Иез15
1Мыланем Господьын шомакше лийын:2«Айдеме эрге! Мо дене виноград пушеҥге чыла тӱрлӧ пушеҥге деч сайрак, мо дене виноград укш чодырасе чыла пушеҥге деч сайрак?3Иктаж-мом ышташ манын, виноград пушеҥгым кучылтыт мо? Иктаж арверым сакалташ манын, тудын дене кеч сагыльым ыштат мо?4Теве тудым тулыш кудалтат: тул кок мучашыжымат йӱлалта, покшелжым когарта – тудо иктаж-молан йӧра мо?5Тудо тичмаш лиймыж годым нимогай арверлан йӧрен огыл гын, тул йӱлалтымеке да когартымеке, иктаж-молан йӧра мо?6Сандене Господь Юмо тыге ойла: Кузе чодырасе пушеҥге-влак дене пырля Мый виноград пум йӱлалташ пуэнам, туге Иерусалимыште илыше-влакымат пуэм.7Шке чурием Мый нунын ваштареш савырем. Ик тул гыч лектыт гын, нуным вес тул пытара. Кунам Мый чурием нунын ваштареш савырем, те пален налыда: Мый Господь улам.8Нунын Мый дечем кораҥмыштлан кӧра Мый тиде мландым пустаҥдем, – ойла Господь Юмо».
Institute for Bible Translation, Finland