Лекм3
1Моисей шке Иофор оньыжын, мадиам иерейын, шорыкшым кӱтен. Икана тудо кӱтӱжым ир мландыш умбаке поктен наҥгаен да Юмын Хорив курыкшо дек шуын.2Иман вондер коклаште, тул йолкынышто, тудлан Господьын Суксыжо кончен. Моисей ужын: иман вондер тул дене йӱла, но йӱлен ок пыте.3Моисей шке семынже шоналтен: «Лишкырак мием да тиде ӧрыктарыше кончышым ончалам: вондер молан йӱлен ок пыте?»4Господь тудын ончалаш толмыжым ужын да вондер кокла гыч ӱжын: «Моисей! Моисей!» Тудыжо вашештен: «Мый тыште улам, [Господь]!»5Юмо каласен: «Тышке ит лишем, йолчиеметым кудаш, вет тыйын шогымо верет – святой мланде».6Вара манын: «Мый ачатын Юмыжо, Авраамын Юмыжо, Исаакын Юмыжо да Иаковын Юмыжо улам». Моисей чурийжым петырен, вет тудо Юмо ӱмбак ончалаш лӱдын.7Господь [Моисейлан] каласен: «Мый калыкемын Египетыште йӧсланымыжым ужым, тудым индырыше-влаклан кӧра йӧсын кычкырымыжым кольым. Мый тудын орлыкшым палем.8Мый шке калыкем египтян кид гыч утараш да тиде мланде гыч шӧр да мӱй йогыман сай, кумда мландышке – хананей, хеттей, аморрей, ферезей, [гергесей,] евей да иевусей калык-влакын мландышкышт – наҥгаяш воленам.9Израиль эрге-влакын йӧсын кычкырымышт Мый декем шуын, да Мый египтян-влакын нуным чот шыгыремдылмыштым ужам.10Сандене кай, Мый тыйым фараон деке, [Египетын кугыжаж деке,] колтем: Мыйын калыкемым, Израиль эрге-влакым, Египет гыч лук».11Моисей Юмылан каласен: «Фараон деке, [Египетын кугыжаж деке,] каяш да Египет гыч Израильын эргыже-влакым лукташ мый кӧ улам?»12Юмо каласен: «Мый тый денет пырля лиям. Тыйым колтымем ончыкташ теве тыланет пале: кунам [Мыйын] калыкем Египет гыч луктат, те тиде курыкышто Юмылан кумалыда».13Моисей Юмылан каласен: «Теве мый Израиль эрге-влак деке миемат, ача-кочада-влакын Юмышт мыйым тендан деке колтен манам. А нуно мый дечем ”Кузе Тудын лӱмжӧ?” манын йодыт гын? Тунам мом каласем?»14Юмо Моисейлан вашештен: «Мый Тудо Улам, Кӧ Мый Улам». Да ешарен: «Израиль эрге-влаклан тыге ойло: тендан деке мыйым Колтышын лӱмжӧ – ”Мый Улам” [Яхве]».15Юмо Моисейлан эше каласен: «Израиль эрге-влаклан тыге ойло: тендан деке мыйым Господь, ача-кочадан Юмышт – Авраамын Юмыжо, Исаакын Юмыжо да Иаковын Юмыжо – колтен. Курым-курымешлан тиде Мыйын лӱмем, тек Мыйым тукым гыч тукымыш тыге ӱжын илат.16Кае, Израиль [эрге-влакын] кугуракыштым пого да нунылан каласе: ”Мыланем Господь, тендан ача-кочадан Юмышт – Авраамын, Исаакын да Иаковын Юмышт – кончен. Тудо каласен: ’Мый тендам эскеренам да тендан дене Египетыште мо ышталтеш – чыла ужынам.17Мый тендам Египетысе пызырымаш гыч хананей, хеттей, аморрей, ферезей, [гергесей,] евей да иевусей калык-влакын шӧр да мӱй йогыман мландышкышт наҥгаем манын ойленам’”.18Нуно тыйын мутетым колыштыт. Тый да Израиль калыкын кугуракше-влак [фараон деке,] Египетын кугыжаж деке, каеда да тудлан каласеда: ”Господь, еврей-влакын Юмышт, мемнам ӱжын. Господьлан, шкенан Юмыланна, надырым кондаш тый ир мландыш, кум кечаш корныш, мемнам колто”.19Но Мый палем, виян кид дене ӧкымлаш огыл гын, [фараон,] Египетын кугыжаже, тендам огеш колто.20Мый шкемын кидем шуялтем да Египет калыклан, тӱрлӧ ӧрыктарыше пашам ончыктен, эҥгекым кондем. Тидын деч вара фараон тендам колта.21Мый египет калык могырым тендан деке поро кумылым шочыктем. Кунам тышеч каеда, те яра кид дене огыда кай.22Кажне еврей ӱдырамаш шке пошкудыжо да тудын пӧртыштыжӧ илыше моло ӱдырамаш деч ший ден шӧртньӧ ӱзгарым, вургемым йодын налеш, да те эргыда ден ӱдырдам чиктеда. Тыге те египтян-влакым нимо деч посна кодеда».
Institute for Bible Translation, Finland