Есф2
1Икмыняр жап эртымеке, кунам Артаксеркс кугыжан шыдыже лушкен, тудо Астинь нерген, тудын мом ыштымыжым да тудын шотышто лукмо пунчалжым шарналтен.2Кугыжа деке чак шогышо тарзыже-влак каласеныт: «Тек кугыжалан самырык да мотор ӱдыр-влакым кычалыт.3Тек кугыжа шке кугыжанышыжын чыла кундемыштыже шке еҥже-влакым шогалта, а нунышт самырык да мотор сынан ӱдыр-влакым Суза оласе карманыш погат. Тек нуным ӱдырамаш-влак илыме пӧлемлаш вераҥдат да кугыжан Гегай лӱман евнухшылан эскераш ӱшанат. Да тек ӱдыр-влаклан капешышт шӱраш тӱрлӧ ӱйым [да чыла мо кӱлешым] пуат.4Кугыжалан келшыше ӱдыр Астинь олмеш кугыжан у ватыже лиеш». Тиде ойым кугыжа сайлан шотлен да тыгак ыштен.5Суза оласе карманыште Мардохей лӱман ик иудей илен. Тудо Вениамин тукым гыч Иаирын эргыже, а Иаирже Кисын Семей эргыжын эргыже лийын.6Мардохейым Иерусалим гыч Иуда кугыжа Иехоний да пленыш логалше моло еҥ-влак дене пырля конденыт улмаш. Пленышке нуным Вавилон кугыжа Навуходоносор налын улмаш.7Мардохей шке чузайжын ӱдыржым, тулыкеш кодшо Гадассам, ончен куштен. Тудын вес лӱмжӧ Есфирь лийын. Ӱдыр йытыра капкылан, мотор чурийвылышан улмаш. Ача-аваже колымеке, Мардохей тудым ӱдырлыкеш налын.8Кугыжан шӱдымыжым да пунчалжым увертарымеке, Суза оласе карманышке шуко ӱдырым погеныт. Нунын коклаште тыгак Есфирь лийын, тудымат кугыжан суртышкыжо налыныт да кугыжан евнухшо Гегайлан эскераш ӱшаненыт.9Тиде ӱдыр Гегайлан келшен, Есфирь тудын кумылжым савырен. Тунамак Гегай тудлан капешыже шӱраш ӱйым да кочкыш пайым пуэн, кугыжан суртшо гыч шым тарзе ӱдырым служитлаш ойырен. Тудо тыгак Есфирьлан да тудлан ойырымо ӱдыр-влаклан ӱдырамаш пӧртын эн сай пӧлемжым пуэн.10Есфирь шке калыкше, родо-тукымжо нерген нимомат ойлен огыл, вет Мардохей тидым ышташ кӱштен огыл улмаш.11Есфирьын тазалыкше нерген умылаш да тудын дене мо ышталтмым пален шогаш ӱдырамаш пӧрт деке Мардохей кажне кечын толын коштын.12Кажне ӱдыр Артаксеркс кугыжа деке черет почеш пурышаш улмаш. Тидын деч ончыч ӱдыр латкок тылзе жапыште ӱдырамаш-влаклан палемдыме йӱла почеш ямдылалтшаш улмаш: куд тылзе – мирра ӱйым шӱраш, эше куд тылзе – тамлыпушан ӱйым да моло кӱлеш настам йыгаш.13Тунам веле ӱдыр кугыжа деке пурен кертын. Ӱдырамаш-влакын пӧртышт гыч кугыжан пӧртышкыжӧ пурымо деч ончыч ӱдыр мом йодын, тудлан чыла пуэныт.14Кугыжа деке ӱдыр кастене пурен да эрдене вес ӱдырамаш пӧртыш каен. Тушто нуным кугыжан евнух, извате-влакым эскерыше Шаазгаз ончен. Тылеч вара кугыжан кумылжо лийын огыл да ӱдырым лӱмжӧ дене ӱжын огытыл гын, тудо кугыжа деке пурен кертын огыл.15Кугыжа деке пураш Есфирьын, Мардохейын Аминадав чузайжын ӱдыржын, черетше шуын – тудыжым Мардохей ашнаш налын улмаш. Тудо кугыжан евнухшо да ӱдырамаш-влакым эскерыше Гегайын мом налаш каласымыж деч молым нимомат йодын огыл. Кӧ Есфирьым ужын гын, тудо чылаштын кумылжым савырен.16Есфирьым Артаксеркс кугыжа деке тудын пӧртышкыжӧ луымшо тылзын – тебеф тылзын – пуртеныт. Артаксеркс тунам кугыжалан шымше ий шоген.17Есфирьым кугыжа чыла ӱдырамаш деч чотрак йӧратен шынден, моло ӱдыр деч тудо эн чот келшен да поро кумылым сулен. Кугыжа Есфирьын вуйышкыжо кугыжанватын вуйшӱдышыжым упшалтен, Астинь олмеш кугыжанватылан тудым шогалтен.18Есфирь лӱмеш кугыжа шке онжо ден полышкалышыже-влаклан кугу сийым поген, элысе кундем-влаклан йозакым иземден, пӧлек-влакым чаманыде пуэден.19Кунам ӱдыр-влакым кокымшо гана погеныт, а Мардохей кугыжан капкаже воктене шинчен,20Есфирь эшеат, Мардохейын кӱштымыж семынак, шке родо-тукымжо да калыкше нерген нимомат ойлен огыл. Есфирь Мардохейын мутшым, тудын дене илымыж годсо семынак, тунамат колыштын.21Мардохейын кугыжан капка воктене шинчымыж годым кугыжан пӧлемже-влакым оролышо кок евнух, Гавафа ден Фарра, [Мардохейым кӱшкырак шындымылан] кугыжалан сыреныт да тудым пушташ кутырен келшеныт.22Мардохей тидын нерген пален налын да кугыжанвате Есфирьлан шижтарен, а Есфирьже Мардохей лӱм дене кугыжалан увертарен.23Мардохейын увертарымыжым терген лектыныт, тудыжо чыныш лектын. Кугыжам пушташ шонышо-влакым пушеҥгеш сакеныт. Мардохейын тиде поро пашажлан тауштымо мутым кугыжан курымсерыш книгашкыже возеныт.
Institute for Bible Translation, Finland