Зак.уш6
1Теве могай кӱштымаш, пунчал да устав-влаклан Господь Юмыда тендам туныкташ шӱден. Те нуным илаш пурышаш мландыштыда шуктен шогышаш улыда.2Те шкеже, тендан эргыда, эргыдан эргышт ӱмырда мучко Господь Юмыда деч лӱдын илыза да Тудын кӱштымаш ден пунчалже-влакым, кудыштым мый [таче] тыланда пуэм, шуктен шогыза. Тунам те кужун илаш тӱҥалыда.3Колышт, Израиль! Нине закон-влакым шуктен шого! Тунам ача-кочат-влакын Господь Юмыштын сӧрымыж семынак [Тудын тылат пуымо] шӧр да мӱй йогыман мландыште тый денет чыла сай лиеш, тый пеш чот шукемат. [Тиде пунчал ден устав-влакым Господь израиль эрге-влаклан Египет мланде гыч кайымекышт ир мландыште пуэн.]4Колышт, Израиль! Господь, мемнан Юмына – икте гына Господь.5Господь Юметым уло шӱмет дене, уло чонет дене, уло виет дене йӧрате.6Тек таче тыланет пуымо нине кӱштымашем-влак тыйын шӱмыштет [да чоныштет] лийыт.7Шке шочшет-влаклан нуным туныкто. Мӧҥгыштӧ шинчымет годым, корнышто кайымет годым, малаш вочмет да кынелмет годым нине кӱштымаш-влакым ушештарен шого.8Шарнаш манын, пале семын нуным кидышкет кылден шынде, пидыш семын саҥгашкет пижыкте.9Нине кӱштымаш-влакым пӧртетын омса янакышкыже, олатын капкашкыже возен шынде.10Тыйым Господь Юмет тыланет пуаш сӧрымӧ мландышкыже пурта, тидын нерген Тудо шке жапыштыже Авраам, Исаак да Иаков ача-кочатлан товатлен ойлен. Тиде мландысе кугу да чапле ола-влак, кудыжым тый чоҥен отыл,11тӱрлӧ пого дене темше пӧрт-влак, кудыжым тый поген отыл, кӱэш руымо таве-влак, кудыжым тый руэн отыл, да виноград аҥа ден олив пушеҥге-влак, кудыштым тый шынден отыл – чылажат тыйын лийыт. Кунам тый тушто теммеш кочкаш тӱҥалат,12шеклане, [алгаштарымашке ит пуро] – тыйым Египет мланде гыч, кул лийме вер гыч, лукшо Господьым ит мондо.13Господь Юмет деч лӱд, Тудлан [иктылан гына] служитле, [Тудлан ӱшанле код] да Тудын лӱмжӧ дене товатле.14Вес юмо-влак почеш, тендан йыр илыше калык-влакын юмышт почеш, ида кай.15Вет Господь, тендан коклаште улшо Юмыда, вес юмылан кумалмым чыташ ок тӱҥал. Уке гын, Господь Юмыдан шыдыже ылыжеш, да тендам Тудо мландымбач ӱштыл шуа.16Массаште ыштымыда семын Господь Юмыдам ида терге.17Господь Юмыдан тыланда пуымо кӱштымашыже, сугыньжо да пунчалже-влакым пеҥгыдын шуктен шогыза.18Мо Господь [Юмыдан] шинча ончылныжо чын да сай, тудым веле ыштыза. Тунам тыланда сай лиеш, те Господьын ача-кочада-влаклан товатлен сӧрымӧ сай мландышкыже пуреда, тудым сеҥен налыда,19да Господь, каласымыж семынак, шинча ончычда чыла тушмандам поктен колта.20Илен-толын эргыч тый дечет ”Господь Юмынан пуымо нине сугынь, пунчал да уставше-влак мом ончыктат?” – манын йодеш гын,21эргычлан каласе: ”Египетыште ме фараонын кулжо лийын улына, но Господь [Юмо] шке [нӧлталме] виян кидше дене мемнам тушеч луктын.22Господь [Юмо] мемнан шинча ончылно египет калыклан, фараонлан, тудын уло пӧртшылан [да сарзывийжылан] орлыкым кондышо кугу палдарыше пале ден ӧрыктарыше паша-влакым ончыктен.23А мемнам, ача-кочана-влаклан товатлен сӧрымӧ мландыш пурташ да тудым мыланна пуаш манын, [Господь Юмына] Египет гыч луктын24да чыла нине пунчалым шуктен шогаш кӱштен. Господь Юмына деч ме лӱдшаш улына, тунам мемнан дене эре сай лиеш, да ме умбакыжат илаш тӱҥалына.25Господь Юмынан каласымыж семынак, тиде [законысо] чыла кӱштымашым Тудын чурий ончылныжо тӱткын шукташ тӱҥалына гын, ме чын ыштыше лийына”.
Institute for Bible Translation, Finland