Иез29
1Луымшо ийын луымшо тылзыжын латкокымшо кечынже мылам Господьын шомакше лийын:2«Айдеме эрге! Чуриетым фараон дек, Египетын кугыжаж деке, савыре да тудын ваштареш, пӱтынь Египет ваштареш пророк шомакым ойло.3Каласе: ”Господь Юмо тыге ойла:Мый ӱмбакет толам,фараон, Египетын кугыжаже, кугу да шучко крокодил!Тый шке эҥер вӱдлаштет киет да ойлет:’Нил эҥер мыйын, тудым мый шкаланем ыштенам!’4Но Мый умшашкет эҥыримым пыштем,эҥеретын чыла колжым коваштышкет пижыктем,тыйым да коваштышкет пижше кол-влакым эҥер гыч луктам.5Мый тыйым ир мландыш кудалтем –тыйымат, эҥерлатын чыла колжымат.Чара верыш тый камвозат,нигӧ тыйым поген ок нал, ок кораҥде.Мый тыйым янлык ден кайык-влаклан кочкашышт пуэм.6Тунам Египетыште илыше-шамыч пален налыт:Мый Господь улам.Израиль калыклан тый каура омыж пондо гай лийынат.7Кунам израильтян-влак тиде пондым кидышт дене кученыт,тудо тодылалтын да коҥлайымалыштым шуралтен,кунам тудлан эҥертеныт,тудо пудырген да кыдалыштым сусыртен.8Сандене Господь Юмо тыге ойла: Мый тыйын ӱмбакет кердым колтем да еҥ-влак ден вольыкетым пытарем.9Египет еҥ илыдыме ир мландыш савырна, тунам пален налыт: Мый Господь улам. Тый ойленат: ’Нил эҥер мыйын, тудым мый шкаланем ыштенам’.10Тыге ойлыметлан Мый эҥерет ӱмбаке толам да Египет мландым Мигдол гыч Сиена марте, Эфиопий чек марте кукшо ир мландыш савырем.11Тудын гоч айдемын йолжо эртен ок кай, вольык тушто ок кошт – нылле ий тушто нигӧ илаш ок тӱҥал.12Мый Египетым пуста мланде коклаште улшо ир мландыш савырем, шалатыме ола-влак коклаште тудын олаже-влак нылле ий шалатыме шогаш тӱҥалыт. Мый египтян-шамычым калык-влак коклашке шалатем, тӱрлӧ эллашке пуалтен колтем”.13Господь Юмо тыге ойла: ”Нылле ий эртымеке, Мый шалатен колтымо египтян-шамычым вес калык-влак кокла гыч погем.14Мый нуным плен гыч пӧртылтем да угыч Пафросыш, шочмо мландышкышт, вераҥдем. Тушто нунын кугыжанышышт лушкыдо лиеш.15Кугыжаныш-шамыч коклаште тудо эн лушкыдо лиеш да моло калык ӱмбалне тетла ок нӧлталт. Мый тудым ӱлыкшемдем, да тудо ончыкшым моло калык дене озаланаш ок тӱҥал.16Египет тетла Израиль калыкын эҥертышыже ок лий. Египет дене мо лийын, тиде израиль эрге-шамычлан сулыкышт нерген шарныктымаш лиеш, вет нуно Египет деч полышым йодыныт. Тунам нуно пален налыт: Мый Господь Юмо улам”».17Коло шымше ийын икымше тылзыжын икымше кечынже мыланем Господьын шомакше лийын:18«Айдеме эрге! Навуходоносор, Вавилонын кугыжаже, Тир ваштареш кредалын, шке сарзывийжым улныктарен: сарзыже-влакын вуйышт чараҥын, вачышт нузылген пытен. Но тӧчымышт арам лийын – кугыжаланат, сарзывийжыланат Тир деч нимо логалын огыл.19Сандене Господь Юмо тыге ойла: Мый Навуходоносорлан, Вавилон кугыжалан, Египет мландым пуэм. Тудо Египетын поянлыкшым шупшын налеш, тудым ага, чыла поген налеш – тиде сарзывийжылан пашадар лиеш.20Тир ваштареш кредалмыжлан Мый тудлан пӧлек шотеш Египетым пуэм, вет тудын сарзывийже Мыланем тыршен, – ойла Господь Юмо. –21Тудо кечын Мый Израиль калыкын тӱкыжым куштем да тыйын умшатым почам, тый нунын коклаште ойлаш тӱҥалат. Тунам пален налыт: Мый Господь улам!»
Institute for Bible Translation, Finland