Лекм36
1Святой верлан мо кӱлешым чылажымат Господь кӱштымӧ семынак ышташ манын, Господь деч усталыкым да уш-акылым налше Веселеил ден Аголиав да чыла моло уста еҥ-влак пашалан пижыныт.2Веселеил ден Аголиавым да чыла моло мастар еҥым, кӧлан Господь уш-акылым пуэн – пашам ышташ кумылан-влакым – Моисей шкеж деке ӱжын.3Святой верлан мо кӱлешым ышташлан израиль калыкын чыла мом кондымыжым нуно Моисей деч налыныт. А шке кумылын пуымо пӧлекым калык тудын деке кажне эрдене эшеат конден шоген.4Тунам святой верлан мо кӱлешым ыштыше мастар-влак, шке пашаштым коден, Моисей деке толыныт5да тудлан каласеныт: «Калык Господьын ышташ кӱштымӧ пашалан кунар кӱлмӧ деч утым конда».6Тунам станыште Моисейын кӱштымыжым увертареныт: пӧръеҥат, ӱдырамашат святой верлан тетла нимомат ыштен кондышаш огытыл. Тыге калык кондымыжым чарнен.7Мо кондымышт чыла ыштышаш пашалан ситен, эсогыл утенат кодын.8Скинийым ыштыше мастар-влак чапле йытын шӱртӧ дене да шемалге-канде, шемалге-йошкар, йошкар меж шӱртӧ дене лу куэмым ыштеныт да ӱмбаланышт херувим-влакым устан тӱрленыт.9Кажне куэмын кутышыжо коло кандаш кынергут, а лопкытшо ныл кынергут лийын. Чыла куэм икгай кугытан лийын.10Вич куэмым ваш ушеныт, тыгак вес вич куэмым ваш ушеныт.11Ушымо икымше куэмын ик тӱрешыже, тудын вес куэм дене ушалтме верыште, шемалге-канде тӱсан оҥго-влакым ыштеныт. Ушымо вес куэм тӱрешат, икымшыж дене ушашлан, тыгаяк оҥго-влакым ыштеныт.12Ушымо кок куэмын тӱрыштышт, икте-весышт дене ушалтме верыште, витле оҥгым ыштеныт. Нине оҥго-влак икте-весе ваштареш лийыныт.13Витле шӧртньӧ руалтышым ыштен, нунын дене кок куэмым икте-весышт деке ушеныт. Тыге скиний ик тичмаш лийын.14Вара скинийым леведаш каза пун дене латик леведышым ыштеныт.15Кажне леведышын кутышыжо кумло кынергут, а лопкытшо ныл кынергут лийын. Латик леведыш икгай лийын.16Вич тыгай леведышым посна ушеныт, тыгак вес кудытым посна ушеныт.17Ушымо ик леведышын тӱрешыже, вес леведыш дене ушымо верыште, витле оҥгым ыштеныт. Тыгак вес леведыш тӱрешат ушымо верыште витле оҥгым ыштеныт.18Леведышым ик тичмашым ышташ манын, витле той руалтышым ыштеныт.19Скинийлан тыгак йошкар тӱсан тага коваште гыч ыштыме ӱмбал леведышым да тудым леведашлан чапле вичкыж коваште гыч эше вес леведышым ыштеныт.20Скинийлан брус-влакым акаций дене ыштеныт.21Кажне брусын кутышыжо лу кынергут, а лопкытшо ик кынергутат пеле лийын.22Кажне брус мучаште икте-весе воктене кок сарт гыч лийын. Скинийын чыла брусшо дене тыге ыштеныт.23Скинийын кечывалвел могыржылан коло тыгай брусым ямдыленыт,24нунылан нылле ший негызым, кажне брус йымаке тудын кок сартшылан кок негызым ыштеныт.25Тыгак скинийын вес – йӱдвел – могыржыланат коло брусым ямдыленыт,26нунылан нылле ший негызым ыштеныт, кажне брус йымаке – кок негыз дене.27Скинийын шеҥгел – касвел – могыржылан куд брусым,28тыгак тудын кок лукшылан кок брусым ыштеныт.29Нуно ӱлнӧ ушымо лийыныт да кӱшнӧ ик колча дене ушалтыныт. Лукысо кок брусат тыгаяк лийыныт.30Чылаже кандаш брус лийын, ший негыз – латкудыт: кажне брус йымалне – кок негыз дене.31Тидын деч вара акаций дене вара-влакым ыштеныт: визытым – скинийын ик велысе брус-влаклан,32визытым вес могырысо брус-влаклан да вич варам скинийын шеҥгел – касвел – могырысо брус-влаклан.33Эше покшел варам ыштеныт, тудыжо скинийын ик мучаш гычше вес мучашке брус-влак покшечын эртен.34Брус-влакым шӧртньӧ дене комыжленыт. Варам чыкыме колча-влакым шӧртньӧ дене ыштеныт, а вара-влакым шӧртньӧ дене комыжленыт.35Пӱрдышым шемалге-канде, шемалге-йошкар, йошкар меж да чапле йытын шӱртӧ дене ыштеныт, тушан херувим-влакым устан тӱрленыт.36Тиде пӱрдышлан акаций дене ныл меҥгым ыштеныт, нуным шӧртньӧ дене комыжленыт. Меҥге-влаклан тыгак шӧртньӧ руалтыш-влакым ыштеныт да ныл ший негызым веленыт.37Скинийыш пурымо верым петырашлан шемалге-канде, шемалге-йошкар, йошкар меж да чапле йытын шӱртӧ дене тӱрлыман пӱрдышым ыштеныт.38Тиде пӱрдышлан руалтышан вич меҥгым ыштеныт. Меҥге вуй ден кылдышыштым шӧртньӧ дене комыжленыт да вич той негызым веленыт.
Institute for Bible Translation, Finland