Езд9
1Чыла тидын деч вара мый декем вуйлатыше-влак толыныт да каласеныт: «Израиль калык, иерей ден левит-шамыч йот калык-влак деч – хананей, хеттей, ферезей, иевусей, аммон, моав, египтян да аморрей деч – да нунын йырнык йӱлашт деч ойырлен огытыл.2Нине калыкын ӱдырыштым нуно шкаланышт да эргыштлан марлан налыныт, тыге святой тукым тыште илыше калык-шамыч дене лугалтын. Тиде осал пашаште вуйлатыше ден он-влак икымше лийыныт».3Тидым колмеке, мый тувыр ден ӱмбал вургемем кушкедынам, ӱпем ден пондашем кӱрынам, вара тӱҥгылгышӧ гай шинченам.4Кӧ Израиль Юмын шомакше деч лӱдын илен, нуно чыланат плен гыч пӧртылшӧ-влакын тиде осал пашатлан кӧра мый декем погыненыт. А мый тушто кас надырым кондымо жап марте тӱҥгылгышӧ гай шинченам.5Кас надырым кондымо годым мый, кушкедме тувыр ден кушкедме ӱмбал вургеман, ойгырен шинчыме верем гыч кынелынам да, сукен шинчын, кидем Господь Юмем деке шуялтенам6да каласенам: «Мыйын Юмем! Вожылмем дене Тый декет шке чуриемат нӧлталаш ом тошт, мыйын Юмем! Вет осал пашана вуйна деч кӱшнӧ улыт, титакна кава дек шумеш шуыныт.7Ача-кочана-влакын илыме жапышт гыч тачысе кече марте титакна кугу. Сулыкланна верчын ме, кугыжа ден иерейна-влак йот элысе кугыжа-шамычын кидышкышт пуымо лийынна. Мемнам керде дене пытареныт, пленыш налыныт, агеныт да мыскыленыт. Тидыже таче кече мартеат шуйна.8Но кызыт кӱчык жаплан Господь Юмына мыланна шке порылыкшым ончыктен. Тудо мемнан кокла гыч икмыняржым илышым коден да шке святой верыштыже лияш пуэн. Мемнан Юмына шинчанам волгалтарен, кул улмына годым илыш шӱлышым пуэн.9Ме кул улына, но куллыкыштат Юмына мемнам коден огыл. Тудо мемнан деке Персий кугыжа-влакын шӱмыштым поремден: нуно мемнан чоннам арален коденыт, Юмынан шалатыме пӧртшым угыч чоҥаш эрыкым пуэныт, Иуда мланде ден Иерусалимыште мемнан ӱмбалне нунын аралтышышт лийын.10Мемнан Юмына, чыла тидын деч вара кызыт мом каласен кертына? Вет ме Тыйын кӱштымашет-влак деч кораҥынна,11нуным Тый шке пророк тарзет-шамыч гоч ойленат. Тый каласенат: ”Тендан сеҥен налаш кайыме мландыда ару огыл: тудо тусо калык-влакын йырныкышт дене шакшылыме, ик тӱр гыч вес тӱр марте йырныкышт дене темын.12Сандене шке ӱдырдам эргыштлан марлан ида пу, эргыланда нунын ӱдырыштым ида нал. Нине калыклан тыныс ден суапым кондаш манын, нимом ида ыште. Тунам те вияҥыда, тиде мландын эн сай саскажым кочкаш тӱҥалыда да тудым шке тукымланда курымеш кучен илашышт кодеда”.13Осал пашана, кугу титакна верч мемнан дене чыла мо лийме деч вара – вет Тый, Юмына, мемнам осал пашана почеш мут кучаш шогалтен отыл, Тый мемнан кокла гыч икмыняржым илышым коденат –14ме угычын Тыйын кӱштымашет-влакым ӧрдыжыш шӱкалына да йырнык йӱлам шуктышо нине калык дене родо лийына мо? Вет тунам Тыйын кугу шыдет ылыжеш, да Тый мемнам пӱтынек пытарет, утаралт кодшо-влак огыт лий!15Господь, Израильын Юмыжо! Тый чын ыштыше улат, вет таче кечылан ме илыше кодынна. Тыгай осалым ыштыме деч вара Тыйын ончылнет шогышаш огынал гынат, теве ме Тыйын ончылнет шогена».
Institute for Bible Translation, Finland