Тӱҥ16
1Сара, Аврамын ватыже, марийжылан шочшым ыштен огыл. Саран Агарь лӱман египет кул ӱдырамашыже лийын.2Сара Аврамлан каласен: «Господь мыланем йочам ышташ огеш пу. Мыйын кул ӱдырамашем деке пуро, ала тудын гоч мый шочшан лиям». Аврам Саран мутшым колыштын.3Аврамын Сара ватыже шке египет кулжым, Агарьым, Аврам марийжылан вате шотеш пуэн. Тиде Ханаан мландыште Аврамын лу ий илымекыже лийын.4Аврам Агарь деке пурен, да тудыжо мӱшкыраҥын. Мӱшкыраҥмыжым пален налмеке, Агарь озаватыжым шотлымым чарнен.5Сара Аврамлан каласен: «Мыйын ӧпкемлан тый титакан улат. Мый тыйын ӧндалтышышкет кул ӱдырамашем пуэнам, а тудыжо, мӱшкыраҥмыжым палымеке, мыйым шотлымыжым чарнен. Тек мемнан коклаште Господь судья лиеш».6Аврам Саралан каласен: «Тыйын кулет – тыйын кидыштет: тудын дене мом шонет, тудым ыште». Сара Агарьым шыгыремдылаш тӱҥалын. Тудыжо озаватыж деч куржын.7Господьын Суксыжо Агарьым ир мландыште, Сур деке наҥгайыше корно воктенысе памаш дене вашлийын.8[Господьын Суксыжо тудлан] каласен: «Агарь, Саран кулжо! Кушеч толынат да кушко кает?» Тудыжо каласен: «Мый Сара озаватем деч куржам».9Господьын Суксыжо каласен: «Озаватет деке пӧртыл да тудын мутшым колыштын иле».10Господьын Суксыжо Агарьлан эше каласен: «Тыйын тукыметым шукемденак шукемдем, нуно тунар шуко лийыт – шотлен от пытаре».11Господьын Суксыжо эше ешарен: «Тый мӱшкыран улат да эргым ыштет, тудлан Измаил лӱмым пуэт, вет Господь тыйын орланымет нерген колын. 12Эргыч ир осёл гай лиеш – тудо чылан ваштареш да чылан тудын ваштареш лийыт. Чыла родо-тукымжо дене тудын келшыдымаш лиеш».13Агарь тудлан ойлышо Господьым тыге лӱмден: «Мыйым ужшо Юмо». Вет тудо каласен: «Мый чынак тыште мыйым Ужшо Юмын тупшым ужым».14Садлан тиде памаш Беэр-лахай-рои маналтеш. Тудо Кадес ден Баред коклаште верланен.15Агарь Аврамлан эргым ыштен. Аврам тудлан, Агарь деч шочшо эргыжлан, Измаил лӱмым пуэн.16Агарьын Измаилым ыштымыж годым Аврамлан кандашле куд ий лийын.
Institute for Bible Translation, Finland