Иез16
1Мыланем Господьын шомакше лийын:2«Айдеме эрге! Иерусалимлан чыла йырнык пашажым луктын каласе!3Увертаре: ”Господь Юмо Иерусалимлан тыге ойла: Тыйын вожет, шочмо верет – Ханаан мландыште. Тыйын ачат – аморрей, ават – хеттей.4Тудо кечын, кунам тый шочынат, кылымдетым пӱчкын огытыл, вӱд дене мушкын да шинчал дене йыген огытыл, йолымбалеш пӱтыралын огытыл.5Чыла тидын гыч иктаж-можым тылат ышташ манын, нигӧ тыйым чаманен налын огыл. Шочмекет, тый дечет йырнен, тыйым пасушко луктын кудалтеныт.6Воктечет Мый эртен каенам да тыйым, вӱр коклаште почаҥшым, ужынам. Мый тылат каласенам: ’Вӱрет йога гынат, иле!’ Туге, Мый тылат каласенам: ’Вӱрет йога гынат, иле!’7Пасу кушкыл семын Мый тыйым куштенам. Тый кушкынат, кугу лийынат да пелед шогалынат: оҥпогет лӧзаҥын, ӱпет кушкын. Но тый чара лийынат, ӱмбалнет вургем лийын огыл.8Мый угыч воктечет эртен каенам, тыйым ончалынам да ужынам: тыланет йӧраташ жап толын шуын. Мый ӱмбакет вургем урвалтем шаралтенам да чаратым петыренам. Мый тылат товатмутым пуэнам да тый денет ойпидышым ыштенам, – ойла Господь Юмо, – да тый Мыйын лийынат.9Мый тыйым вӱд дене мушкынам, ӱмбачет вӱрым мушкын колтенам да олив ӱйым йыгенам.10Ӱмбакет тӱрлымӧ тувырым, йолышкет вичкыж коваште дене ыштыме сандальым чиктенам, вуйышкет чапле йытын шовычым пидынам да порсын вургем дене леведынам.11Мый тыйым алчан дене сӧрастаренам: кидышкет кидшолым чиктенам, шӱйышкет шерым сакалтенам.12Нерышкет колчам, пылышышкет кӧржым пижыктенам, вуйышкет чапле вуйшӱдышым пыштенам.13Ший-шӧртньӧ дене тый сӧрастарыме лийынат, вургеметше вичкыж йытын, порсын да тӱрлымӧ куэм дене ыштыме лийын. Тый эн сай шыдаҥ киндым, мӱй ден олив ӱйым кочкынат. Тый пеш мотор, кугыжанвате гай лийынат.14Мыйын тылат пуымо чап-сӧраллыклан кӧра тыйын моторлыкет тичмаш лийын, сандене тый калык-влак коклаште мотор улмет дене чапланенат, – ойла Господь Юмо.15Но тый шке моторлыкетлан инаненат да, чапет дене пайдаланен, яжарланаш тӱҥалынат. Шкендым кажне эртен кайышылан темленат да нунын дене кӱтленат.16Шкаланет кӱкшакасе кумалме верлам ыштенат, тушан тӱрлӧ тӱсан вургеметым шарен яжарланенат – тыгайже нигунам лийын огыл да ончыкыжым огеш лий.17Мыйын пӧлеклыме ший ден шӧртньӧ сӧрастарыш-влакым налын, тый шкаланет пӧръеҥ статуй-влакым ыштенат да нунын дене яжарланенат.18Тый нунылан тӱрлымӧ вургеметым чиктенат, ончылнышт Мыйын елей ден ладынем шынденат.19Мый кочкашет эн сай ложашым, олив ӱйым да мӱйым пуэнам, но тый чыла тидым нунылан тамлыпушан надыр шотеш конденат. Чылажат тыге лийын, – ойла Господь Юмо.20Мылам шочыктымо эргыч ден ӱдырет-шамычым тый саде шояк юмо-влаклан кочкашышт надыр шотеш конденат. Яжарланымет тылат ситен огыл мо?21Тый эше Мыйын йочам-влакым шӱшкылынат да нуным шояк юмо-влаклан тул надыр шотеш конденат!22Чыла тиде йырныкым ыштымет да яжарланымет годым тый йоча годсо жапетым шарналтен отыл – тунам тый чара, вургем деч посна лийынат, вӱр