаванже манын: «Мемнан дене изирак ӱдырым кугурак ӱдыр деч ончыч марлан огыт пу.27Сӱан арнятым Лия дене эртарен колто. Вара тыланет ме весыжымат пуэна, но тый тидлан эше шым ий мыланем пашам ыштышаш улат».28Иаков тыгак ыштен, сӱан арняжым эртарен. Вара Лаван тудлан Рахиль ӱдыржымат ватылыкеш пуэн.29Лаван Рахиль ӱдыржылан Валла лӱман шке тарзе ӱдырамашыжым пуэн.30Иаков Рахиль денат мален. Рахильым тудо Лия деч утларак йӧратен. Иаков Лаван дене эше шым ий пашам ыштен.31Господь [Юмо] ужын: Иаков Лиям йӧратен огыл, сандене тудын авагудыжым почын, а Рахиль азам ыштен кертдыме лийын.32Лия мӱшкыраҥын да [Иаковлан] эргым ыштен. Тудлан Рувим лӱмым пуэн, вет тудо тыге манын: «Господь орлыкем ужын [да мылам эргым пуэн], ынде марием мыйым йӧраташ тӱҥалеш».33Лия адакат мӱшкыраҥын да [Иаковлан кокымшо] эргым ыштен. «Господь колын: мый йӧратыме омыл, сандене мыланем адак эргым пуэн», – манын тудо. Эргыжлан Симеон лӱмым пуэн.34Лия эше мӱшкыраҥын, адакат эргым ыштен да манын: «Ындыже марием мый декем шӱмаҥешак, вет мый тудлан кум эргым ыштенам». Садлан лӱмжымат пуымо: Левий .35Тиддеч вара Лия угыч мӱшкыраҥын да эше ик эргым ыштен. «Ынде мый Господьым моктем», – манын. Тидлан лийынак эргыжлан Иуда лӱмым пуэн. Тылеч вара Лия аза ыштымым чарнен.
Institute for Bible Translation, Finland