Лекм30
1Тамлыпушым йӱлалтен тӱтыраш жертвенникым акаций дене ыште.2Тудо ныл лукан лийшаш: кутышыжо – кынергут, лопкытшо – кынергут, а кӱкшытшӧ – кок кынергут. Тушто улшо тӱкӧ-влак жертвенник дене ик тичмаш лийышт.3Тудым яндар шӧртньӧ дене комыжло – ӱмбалжымат, чыла могыржымат, тӱкӧ-влакшымат. Жертвенник йыр шӧртньӧ ваям колто.4Вая йымалне кок тӱреш [яндар] шӧртньӧ дене кок колчам ыште, нуно жертвенникын кок могырыштыжо лийышт. Жертвенникым нумалме годым тушко кок варам чыкат.5Вара-влакым акаций дене ыште да шӧртньӧ дене комыжло.6Тиде жертвенникым ойпидыш шондык ончылно кечыше пӱрдыш ончылан – шондык комдыш ваштареш – шогалте. Комдыш ӱмбалне Мый тыланет кончаш тӱҥалам.7Тиде жертвенникыште Аарон тамлыпушым йӱлалтен тӱтыраш тӱҥалеш. Кажне эрдене лампаде-влакым тӧрлатымыж годым,8тыгак кастене нуным чӱктымыж годым Аарон тиде тамлыпушым тӱтыраш тӱҥалеш. Тиде тӱтырымашым Господь ончылно тукым гыч тукымыш эре шуктен шогыман.9Тиде жертвенникыште нимогай вес тӱтыртышым, йӱлалтен пуымашым да кинде надырым ида кондо. Йошкар арака надырым тушто ида йоктаре.10Жертвенникын тӱкыжӧ-влакым эрныктыме йӱлам Аарон идалыклан ик гана шукташ тӱҥалеш. Сулык верч кондымо надыр вольыкын вӱржӧ дене жертвенникым идалыклан ик гана тукым гыч тукымыш эрныктен шогыман. Тудо – Господьын чот святой жертвенникше».11Господь Моисейлан каласен:12«Кунам израиль эрге-влакым шотлаш тӱҥалат, чотым тергыме годым тек кажныже шке чонжым сулен налашлан Господьлан акым пуа. Шотлен лекмыштлан тунам нуным нимогай орлык ок тӱкӧ.13Шотлымашке пурышо кажне еҥ пел сикль шийым пуышаш. Тудым святой сикль дене висыман: ик сикльыш коло гера пура. Господьлан пуышаш пӧлек пел сикль лийшаш.14Шотлымашке пурышо коло ияш деч кугурак ийготан кажне еҥ Господьлан ты пӧлекым тӱлышаш.15Шке чондам сулен налаш манын, поян еҥ Господьлан пел сикль деч шуко огыл, а йорло пел сикль деч шагал огыл пуышаш.16Израиль калыкын сулымаш шийыштым нал да Юмо дене вашлийме омашыште служитлыме пашалан кучылт. Тиде ший Господь ончылно тендан чондам сулен налме нерген израиль калыклан шарныктыш лиеш».17Господь Моисейлан каласен:18«Мушкылташ той чаным ыште. Тудым шындыме негызат той дене ыштыме лийже. Ты чаным Юмо дене вашлийме омаш ден жертвенник коклаш шынде да тушко вӱдым теме.19Тек Аарон ден эргыже-влак тушан кид-йолыштым мушкыт.20Колаш огыл манын, тек нуно Юмо дене вашлийме омашыш пурымышт деч ончыч вӱд дене мушкылтыт. Господьлан служитлаш да Тудлан надырым пуаш манын, жертвенник деке лишемме деч ончыч21тек нуно, колаш огыл манын, кид-йолыштым вӱд дене мушкыт. Тиде нунылан, Аарон ден тудын тукымжылан, курым-курымешлан тукым гыч тукымыш шуктен шогышаш закон лиеш».22Господь Моисейлан каласен:23«Нал эн сай тамлыпушым лукшо наста-влакым: вишкыде смирнам – вичшӱдӧ сикльым, тамлыпушан корицым кок пачаш шагалрак – кокшӱдӧ витлым, тамлыпушан омыжым – кокшӱдӧ витлым,24кассийым – вичшӱдӧ сикльым, чыла тидым святой сикль дене висе, да олив ӱйым – ик гиным.25Тамлыпушан ӱйым ыштыше мастар семын чыла тидым йӧрен, святой шӱрымашлан миром ыште. Тиде – святой шӱрымашлан миро.26Тудын дене Юмо дене вашлийме омашым да [тудын] ойпидыш шондыкшым,27ӱстелым да тудын пелен кучылтмо чыла арверым, светильникым да тудын пелен кучылтмо чыла ӱзгарым, тӱтырымӧ жертвенникым,28надыр йӱлалтыме жертвенникым да тудын пелен кучылтмо ӱзгарым, чаным да тудым шындыме негызым шӱрӧ29да святитле. Тунам чыла тиде чот святой лиеш. Мо нунын дек тӱкна – чылажат святой лиеш.30Мыйын иерей-влакем лийышт манын, Аарон ден эргыж-влакымат шӱрӧ да святитле.31А израиль эрге-влаклан каласе: тиде – Мыйын святой шӱрымашлан миро, тудо тукым гыч тукымыш кучылталташ тӱҥалеш.32Моло еҥ-влакым тудын дене шӱрыман огыл. Тыгай вартышым ямдылен, [шкаланда] миром ида ыште. Тудо – святой, тудым святойлан шотлыза!33Кӧ тудын гайым ышта але тудын дене ӧрдыжъеҥым шӱра, тыгай еҥ шке калыкше кокла гыч кораҥдыме лийшаш».34Господь Моисейлан каласен: «Нал тамле пушым лукшо стактым, онихым, тамле пушан халваным да яндар ладыным – чылажымат иктӧр нал.35Тамлыпушан ӱйым ыштыше мастар семын чыла тидым йӧрен, тамлыпушым лукшо тӱтыртышым ямдыле. Тек тудо шинчалтыме да яндар, святой лиеш.36Тиде тӱтыртышым шурен тыгыдемде да Юмо дене вашлийме омашысе ойпидыш шондык ончылан пыште. Тушто Мый тыланет кончаш тӱҥалам. Тиде тӱтыртышым чот святойлан шотлыза.37Тыгай ужаш гыч шогышо тӱтыртышым шкаланда ида ыште. Тудо Господьлан святитлыме лийже.38Кӧ тыгайымак тӱтыраш манын шкаланже ышта гын, тек тудо шке калыкше кокла гыч кораҥдыме лиеш».
Institute for Bible Translation, Finland