коклаште почаҥынат.23Ойго тыланет, ойго! – ойла Господь Юмо. – Чыла тиде осал пашат деч вара24тый шкаланет кумалме верлам чоҥенат, калык погынымо верлаште кӱкшака-влакым ыштенат.25Кажне корнывожышто кумалме кӱкшака-влакым ыштенат да, кажне эртен кайышылан йолетым торен возын, шке моторлыкетым намысленат, яжар пашатым шукемденат.26Тый Египет эрге-влак дене, кап кумылыштлан сутланыше пошкудет-шамыч дене, яжарланенат. Яжар пашат-влакым шукемден, Мыйын шыдем луктынат.27Тунам Мый ӱмбакет кидем нӧлталынам да тылат пуымо мландым иземденам. Мый тыйым тушман кидыш, филистим ӱдыр-влак кидыш, пуэнам, но шала койышет деч нунат йырненыт.28Ассирийын эргыже-влак денат тый яжарланенат да темын отыл. Тый нунын дене яжарланенат, но тиде тылат ситен огыл.29Яжар пашатым тый сатучо халдей мланде денат шукемденат, но тидын денат темын отыл.30Шӱм-чонетше сутланен ноен, – ойла Господь Юмо, – кунам тый чыла тидым вожылдымо яжар ӱдырамаш семын ыштылынат!31Кунам кажне корнывожышто кумалме верлам чоҥенат да еҥ погынымо верлаште кӱкшака-влакым ыштенат, тый яжар ӱдырамаш гай лийын отыл, вет тылат тӱлымылан тый тореш лийынат.32Лийынат тый марийым ондалыше вате гай, кӧ шке марийже олмеш йот калык пӧръеҥ-шамыч дене мала.33Яжар ӱдырамаш-влаклан оксам пуат, а тый пӧржмарий-шамычетлан шке тӱленат да, чыла могырым тый денет яжарланаш толышт манын, нуным окса дене савыренат.34Яжарланымет моло ӱдырамашын гай лийын огыл: тыйын почешет коштын огытыл, тыланет тӱлен огытыл, а тый шке тӱленат – тый нунын семын ыштен отыл!35Сандене колышт, яжар ӱдырамаш, Господьын шомакшым!36Тыге ойла Господь Юмо: Тый вожылде аташланенат, яжарланымет годым пӧржмарий ден йырнык шояк юмет-влак ончылно шкендым чараҥденат, нунылан эргыч-шамычым пуэнат, вӱрыштым йоктаренат.37Сандене Мый тыйын йӧратыме, тыгак ужмышудымо пӧржмарий-влакетым, кӧмыт дене ракатланенат, чылаштым погем. Мый нуным тыйын ваштареш чыла велым погем да нунын ончылно тыйым чараҥдем – тек намысле веретым ужыт.38Мый тыйым вес марий дене коштшо вате да еҥ пуштшо ӱдырамаш семын судитлем. Кугу шыдем да ушкалымашем дене Мый тыйым колымашлан пуэм.39Мый тыйым пӧржмарий-влакетын кидышкышт пуэм, нуно кумалме верлатым шалатат, ыштыме кӱкшакат-шамычым пытарат. Нуно ӱмбачет вургемым кушкед шуат, сӧрастарыш-влакетым шупшын налыт, тыйым чарам, вургем деч посна кодат.40Нуно тыйын ваштареш калык тӱшкам погат, ӱмбакет кӱм кышкат, тыйым керде дене ужашын руат,41пӧртетым тул дене йӱлалтат. Шуко ӱдырамашын шинча ончылнышт нуно тый денет судым ыштат. Яжарланыметлан Мый мучашым ыштем, пӧржмарий-влакетлан пӧлек пуэдыметым тый чарнет.42Тунам веле тыланет кугун сырымем пыта, ушкалыше шыдем лушка – Мый лыпланем да тетла ом шыдешке.43Йоча годсо кечылатым тый шарналтен отыл, шке пашат дене Мыйын шыдем луктынат. Сандене Мый чыла мом ыштыметлан мутым кучыктем, – ойла Господь Юмо, – вет тый чыла йырнык пашат деке эше яжарланымашым