Лекм35
1Моисей уло израиль калыкым поген да нунылан каласен: «Господь теве мом ышташ кӱштен:2куд кече пашам ыштыза, а шымше кече тек тендан святой шуматкече, Господьлан ойырымо каныш кече, лиеш. Тиде кечын пашам ыштыше кажне еҥ пытарыме лийшаш.3Шуматкечын ик илемыштыдат тулым ида ылыжте. [Мый Господь улам.]»4Моисей уло израиль калыклан каласен: «Теве мом Господь кӱштен:5Господьлан пӧлекым погыза. Тек кажныже, кӧн кумылжо уло, Господьлан пӧлекым пуа: шӧртньым, шийым, тойым,6шемалге-канде, шемалге-йошкар да йошкар тӱсан межым, [чапле] йытын шӱртым да каза пуным,7йошкар тӱсан тага коваштым, чапле вичкыж коваштым, акацийым,8лампылан олив ӱйым, елейлан да тамлыпушым лукшо тӱтыртышлан аромат-влакым,9ефод ден оҥсакышыш пижыкташ ониксым да моло шергакан кӱм.10Тек тендан кокла гыч кажне уста еҥ толеш да Господьын чыла кӱштымыжым ышта:11скинийым, тудын леведышыжым, леведыш ӱмбалысе вес леведышыжым, руалтыш, брус, вара, меҥге ден меҥге негыз-влакым,12шондыкым, тудын кок варажым, комдышыжым да тудын ончылно кечыше пӱрдышым, [кудывече пӱрдыш ден меҥгыже-влакым, смарагд кӱ-влакым, фимиамым да елейым,]13ӱстелым, тудын кок варажым, ӱстел пелен кучылтмо чыла арверым, надыр киндым,14волгалтарашлан светильникым да тудын пелен кучылтмо чыла ӱзгарым, лампаде-влакым, волгалтарашлан олив ӱйым,15тӱтырымӧ жертвенникым, тудын кок варажым, елейым, тамлыпушан тӱтыртышым, скинийыш пурымо верлан пӱрдышым,16надыр йӱлалтыме жертвенникым да тудлан той решоткам, кок варам, жертвенник пелен кучылтмо чыла ӱзгарым, чаным да тудым шындыме негызым,17кудывече пӱрдыш-влакым, нунын меҥге ден негызыштым, кудывечыш пурымаште пӱрдышым,18скиний ден кудывечылан кошар пашкар-влакым, нунылан кандырам,19святой верыште служитлашлан вургемым – иерей Ааронлан святой вургемым, тыгак эргыж-влаклан служитлышаш вургемым».20Вара уло израиль калык Моисей деч каен.21Кӧн тидлан шӱмжӧ шупшын, кӧн тидлан чонжо кумылан лийын – чылан толыныт. Юмо дене вашлийме омашым, тушто мо кӱлешым да святой вургемым ышташ манын, нуно Господьлан надыр пӧлекым конденыт.22Кӧн кумылжо лийын, чыланат толыныт – пӧръеҥат, ӱдырамашат – да тӱрлӧ шӧртньӧ сӧрастарышым конденыт: шыркамам, кӧржым, шергашым, оҥ шинчырым. Нуно шке шӧртньыштым Господьлан пӧлек семын пуэныт.23Кӧн шемалге-канде, шемалге-йошкар да йошкар тӱсан межше, йытын шӱртыжӧ, каза пунжо, йошкар тӱсан тага коваштыже да чапле вичкыж коваштыже лийын – кажныже чыла тидым конден.24Кӧ надырлан шийым але тойым конден, тидым Господьлан пӧлеклен. Кӧн акацийже лийын – скинийым чоҥаш конден.25Чыла уста ӱдырамаш-влак шке кидышт дене шемалге-канде, шемалге-йошкар да йошкар тӱсан меж шӱртым, йытын шӱртым шӱдыреныт да Господьлан конденыт.26Чыла ӱдырамаш, кӧн кумылжо лийын да шӱдырен моштен, каза пуным шӱдырен.27Калык вуйлатыше-влак ефод ден оҥсакышыш пижыкташ ониксым да моло шергакан кӱм,28тыгак светильниклан, елей ден тӱтыртышлан олив ӱйым да тамлыпушым лукшо наста-влакым конденыт.29Кажне израиль пӧръеҥ ден ӱдырамаш, кӧмыт Господьын Моисей гоч кӱштымӧ пашажлан пуаш шоненыт, шке кумылын Господьлан конденыт.30Моисей израиль калыклан каласен: «Палыза, Господь Иуда тукым гыч Хур эрге Урийын Веселеил эргыжым ойырен налын.31Господь тудым Юмын Шӱлыш дене темен, тудлан уш-акылым, умылымаш ден шинчымашым, тӱрлӧ пашалан усталыкым пуэн:32шӧртньӧ, ший да той дене тӱрлым ыштен мошташ,33кӱм пӱчкедаш да тудым кӱлеш верыш пуртен шындаш, пу ӱзгарым пӱчкын лукташ да моло тӱрлӧ мастар пашам ышташ.34Господь Веселеиллан да Дан тукым гыч улшо Ахисамах эрге Аголиавлан весе-влакым туныктен моштымашым пуэн.35[Святой верлан] пӱчкедыме да устан куымо тӱрлӧ кидпашам ышташ, шемалге-канде, шемалге-йошкар, йошкар меж да йытын шӱртӧ дене тӱрлен куаш мастарлыкым, тӱрлӧ вынерым куаш, чыла кӱлеш пашам ышташ Господь нунылан усталыкым пуэн».
Institute for Bible Translation, Finland