Зак.уш19
1Кунам Господь Юмыда тыланда пуышаш мландыште илыше калык-влакым пытара, да те нунын мландыштым поген налыда, нунын ола ден пӧртлаштышт илаш тӱҥалыда,2тунам Господь Юмыдан пуымо мландыштыже кум олам ойырыза.3Нунын деке корным ыштыза да Господь Юмыдан тыланда пуымо пӱтынь мландым кум ужашлан шелза. Нине ола-влак еҥым пуштшо-влаклан куржын утлымо вер лийыт.4Еҥ пуштшо тушко тыгай годым куржын да илыше кодын кертеш: кӧ лишылъеҥжым, нигунам тудлан тушман лийде, йоҥылыш пуштын.5Мутлан, иктаж-кӧ лишылъеҥже дене чодырашке пум руаш каен, пушеҥгым руалаш манын, товаржым нӧлталын, а товарже товарвондо гыч лектын да вес еҥлан логалын, да тудыжо колен. Тыгай еҥ, нине ола кокла гыч иктышкыже куржын, шке илышыжым утарен коден кертеш.6Тушко корно тора лийшаш огыл, уке гын вӱр верч ӱчым шуктышо еҥ, пуштшо еҥым поктен шуын, тудым шыдыж дене пуштын кертеш. А вет йоҥылыш пуштшо еҥ колымашым сулен огыл, пуштмо еҥлан нигунам тушман лийын огыл.7Теве молан мый тыланда кум тыгай олам ойырен налаш кӱштем.8Те таче пуымо кӱштымаш-влакем шуктен шогаш – Господь Юмыдам йӧраташ да эре Тудын корныж дене кошташ – тӱҥалыда гын, Господь Юмыда ача-кочаланда товатлымыж семынак мландыдам кумдаҥда да нунылан сӧрымӧ уло мландым тыланда пуа. Кунам чыла тиде шукталтеш, нине кум ола деке эше кумытым ешарыза.10Тыге Господь Юмын тыланда пуымо мландыште титакдыме вӱр ок його, вӱрым йоктарымылан те титакан огыда лий.11Но кӧ шке лишылжылан тушман лиеш, тудым ваҥа, ӱмбакше кержалтеш да пуштеш, а вара нине ола гыч иктышкыже куржеш гын,12тек тудын илыме олажын кугуракше-влак почешыже еҥ-влакым колтат. Тек нуно пуштшо еҥым куржмо ола гыч налыт да вӱр верч ӱчым шуктышо еҥлан пушташ пуат.13Тыгай еҥым ида чамане, вет тудо титакдыме еҥым пуштмылан титакан. Титакдыме еҥын вӱржым Израиль ӱмбач мушкын колтыза, тунам тыланда суап лиеш.14Пошкудыдан межажым шке верже гыч ида кораҥде. Вет Господь Юмыдан пуымо мландыштыже тыланда ойырымо мланде ужашын межажым тендан кугезыда-влак ыштеныт.15Сулыкыш пурымылан але осал пашам ыштымылан иктаж-кӧм титаканыш лукташ ик таныклыше еҥ ок сите. Кеч-могай паша кок але кум таныклыше еҥын шомакышт дене пеҥгыдемдыме лийшаш.16Иктаж-кӧ, вес еҥым пытараш шонен, тудын ваштареш шойышт таныкла гын,17тек нуно коктынат Господь ончыко да тиде жаплан шогалтыме иерей ден судья-влак ончыко шогалыт.18Судья-влак тиде пашам сайын шымлен налшаш улыт. Таныклыше еҥ шоячыш лектеш да вес еҥ ӱмбаке шойышт таныклен гын,19тунам ты еҥ дене тудымак ыштыман, мом тудо вес еҥлан ышташ шонен. Пытарыза шкендан кокла гыч осалым!20Тидым колын, вес еҥ-влак лӱдыт да тыгай осалым ончыкшым ышташ огыт тӱҥал.21Ида чамане [тудым]: чонлан чоным пуыза, шинчалан – шинчам, пӱйлан – пӱйым, кидлан – кидым, йоллан – йолым. [Кӧ могай зияным лишылъеҥжылан ыштен, тудлан тидын денак тӱлыман.]
Institute for Bible Translation, Finland