Зак.уш18
1Левит иерей-влакын – уло Левий тукымын – моло израиль эрге-влак семын шке мланде пайышт огеш лий. Нуно Господьлан кондымо надырым, Тудлан пуымо ужашым, кочкаш тӱҥалыт.2Моло тукым иза-шольыж-влак коклаште нунын мланде ужашышт ок лий. Вет нунын пайышт – Господь Шкежак, тыге нунылан Тудо ойлен.3Теве мом иерей-влаклан калык пуышаш: кӧ надырлан шолдыра але тыгыде вольыкым конда, тудо иерейлан вольыкын ончыл эрдыжым, оҥылашыжым да мӱшкырвуштыжым ойырышаш.4Иерейлан тыгак шке лектышетын икымше саскажым – шурным, йошкар аракам да олив ӱйым, тыгак икымше тӱредме межым пу.5Вет Господь Юмет Израильын чыла тукымжо кокла гыч тудым да тудын эргыж-влакым [Господь Юмет ончылно] эре шогаш, Тудын лӱмжӧ дене служитлаш [да суапландараш] ойырен налын.6Израильын кеч-могай кундемыштыже, тыйын иктаж олаштет илыше левит шӱм-чон кумылжо почеш Господьын ойырен налме верышкыже мия гын,7тек тушто Господь ончылно шогышо левит иза-шольыж-влак семын шке Господь Юмыжо лӱмеш служитлаш тӱҥалеш.8Ача-кочажын оралте-погыжым ужалыме деч парышыже уло гынат, тудо шке пайжым моло дене иктӧр налшаш.9Кунам тый Господь Юметын пуымо мландышкыже пурет, тусо калык-влакын йырнык пашаштым ышташ ит тунем.10Тыйын коклаште шке эргыжым але ӱдыржым тул гоч колтышо, ончыкужшо, юзо, мужедше, юлышо,11шӱведыше, колышо-влак дене кылым кучышо, локтышо, колышо деч каҥашым йодшо ынже лий.12Тыгайым ыштыше еҥ Господьлан йырнык улеш. Чыла тидым ыштымылан Господь Юмет нине калыкым тыйын ончычет поктен колта.13Шке Господь Юмет ончылно тыгай сулыкым ит ыште.14Тыйын поктен колтышаш нине калык-влак ончыкужшо ден юзо-шамычым колыштыт. А тылат тидым Господь Юмет ышташ кӱштен огыл.15Господь, тендан Юмыда, мыйын гай пророкым тыланда шкендан кокла гыч, иза-шольыда кокла гыч, шогалта. Тудым колыштса.16Тидымак те Хорив курык воктене погынымаш кечын Господь Юмыда деч йодында. Те каласенда: ”Мыланна тетла Господь Юмынан йӱкшым колаш да тиде кугу тулым ончаш ок кӱл, уке гын ме колена!”17Тунам Господь мыланем каласен: ”Мом нуно тыланет ойлат – тиде сай.18Мый нунылан тый гает пророкым пуэм. Тудо шке калыкда кокла гыч лиеш. Мый тудын умшашкыже шке шомакем пыштем, да тудо нунылан чыла кӱштымем ойлаш тӱҥалеш.19Кӧ Мыйын шомакем ок колышт, кудым тиде пророк Мыйын лӱмем дене ойла, тыгай еҥым Мый мут кучаш шогалтем.20А пророк Мыйын лӱмем дене иктаж-мом тугайым каласаш тоштеш гын, мом Мый тудлан ойлаш кӱштен омыл, тудым пуштман. Тыгак вес юмо-влакын лӱмышт дене ойлышо пророкымат пуштман”.21Тый тыге шоналтен кертат: ”Пророкын ойлымыжо Господь деч огыл манын, мый кушеч пален кертам?”22Пророкын Господь лӱм дене мом ойлымыжо ок шукталт гын, тугеже тиде шомакым Господь ойлен огыл. Тидым пророк шкевуя ойлаш тоштын – тудын деч ит лӱд.
Institute for Bible Translation, Finland