Зак.уш7
1Кунам Господь Юмыда тендам сеҥен налаш кайыме мландыш пурта да ятыр калыкым: хеттей, гергесей, аморрей, хананей, ферезей, евей да иевусей-влакым – тендан деч шуко еҥан да виянрак нине шым калыкым – тендан чурий ончыч поктен колта,2кунам Тудо нине калыкым тендан кидыш пуа да те нуным кырен шалатеда, тунам нуным, Господьлан надыр шотеш пӧлеклен, пӱтынек пытарыза. Нунын дене ушемым ида ыште, нуным ида чамане.3Нунын дене родо ида лий: ӱдырдам нунын эргыштлан марлан ида пу, нунын ӱдырыштым шке эргыланда ида нал.4Вет нуно тендан эргыдам Мый дечем кораҥдат, да эргыда-влак моло вес юмылан кумалаш тӱҥалыт. Тунам тендан ӱмбаке Господьын шыдыже ылыжеш, да Тудо тендам вашке пытара.5Нине калык дене теве мом ыштыза: жертвенникыштым шалатыза, онакӱштым пытарыза, Ашера меҥгыштым руэн шуыза, шке ыштыме шояк юмыштым тулеш йӱлалтыза.6Вет те Господь Юмыдан святой калыкше улыда. Тӱняште улшо чыла калык кокла гыч Тудын калыкше лийза манын, Господь Юмыда тендам ойырен налын.7Господь тендам шуко еҥан калык улмыланда огыл ойырен налын. Уке, моло калык дене таҥастарымаште те эн шагал еҥан калык улыда.8Господь тендам йӧрата да кугезе кочада-влаклан товатлен сӧрымыжым шукташ шона – теве молан тендам ойырен налын. Господь тендам Египет гыч [нӧлталме] виян кидше дене луктын, тендам кул лийме вер гыч, Египет кугыжа фараонын кидше йымач утарен.9Шарнен шогыза: Господь гына, тендан Юмыда – Юмо, ӱшанле Юмо. Тудым йӧратыше да кӱштымашыже-влакым шуктен шогышо-влаклан Господь тӱжемше тукым марте шке ойпидышыжым арален шога да порылыкым ончыкта.10А Тудым ужмышудымо-влаклан Господь мутым кучыкта, нуным пытара – Тудым ужмышудымо-влаклан Господь, жапым шуйкалыде, мутым кучыкта.11Тыгеракын, Мыйын таче тыланда пуымо кӱштымаш, пунчал да устав-влакемым шуктен шогыза.12Нине устав-влакым колышташ да тӱрыснек шуктен шогаш тӱҥалыда гын, Господь, тендан Юмыда, кугезе кочада-влаклан товатлен сӧрымыж семынак, шке ойпидышыжлан ӱшанле кодеш да тыланда шке порылыкшым ончыкта.13Тудо тендам йӧраташ тӱҥалеш да суапландара, тендам шуко чотан калыкым ышта. Ача-кочада-влаклан товатлен, тыланда пуаш сӧрымӧ мландыште Тудо тендан авагудо саска ден мланде лектышдам, шурно, йошкар арака ден олив ӱйдам, шолдыра ден тыгыде вольыкдам суапландара.14Чыла моло калык дене таҥастарымаште те эн суапландарыме лийыда: йочам ыштен кертдыме ӱдырамаш ден пӧръеҥ тендан коклаште огыт лий, тыгак вольыкдат исыр ок лий.15Господь [Юмыда] тендам чыла чер деч арален кода. Египетыште лийше шучко чер-влакым, кудыштым те [ужында да] паледа, Тудо тендан ӱмбак огыл, а тушманда ӱмбаке колта.16Господь Юмыдан тендан кидыш пуымо чыла калыкым те пытареда. Нуным ида чамане, юмыштлан ида служитле, вет нуно тыланда оптыш лийыт.17Те шоналтен кертыда: ”Нине калык-влак мемнан деч шукырак еҥан улыт. Кузе ме нуным поктен колтен кертына?”18Нунын деч ида лӱд. Мом Господь, тендан Юмыда, фараон да уло Египет дене ыштен, эре шарныза.19Те шке шинчада дене нине кугу орлыкым, [кугу] палдарыше палым, ӧрыктарыше пашам – тендам Египет гыч лукшо Господь Юмыдан нӧлталме виян кидшым – ужында. Господь Юмыда тендан кызыт лӱдмӧ чыла калык дене тидымак ышта.20Господь нунын ӱмбаке лопшаҥге-влакым колта, тунам утлен кодшо да тендан деч шылше-влакат колен пытат.21Нунын деч ида лӱд, вет Господь Юмыда, кугу да лӱдмашым лукшо Юмо, тендан коклаште лиеш.22Господь, тендан Юмыда, нине калыкым ончычда эркын-эркын поктен колташ тӱҥалеш. Те нуным иканаште пытарышаш огыдал, уке гын [мланде пустаҥеш,] янлык-влак чот пошат да тыланда лӱдыкшым кондат.23Господь, тендан Юмыда, нине калыкым тендан кидыш пуа. Нунылан Тудо пудыранымашым колта, да нуно пытарыме лийыт.24Нунын кугыжаштым Тудо тендан кидыш пуа, те лӱмыштым кава йымачын ӱштыл шуэда. Нигӧ тендан ваштареш шоген ок керт. Те нуным чылаштым пытареда.25Нунын шке ыштыме шояк юмыштым тулеш йӱлалтыза. Нунын ӱмбалнысе ший ден шӧртньым налаш ида сутлане, уке гын те оптышыш логалыда, вет чыла тидым Господь Юмыда йырныклан шотла.26Тыгай йырныкым шке пӧртышкыда ида пурто, уке гын нунын дене пырля теат пытарыме лийыда. Тыгай дечын йыгыжгыза, тек нуно тыланда йырнык лийыт – вет нуным, Господьлан надыр шотеш пӧлеклен, пӱтынек пытарыман.
Institute for Bible Translation, Finland