ешаренат.44Кажне, кӧ калыкмутым кучылтын ойла, тыйын нерген тыге каласа: ’Аваже могай, ӱдыржат тугаяк’.45Тый чынжымак шке аватын ӱдыржӧ улат, вет тудланат марийже ден йочаже-влак кӱлдымыш лектыныт. Тый ака-шӱжарет-шамычын акашт да шӱжарышт улат, нуныланат шке марий ден йочашт-влак кӱлдымыш лектыныт. Тендан авада – хеттей, ачада – аморрей.46Тыйын акат – Самарий, тудо шке ӱдыржӧ-влак дене тый дечет йӱдвелныла илен, шӱжарет – Содом, тудыжо шке ӱдыржӧ-влак дене тый дечет кечывалвелныла илен.47Но тылат нунын корнышт дене коштмо, йырнык пашаштым ыштыме шагал лийын – яжарлыкет дене тый нуным ончылтен каенат!48Шкем дене товатлем, – ойла Господь Юмо, – мом тый да ӱдырет-влак ыштенда, тудым Содом шӱжарет ден ӱдыржӧ-шамыч ыштен огытыл.49Содом шӱжарет ден ӱдыржӧ-влакын теве могай титакышт лийын: нуно кугешнен, азапланыде иленыт, нунын чылажат утымешке лийын, но йорло ден незерлан полшен огытыл.50Нуно кугешныше лийыныт, Мыйын ончылнем йырнык паша-влакым ыштеныт. Тидым ужмеке, Мый нуным Шкем деч кораҥденам.51А Самарий гын тыйын пел сулыкет-влакымат ыштен огыл. Йырнык пашат дене тый нуным ончылтен каенат. Тыйын мом ыштыметым ончаш гын, акат ден шӱжарет тый дечет чынрак ыштат!52Тиде тый намысыште лийшаш улат! Вет йырнык пашат-влак дене тый акат ден шӱжаретым ала-мыняр гынат чыныш луктынат. Сулыкет-влак нунын сулыкышт деч йыгыжгырак улыт, тый денет таҥастарымаште акат ден шӱжарет чынрак улыт. Вожыл, намыс дене леведалт, вет нуно тый дечет чынрак ыштышыла койыт!53Но Мый нунылан – Содом ден ӱдыржӧ-влаклан, Самарий ден ӱдыржӧ-влаклан – сай илышым пӧртылтем, нунын дене пырля тылатат пӧртылтем.54Тый намысыште лият да чыла мом ыштыметлан вожылмашыш пурет, тиде акат ден шӱжаретлан лыпландарымаш лиеш.55Нуно, Содом да Самарий, шке ӱдырышт-влак дене угыч йол ӱмбаке шогалыт, тыят шке ӱдырет-шамыч дене угыч йол ӱмбаке шогалат.56Чапыште улмет годым тый Содом шӱжаретым мыскылен ойлен отыл мо?57Тыйын осал пашат почылтмо марте тыге лийын. А ынде тый шкежат сирий ӱдыр-влак ден пошкудыжо-влаклан, тыгак филистим ӱдыр-шамычлан мыскылтышыш савырненат – чыла могырым тыйын нерген мыскылен ойлат!58Яжарланымаш ден йырнык пашатлан тый ынде мутым кучет, – ойла Господь Юмо.59Тыге ойла Господь Юмо: Мый тылат пашат почеш пӧртылтем, вет тый, товатмутым кӱлдымыш луктын, ойпидышым пудыртенат.60Но Мый тый денет самырыкет годым ыштыме ойпидышем шарналтем да тый денет ыштыме курымаш ойпидышым уэмдем.61Кеч тиде ойпидышлан ӱшанле лийын отыл, Мый акат-шӱжарет-влакым – тый дечет кугуракымат, изиракымат – налам да тыланет ӱдырлыкеш пуэм, тунам тый коштмо корнет нерген шарналтет да вожылат.62Тый денет ыштыме ойпидышем Мый уэмдем, да тый пален налат: Мый Господь улам.63Кунам Мый чыла титакетым кудалтем, тый чыла мом ыштыметым шарналтет да вожыл колтет, вожылмет дене ончыкыжым умшатымат почын от керт”, – ойла Господь Юмо».
Institute for Bible Translation, Finland