Тӱҥ20
1Авраам тушечын Кечывалвел мландыш каен. Тудо Кадес ден Сур коклаште верланен да ик жап Герарыште илен.2Авраам шке Сарра ватыже нерген еҥ-влаклан «тудо мыйын шӱжарем» манын ойлен. [Тиде олаште илыше-влак Авраамым ынышт пушт манын, «Сарра мыйын ватем» манын тудо ойлаш лӱдын.] Сандене Герарын Авимелех кугыжаже Саррам шкеж деке налаш еҥже-влакым колтен.3Йӱдым Авимелехлан омешыже Юмо кончен. Тудо каласен: «Тый налме ӱдырамашет верч колет, вет тудо марлан кайыше».4Авимелехше Саррам тӱкен огыл, сандене манын: «Господь! Тый [тидын нерген палыдыме да] титакдыме калыкымат пытарет мо вара?5”Сарра мыйын шӱжарем” манын, Авраам шкежак ойлен огыл мо? Да ӱдырамаш шкежат ”тудо мыйын изам” манын. Тидым мый титакдыме шӱм-чон да яндар кид дене ыштенам».6Юмо тудлан омешыже вашештен: «Палем, тый тидым титакдыме шӱм-чон дене ыштенат. Сандене Мый тыйым Шке ончылнем сулыкыш пурымо деч кученам – тылат ӱдырамаш деке тӱкнаш пуэн омыл.7Ватым марийжылан кызытак пӧртылтӧ: тудо вет пророк, тыйын верч йодын кумалеш, да тый илыше кодат. От пӧртылтӧ гын, пален лий: тый да пеленет илыше-влак чыланат коледа».8Авимелех эрдене эрак кынелын, чыла тарзыжым поген да омо ужмыжым каласен. Нунышт пеш чот лӱдыныт.9Авимелех Авраамым шкеж деке ӱжыктен да каласен: «Мом тый мемнан дене ыштенат? Могай осалым мый тылат ыштенам? Тый вет мыйым да уло кугыжанышем кугу языкыш пуртенат. Тый мый денем чын огыл ыштенат».10Вара ешарен: «Мом шонен тыге тый ыштенат?»11Авраам вашештен: «Тиде верыште Юмо деч лӱдын огыт иле да ватемлан верчын пуштыт шоненам.12Адакшым Сарра чынже денак мылам шӱжарем лиеш: тудо мыйын ачамын ӱдыржӧ, но авамын ӱдыржӧ огыл, да варажым мыйын ватем лийын.13Кунам Юмо мыйым ачамын суртшо гыч мӱндыр корныш тарватен колтен, мый ватемлан каласенам: ”Мылам тыгай поро пашам ыште: кеч-кушко миена гынат, мыйын нерген чыла вере тыге ойло: ’Тиде мыйын изам’”».14Тунам Авимелех Авраамлан [тӱжем сикль шийым ], тыгыде да шолдыра вольыкым, пӧръеҥ ден ӱдырамаш кул-влакым пуэн, Сарра ватыжым пӧртылтен.15Тудо каласен: «Ончылнет мыйын мландем. Кушто шонет, тушто иле».16А Сарралан тыге манын: «Изатлан мый тӱжем сикль шийым пуэнам, тиде тый денет пырля улшо-влак ончылно тыйын титакдыме улметым ончыкта. Тый чыныш лукмо улат».17Авраам Юмылан кумалын, да Юмо Авимелехын ватыжым, ӱдырамаш кулжо-влакым паремден, нуно адакат азам ышташ тӱҥалыныт.18Авраамын Сарра ватыже верч Господь Авимелехын суртыштыжо чыла ӱдырамашын авагудыштым петырен улмаш.
Institute for Bible Translation, Finland