Лекм4
1Моисей тыге вашештен: «Ала нуно мыланем огыт ӱшане да мутемым огыт колышт? Тыланет Господь кончен огыл манын кертыт. [Мом нунылан каласаш?]»2Господь йодын: «Мо тыйын кидыштет?» Тудыжо вашештен: «Пондо».3Господь каласен: «Тудым мландышке кудалте». Моисей пондым мландыш кудалтен, да тудыжо кишкыш савырнен. Моисей тудын деч чакнен.4Господь Моисейлан каласен: «Кидетым шуялте да кишкым почшо гыч кучо». Моисей кидшым шуялтен да кишкым [почшо гыч] кучен – кишке тудын кидыштыже пондышко савырнен.5«Господь, нунын ача-кочаштын Юмышт, Авраамын, Исаакын да Иаковын Юмышт, тылат чынжымак кончен манын ӱшанашышт тыге лиеш», – ойлен Господь.6Да Моисейлан эше кӱштен: «Кидетым помышышкет чыке». Тудо кидшым шке помышышкыжо чыкен. Кидшым луктын – кидше проказе чер дене лум гай ошо лийын.7Господь Моисейлан кидшым помышышкыжо уэш чыкаш кӱштен. Тудыжо кидшым адакат чыкен. Кидшым помышыж гыч луктын – кидше капысе коваштыж гаяк лийын.8«Нуно тыланет огыт ӱшане да икымше палдарыше палым шотыш огыт нал гын, кокымшыжлан ӱшанат.9Кок палыжланат огыт ӱшане да тыйын мутетым огыт колышт гын, Нил эҥер гыч вӱдым коштал нал да мландышке кышкал. Эҥер гыч налме вӱд мландыште вӱрышкӧ савырна».10Моисей Господьлан каласен: «О, Господь! Мый кутырен моштышо омыл: тыгай лийынам теҥгечат, ончыгечат да Тыйын шке тарзет дене кутырымекетат. Мый нелын ойлем да йылмем тӱкнылеш».11Господь каласен: «Кӧ айдемылан йылмым пуэн? Кӧ йылмыдымым але соҥгырам, ужшым але сокырым ышта? Мый, Господь [Юмо], огыл мо?12Тугеже, кай! Мый тый денет пырля лиям да мом тылат ойлыман – туныкташ тӱҥалам».13Моисей каласен: «О, Господь! Колто иктаж-кӧм весым».14Тунам Моисейлан Господьын шыдыже ылыж каен, Тудо каласен: «Тыйын Левий тукым гыч Аарон изат уке мо? Мый палем: тудо [тыйын олмешет] ойлен кертеш. Тудо тыйым вашлияш лектеш, тыйым ужмекше, куанен колта.15Тый тудлан ойлаш, [Мыйын] мутемым тудын йылмышкыже пышташ тӱҥалат. А ойлымыда годым Мый пеленда лиям, мом тыланда ыштыман – Мый туныктем.16Калыклан тыйын олмеш изат ойлаш тӱҥалеш. Тудо тыйын йылмет лиеш, а тый тудлан Юмо олмеш лият.17Кидышкет [кишкыш савырныше] тиде пондым нал: тудын полшымыж дене тый палдарыше пале-влакым ышташ тӱҥалат».18Моисей Иофор оньыжо деке пӧртылын да тудлан ойлен: «Мый тышеч кайынем, Египетыште улшо иза-шольо-влакем деке пӧртылнем. Нуно эше илат мо, ончалнем ыле». Иофор Моисейлан ойлен: «Кай тыныс дене». [Вет шуко жап эртымеке, Египет кугыжа колен улмаш.]19Мадиам мландыште Господь Моисейлан каласен: «Кае, Египетыш пӧртыл, кӧ тыйын чонетым кычалын – нуно чыланат колен пытеныт».20Моисей ватыжым, эргыж-влакым пырля налын, нуным осёл ӱмбак шынден да Египет мландыш каяш лектын, кидыштыже Юмын пондыжо лийын.21Господь Моисейлан каласен: «Кунам Египетыш пӧртылат, Мыйын тылат ышташ кӱштымӧ чыла ӧрыктарыше пашам фараон ончылно ыште. А Мый тудын шӱм-чонжым вустыкым ыштем, да тудо калыкым огеш колто.22Фараонлан каласе: ”[Еврей-влакын] Господь [Юмыжо] тыге ойла: Израиль – Мыйын эргым, Мыйын кугэргым.23Тыланет ойлем: колто Мыйын эргым Мыланем кумалаш. От колто гын, Мый тыйын ончыч шочшо эргычым пуштам”».24Корнышто йӱдым малыме годым тыге лийын: Моисейым Господь вашлийын да пуштнеже улмаш.25Тунам Сепфора, кӱ кӱзым налынат, эргыжын тарман мучашысе коваштыжым пӱчкын налын, тудын дене Моисейын йолышкыжо тӱкнен да каласен: «Тый вӱр гочын качем улат».26Господь Моисей деч кораҥ каен. Тунам Сепфора каласен: «Вӱр качем – пӱчмаш гочын».27Господь Ааронлан каласен: «Кай ир мландышке Моисейым вашлияш». Тудыжо каен, Юмын курыкшо дене Моисейым вашлийын да тудым шупшалын.28Моисей тудым колтышо Господьын чыла мом ойлымыжо да ышташ кӱштымӧ палдарыше палыже-влак нерген Ааронлан каласкален.29Моисей ден Аарон каеныт да Израиль эрге-влакын кугуракыштым погеныт.30Господьын Моисейлан мом ойлымыжым Аарон [нунылан] чыла каласен, а Моисей калык ончылно палдарыше пале-влакым ончыктен.31Калык нунылан ӱшанен. Господьын Израиль эрге-влакым ончалмыж да орланымыштым ужмыж нерген колмеке, нуно, сукалтен шинчын, вуйыштым савеныт.
Institute for Bible Translation, Finland