Зак.уш16
1Авив тылзын Господь Юмет лӱмеш Кугечым пайремле, вет тиде тылзын Господь Юмет тыйым йӱдым Египет гыч луктын.2Кугече надырлан тыгыде да шолдыра вольыкым Господьын шке лӱмжылан илаш ойырен налме верыштыже Господь Юмет лӱмеш шӱшкыл.3Тудын дене пырля шопо руаш гыч ыштыме киндым ит коч. Египетым содор коден кайыметым шарнаш манын, шым кече тудын дене пырля ”туткар кинде” манме шергиндым коч. Тыге тый Египет гыч лекме кечым ӱмырет мучко шарнен илаш тӱҥалат.4Шым кече пӱтынь мландыштет нимогай ру ынже лий. Икымше кечын кастене надырлан кондымо шыл деч эр марте нимо кодшаш огыл.5Кугече надырым Господь Юметын тылат пуымо кеч-могай олаштыже шӱшкылаш ок лий.6Тудым Господь Юметын шке лӱмжылан илаш ойырен налме верыште гына шӱшкыл. Тидым кастене кече шичме годым ыште – лач тиде жапыште тый Египет гыч лектын каенат.7Господь Юметын ойырен налме верыштыже шылым кӱктӧ да коч, а эрдене мӧҥгышкет пӧртыл.8Куд кече шергиндым коч, а шымше кече Господь Юмет лӱмеш ыштыме пайремым мучашла. Тиде кечын нимогай пашам ит ыште.9Пасушто сорла дене тӱредаш тӱҥалме деч вара шым арням шотлен нал10да Господь Юмет лӱмеш Арня пайремым эртаре. Мо дене тыйым Господь Юмет суапландарен, тушечын шке кумылын пуымо надыретым конден кертат.11Господьын шке лӱмжылан илаш ойырен налме верыште Господь Юмет ончылно куанен пайремле. Тек тый денет пырля эргыч ден ӱдырет, пӧръеҥ ден ӱдырамаш кулет, тыйын олаштет илыше левит, тыгак тендан коклаште улшо йотъеҥ, тулык йоча да тулык вате-влак куанен пайремлат.12Шарне, тый шкежат Египетыште кул лийынат. Нине кӱштымаш-влакым шуктен шого.13Идымет ден виноградым темдыме верет гыч лектышым налмеке, шым кече Омаш пайремым пайремле.14Тек тый денет пырля эргыч ден ӱдырет, пӧръеҥ ден ӱдырамаш кулет, тыйын олаштет илыше левит, йотъеҥ, тулык йоча ден тулык вате-влак куанен пайремлат.15Господь Юметын [шке лӱмжым ӱжын кумалаш] ойырен налме верыштыже шым кече Тудын лӱмеш пайремле. Вет Господь Юмет тыйым – чыла лектышетым, шке кидет дене ыштыме пашатым – суапландара, тый лач куанаш тӱҥалат!16Тендан уло пӧръеҥ тукымда идалыклан кум гана Господь Юмет ончыко Тудын ойырен налме верышкыже толшаш. Тек нуно Шергинде пайрем, Арня пайрем да Омаш пайрем годым толыт. Нигӧ Господь ончыко яра кид дене толшаш огыл.17Господь Юмо кӧм кузе суапландарен, тек кажныже, тидым шотыш налын, пӧлекым конда.18Господьын, тыйын Юметын, пуымо кажне олаште чыла тукымышто шкаланет судья ден тӧра-влакым шогалте. Тек нуно калыклан чын судым ыштат.19Чыным вес семын ит савыре, чыла еҥым ойыркалыде ик семын ончо. Взяткым ит нал, вет тудо мунло еҥым сокырым ышта, титакдыме еҥын пашажым чын огылыш луктеш.20Чыным, чыным кычал. Тунам тый илаш тӱҥалат да Господь Юметын тылат пуышаш мландыжым сеҥен налат.21Господь Юметлан жертвенникым ыштымеке, воктекше нимогай Ашера меҥгым ит шогалте.22Онакӱмат ит шогалте, вет Господьын, тыйын Юметын, чыла тидым ужмыжо ок шу.
Institute for Bible Translation, Finland