Лекм16
1Израиль эрге-влакын чыла тӱшкашт Елим гыч тарванен каен да Елим ден Синай коклаште верланыше Син манме ир мландыш толын шуын. Тидыже Египет гыч лекмышт деч вара кокымшо тылзын латвизымше кечынже лийын.2Ир мландыште нуно Моисей ден Ааронлан ӧпкелаш тӱҥалыныт.3Израиль эрге-влак нунылан ойленыт: «Эх, Господьын кидше деч Египет мландыштак колышаш ыле! Тушто ме шыл под воктене шинченна да киндым теммеш кочкынна! Вет те мемнам чыланнам тиде ир мландыш шужен колаш конденда».4Господь Моисейлан каласен: «Мый тыланда киндым кава гыч йӱр семын колтем. Калык тек лектеш да кажне кечын, кунаре ик кечылан кӱлеш, тунаре пога. Тыге Мый тудым тергем: Мыйын кӱштымем шукта але уке.5А кунам кудымшо кечын мом погымышт гыч кочкышым ямдылат, тудо моло кече дене таҥастарымаште кок пачаш шукырак лиеш».6Моисей ден Аарон чыла Израиль калык [тӱшкалан] каласеныт: «Кастене те пален налыда: Египет мланде гыч тендам Господь луктын.7А эрдене те Господьын чапшым ужыда, вет Тудо Шкеж ваштареш ойлымо ӧпке мутдам колын. А меже кӧ улына, молан мыланнаже ӧпкелаш?»8Моисей каласен: «Господь тыланда кастене шылым пукша, а эрдене – теммешкыда киндым. Вет Господь Тудын ваштареш ойлымо ӧпке мутдам колын. А ме кӧ улына? Тендан ӧпке мутда мемнан ваштареш огыл, а Господь ваштареш».9Моисей Ааронлан каласен: «Тый чыла Израиль калык тӱшкалан каласе: ”Господь ончылан шогалза, вет Тудо тендан ӧпке мутдам колын”».10Ааронын уло Израиль калык тӱшкалан ойлымыж годым нуно ир мланде велыш ончалыныт: пыл ораште Господьын чапше кончен.11Господь Моисейлан каласен:12«Мый Израиль эрге-влакын ӧпке мутыштым колынам. Нунылан каласе: кастене шылым кочкаш тӱҥалыда, а эрдене – теммешкыда киндым. Тунам те пален налыда: Мый Господь, тендан Юмыда, улам».13Кастене пулдырчо-влак чоҥештен толыныт, да уло стан нунын дене темын, а эрдене тиде вер йырым-йыр лупс возын.14Лупс шулен пытен, да ир мландым ала-мо тыгыде шӱраш гай, мландымбалысе покшым гай тыгыде, леведын.15Израиль эрге-влак тидым ужыныт да ваш-ваш йодыштыныт: «Мо тиде тыгай?» Мо тиде – нуно пален огытыл. Моисей нунылан каласен: «Тиде Господьын тыланда кочкаш пуымо киндыже.16Теве мом кӱштен Господь: кажне кӧ кунар кочкеш – тунар погыза, кажне еҥлан ик гомор дене, мыняр еҥ омашыште ила – тунар погыза».17Израиль эрге-влак тыгак ыштеныт: кӧ шукырак, кӧ шагалрак поген.18Гомор дене висеныт: кӧ шуко поген – утыжо лийын огыл, кӧ шагал поген – тудынат ситен. Кӧ мыняр кочкеш, кажныже тунарак поген.19Моисей нунылан каласен: «Эр марте нигӧат нимом ынже кодо».20Но Моисейым чылан колыштын огытыл, южо еҥ кочкышым эр марте коден. Туштыжо шукш налын да ӱпшаш тӱҥалын. Нунылан Моисей шыдешкен.21Кӧн мыняр кочмыжым шотыш налын, кочкышым эрдене погеныт. Кунам кече ырыкташ тӱҥалын, тудо шулен.22Кудымшо кечын киндым кок пачаш шукырак погеныт, кажне еҥлан – кок гомор дене. Моисей деке калык вуйлатыше-влак чыланат толыныт да тидын нерген увертареныт.23Тудо нунылан каласен: «Господь теве мом каласен: эрла – каныш кече, Господьын святой шуматкечыже. Мом кӱкташ кӱлеш – кӱктыза, мом шолташ кӱлеш – таче шолтыза, а мо кодеш – ӧрдыжкӧ пыштыза да эр марте аралыза».24Моисейын кӱштымыж семынак нуно мо кодшыжым эр марте ӧрдыжкӧ пыштеныт. Тудыжо ӱпшаш тӱҥалын огыл, шукшаҥынат огыл.25Моисей каласен: «Тидым таче кочса, вет таче Господьын шуматкечыже, таче те кочкышым огыда му.26Те тудым куд кече погыза, а шымше кече – шуматкече, ты кечын тудо огеш лий».27Калык кокла гыч южышт шымше кечынат погаш лектыныт, но кочкышым муын огытыл.28Господь Моисейлан каласен: «Те мыняр эше Мыйын кӱштымем да закон-влакем шукташ торешланаш тӱҥалыда?29Господь тыланда шуматкечым пуэн, сандене Тудо кудымшо кечын киндым кок кечылан ситышын колта. Кажныже мӧҥгыштак кодса, шымше кечын илыме верже гыч нигӧат ынже лек».30Тыгеракын, шымше кечын калык канен.31Тиде киндым Израиль эрге-влак манна манын лӱмденыт. Тудо кориандр нӧшмӧ гай лийын, ош тӱсан, тамже дене мӱян оварчым ушештарен.32Моисей каласен: «Господь теве мом кӱштен: тендам Египет гыч лукмем годым ир мландыште могай киндым пукшымем ужышт манын, ик гомор манным тукым гыч тукымыш арален шогыза».33Моисей Ааронлан каласен: «[Шӧртньӧ] атым нал да тудым ик гомор манна дене теме. Тукым гыч тукымыш аралаш манын, Господь ончыко шынде».34Господьын Моисейлан кӱштымыж семынак Аарон манным ойпидыш шондык ончыко аралаш шынден.35Израиль эрге-влак манным нылле ий, еҥ илыман верыш миен шумешкышт, кочкыныт. Нуно манным Ханаан мландыш толын шумешке кочкыныт.36А ик гоморжо ефан луымшо ужашыже лийын.
Institute for Bible Translation, Finland