Иез42
1Вара тиде еҥ мыйым йӱдвел корно дене тӱжвал кудывечыш наҥгаен да леведышдыме кумдык да оралте ваштареш верланыше, йӱдвелне улшо пӧлем-влак деке конден.2Ты оралтыш йӱдвечын пуреныт, тудын кужытшо шӱдӧ кынергут, а лопкытшо витле кынергут лийын.3Тудо кӧргӧ кудывечысе коло кынергут лопкытан леведышдыме кумдык ден тӱжвал кудывечысе кӱм шарыман кӱвар ваштареш верланен да кум пачашан лийын, балкон-влак тушто икте-весышт ӱмбалне верланеныт.4Пӧлем-шамыч ончылно лу кынергут лопкытан да шӱдӧ кынергут кужытан коридор лийын. Пӧлем-влакын омсашт йӱдвелыш онченыт.5Кӱшыл пӧлем-шамыч аҥысыррак лийыныт, вет тушто коридор-влак ӱлыл ден кыдалаш пачашласе деч кугурак кумдыкым айленыт.6Нуно кум пачашыште верланеныт. Тушто кудывечысе гай меҥге-влак лийын огытыл, сандене пӧлем-шамыч ӱлыл гыч кыдалашыш, кыдалаш гыч кӱшылыш аҥысыремын кӱзеныт.7А тӱжвал кудывече могырым нине пӧлем-шамыч ончылно улшо саварын кужытшо витле кынергут лийын.8Вет тӱжвал кудывече тӱрыштӧ верланыше пӧлем-влакынат чумыр кужытышт витле кынергут лийын, а храм воктенысе пӧртын чумыр кужытшо шӱдӧ кынергутыш погынен.9Ӱлыл пӧлемлашке пурымо вер эрвел могырым лийын, тушкыжо тӱжвал кудывече гыч пуреныт.10Кудывечын кечывалвел могырыштыжо леведышдыме кумдык ден оралте ваштареш пӧлем-влак пырдыж кутынек верланеныт.11Нунын ончылно улшо коридор чыла шотыштат йӱдвелне улшо пӧлем-шамыч ончылнысо гаяк лийын – тыгаяк кужыт ден лопкытан, тыгаяк пурымо веран да кугытан.12Кечывалвелне улшо омса-влакат йӱдвелысе гаяк лийыныт. Пӧрт ончылно коридор лийын, тудын тӱрыштыжӧ – йӱдвелысе гаяк савар, а коридорын эрвел мучаштыже – пӧртыш пурымо вер.13Пӧръеҥ мыланем каласен: «Йӱдвелне да кечывалвелне улшо пӧлем-влак, кудышт храм воктенысе леведышдыме кумдык велыш ончат, святой улыт. Господь дек лишемше иерей-шамыч тушто поснак святой надырым кочкыт, тушко нуно поснак святой надыр-влакым пыштат: кинде надырым, сулык верч надырым, титак верч надырым. Тиде вер святой!14Кунам иерей-влак тушко пурат, служитлыме вургемыштым кудашмеке гына тушечын тӱжвал кудывечыш лектын кертыт, вет тиде вургемышт святой. Нуно вес вургемым чийышаш улыт, тидын деч вара гына калык деке лектын кертыт».15Храм кӧргым висен пытарымеке, тиде еҥ мыйым эрвел капка гоч луктын да йырым-йыр пырдыжын кужытшым висаш тӱҥалын.16Висыме пондо дене тудо эрвел могырым висен, тушто вичшӱдӧ кынергут лийын.17Вара йӱдвел могырым висен, тушто вичшӱдӧ кынергут лийын.18Кечывалвел могырым висен, тушто вичшӱдӧ кынергут лийын.19Тидын деч вара тудо касвел могырыш савырнен да висыме пондо дене вичшӱдӧ кынергутым висен луктын.20Тыге тудо храм йыр улшо пырдыжым чыла ныл могырымат висен. Кажне вел пырдыжын кужытшо вичшӱдӧ кынергут лийын. Тиде пырдыж святой верым святой огыл деч ойырен шоген.
Institute for Bible Translation, Finland