Тӱҥ19
1Саде кок Суксет Содомышко кастене толын шуыныт. Лот тунам Содом капка воктене шинчен. Лот, нуным ужмеке, вашлияш манын, кынел шогалын да вуйжым мланде марте савен.2Вара манын: «Мыйын Озам-влак! Тарзыдан пӧртышкыжӧ пурыза да мален кайыза, йолдам мушса, а эрдене кынелыда да шкендан корныдам шуеда». Нунышт каласеныт: «Уке, ме уремыште малаш тӱҥалына».3Но Лот нуным сӧрвален ӱжын, сандене Суксо-влак тудын деке каеныт да пӧртышкыжӧ пуреныт. Лот нунылан сийым ямдылен, шергиндым кӱэштын, нуно кочкыныт.4Малаш вочмышт деч ончыч Содомысо пӧръеҥ калык, изижге-кугужге, чыла могыр гыч Лотын пӧртшым авырен налыныт.5Нуно Лотым ӱжыныт да йодыныт: «Кушто улыт тый декет йӱдлан малаш пурышо еҥ-влак? Лук нуным мемнан деке, ме нунын дене мален налына».6Лот тӱжваке лектын, омсажым почешыже тӱкылен7да каласен: «Иза-шольо-влак, осалым ида ыште.8Теве мыйын кок ӱдырем уло, нуно але пӧръеҥым пален налын огытыл. Лучо нуным тендан деке луктам, нунын дене мом шонеда, тудым ыштыза. Толшо еҥ-влакым гына ида тӱкӧ, нуно вет мыйын суртышкем толыныт».9Но погынышо-влак маныныт: «Кораҥ тышеч!» Эше ешареныт: «Ӧрдыж гыч толшо веле, а эше туныктылаш тӧча! Теве ынде тый денет нунын дечат ударак лиеш». Нуно Лот ӱмбаке кержалтыныт да омса деке, пудырташ шонен, лишемыныт.10Но саде кок пӧръеҥ, кидыштым шуен, Лотым шке декышт пӧртыш шупшыл пуртеныт да омсам петыреныт.11А омса вес велне улшо-влакым чылаштымат сокырым ыштеныт, иктыштат омсам кычал муын кертын огытыл.12Уна-влак Лотлан каласеныт: «Кӧ тыйын тыште эше уло? Веҥыч, эргыч, ӱдырет-влак – олаште тыйын кӧ гына уло, – чылаштымат тышеч лук.13Тиде верым ме пытарена. Тиде олаште илыше-влак шотышто Господь деке кугу вуйшиймаш шуын, да Господь мемнам олам пытараш колтен».14Лот ӱдыржӧ-влакын качышт деке миен да нунылан тыге каласен: «Тарваныза, тышеч кайыза: Господь тиде олам пытара». Но нунышт тудо мыскарам ышта манын шоненыт.15Ӱжара нӧлталтмеке, Суксо-влак Лотым вашкыкташ тӱҥалыныт: «Тарване, олан закондымылыкшо верч тылат колаш огыл манын, пеленет ватет ден кок ӱдыретым нал да тышеч кае».16Лот юватылынат, нине пӧръеҥ-влак [ – Суксо-влак –] Господьын поро кумылжылан кӧра тудым, ватыжым, ӱдыржӧ-влакым, кидышт гыч кучен, ола деч ӧрдыжкӧ вӱден луктыныт.17Ола ӧрдыжкӧ лукмеке, ик пӧръеҥже каласен: «Чонетым утаре, тышеч курж! Шеҥгеке савырнен ит ончал, тиде лапвереш нигушан ит шогал. Колаш огыл манын, курыкышко курж».18Но Лот нунылан каласен: «Уке, Озам!19Теве Тый тарзетлан поро кумылетым ончыктенат, моткоч кугу суапым мыланем ыштенат: Тый мыйын илышем утарен коденат. Но курык деке миен ом шукто, эҥгек мыйым поктен шуэш, да мый колем.20Теве лишне улшо тиде олашке каяш лиеш, тудо пеш изи. Ала тушко куржаш лиеш? Тыге [Тыйын полшымет дене] илыше кодам ыле».21Суксо Лотлан манын: «Тыланет кӧра мый тидымат ыштем: ойлымо олатым ом шалате.22Курж вашкерак тушко, утаралт. Вет тушко миен шумешкет Мый сомылем шуктен ом керт». Садлан тиде ола Сигор маналтын.23Лотын Сигорыш толын шумыж годым кече лектын улмаш.24Лач тунам Содом ден Гоморра ӱмбаке Господь кава гыч чӱкчыгишан тул йӱрым колтен.25Тыге нине ола-влакым, нунын йырысе уло лапверым, тиде олалаште илыше чыла еҥым, тыгак мландысе чыла кушкылым пытарен.26А Лотын ватыже шеҥгеке савырнен ончалын да шинчал меҥгыш савырнен.27Авраам эрден эрак кынелын да Господь ончылно шогымо верышкыже каен.28Тудо Содом ден Гоморра, нунын воктенысе лапвер велышке ончалын да ужын: мланде ӱмбач коҥга гыч лекмыла шикш нӧлталтын.29Лапверысе [чыла] олам пытарымыж годым Юмо Авраамым шарналтен да пытарышаш вер гыч Лотым луктын колтен, а Лотын ончыч илыме ола-влакшым шалатен.30Лот Сигор гыч каен да кок ӱдыржӧ дене пырля курык лоҥгаште илаш тӱҥалын. Сигорышто тудо илаш лӱдын, сандене курыкпомышышто илен, пеленже кок ӱдыржӧ лийын.31Икана акаже шӱжаржылан каласен: «Ачана мемнан шоҥго, да уло тӱнян йӱлаже почеш мемнан дене пӧръеҥ семын илен кертше тиде мландыште нигӧ уке.32Айда ачаланна йошкар аракам йӱктена да тудын дене мален лектына, тыге ачана деч тукымым шуен кертына».33Тиде йӱдым ӱдыр-влак ачаштлан аракам йӱктеныт, вара акаже пурен да шке ачаж дене [тиде йӱдым] мален лектын. Ачаже ӱдыржын кунам вочмыжым да кунам кынел кайымыжым шижын огыл.34Вес кечын акаже шӱжаржылан каласен: «Теве теҥгече мый ачам дене маленам. Тиде йӱдымат тудлан аракам йӱктена, да тый тудын деке пуро, мален лек, тыге ачана деч тукымым шуен кертына».35Тиде йӱдымат нуно ачаштлан аракам йӱктеныт, ынде шӱжарже пурен да шке ачаж дене мален лектын. Ӱдыржын кунам вочмыжым да кунам кынел кайымыжым ачаже шижын огыл.36Лотын кок ӱдыржат шке ачашт деч мӱшкыраҥыныт.37Акаже эргым ыштен да тудлан Моав лӱмым пуэн, [«тудо мыйын ачам деч» манын]. Тудо кызытсе моав калыкын кугезе ачаже улеш. 38Шӱжаржат эргым ыштен да тудлан Бен-Амми лӱмым пуэн, [«тудо мыйын тукымем деч» манын]. Тудо кызытсе аммон-влакын кугезе ачаже улеш.
Institute for Bible Translation, Finland