Тӱҥ15
1Тидын деч вара Аврамлан [йӱдым] кончымаш гочын Господьын шомакше лийын: «Ит лӱд, Аврам, Мый тыйын авыртышет улам, тыйым пеш кугу суап вуча».2Аврам каласен: «Господь Юмем! Мом Тый мыланем пуэт? Мый йочадыме улам. Мыйын чыла погем Дамаск гыч Елиезерлан кодеш».3Варажым Аврам манын: «Теве Тый мыланем шочшым пуэн отыл, садлан мыйын суртыштем шочшо тарзе погемлан наследник лиеш».4Тудлан Господьын шомакше лийын: «Тудо тыйын погетлан наследник ок лий, тыйын погетлан наследник тый дечетак шочшо лиеш».5Господь Аврамым тӱжваке луктын да каласен: «Ончал кавашке да, кертат гын, шӱдыр-влакым шотло». Вара ешарен: «Тыйын тукымет тунар шуко лиеш».6Аврам Господьлан ӱшанен‚ сандене Господь тудым чын ыштышылан шотлен.7Юмо тудлан каласен: «Мый Господь улам. Тиде мландым тыланет пуаш манын, Мый тыйым Халдейысе Ур гыч конденам».8Аврам манын: «Господь Юмем! Тиде мландын озаже лийшашем мый кушеч пален кертам?»9Господь тудлан каласен: «Мыланем тый кум ияш тунам, кум ияш казам, кум ияш тагам, кедым да самырык кӧгӧрченым кондо».10Аврам чыла тидым конден, нуным пелыгыч руалын ойырен да ик пелыжым вес пеле ваштареш пыштен. Кайык-влакым гына пелыгыч ыштен огыл.11Шӱшкылмӧ вольык ден кайык-влак ӱмбаке виля кочшо кайык-влак чоҥештен толыныт, но Аврам нуным поктен колтен.12Кече шичме жапыште Аврамым пич омо пызыралын, да тудым кугу лӱдмаш ден тӱп пычкемыш авалтеныт.13Аврамлан Господь каласен: «Пален шого: тыйын тукымет йот мландыште ӧрдыж еҥ лиеш, тудым кулыш савырат да нылшӱдӧ ий пызырен илаш тӱҥалыт.14Но нуным кул шотеш кучышо калыкланат Мый судым ыштем, тиддеч вара тукымет тудо мланде гыч кугу пого дене лектеш.15А тый вес тӱняш шке ача-кочат деке тыныс дене кает, сай кужу ӱмырым илымекет, тойымо лият.16Тукыметын нылымше йыжыҥже тышке пӧртылеш, вет аморрей калыкын осал пашам ыштыме чотшо эше темын огыл».17Кунам кече шинчын да пеш чот пычкемыш лийын, коҥга шикш ден тулйылме койыныт да пелыгыч руымо вольык кап кокла гыч эртен каеныт.18Тиде кечын Господь Аврам дене ойпидышым ыштен да каласен: «Тыйын тукыметлан Мый Египет чекысе йогын деч кугу Евфрат эҥер марте19кеней, кенезей, кедмоней,20хеттей, ферезей, рефаим,21аморрей, хананей, [евей,] гергесей да иевусей калык-влакын мландыштым пуэм».
Institute for Bible Translation, Finland