2 Куг12
1Господь Давид деке [пророк] Нафаным колтен. Тудо кугыжа деке толын да тыге ойлен: «Ик олаште кок еҥ илен: иктыже поян, весыже йорло.2Поянжын пеш шуко тыгыде да шолдыра вольыкшо лийын.3А йорлын ик изи пача деч моло ниможат лийын огыл. Пачам тӱлен налын, йорло еҥ тудым куштен. Пача тудын йочаж-влак дене пырля кушкын, тудын кочмо кочкышыжым кочкын, коркаж гыч йӱын, воктеныже мален – тудлан ӱдыржӧ семын лийын.4Поян еҥ деке корныеҥ пурен. Тудыжо, корныеҥым пукшаш манын, шке кӱтӱж гыч шорыкым але ӱшкыжым налаш чаманен. Тудо йорлын пачажым налын да корныеҥым пукшаш сийым ямдылен».5Тиде айдемылан Давид пеш чот шыдешкен, тудо Нафанлан каласен: «Господь дене товатлем, тыге ыштыше айдеме колымашым сулен!6А тыге чаманыде ыштымыжлан тиде еҥ пачалан ныл пачаш шукырак тӱлышаш».7Тунам Нафан Давидлан каласен: «Тидым ыштыше айдемыже тый улат. Израильын Господь Юмыжо тыге ойла: ”Мый тыйым Израильын кугыжажлан шӱрен палемденам, тыйым Саулын кидше деч утаренам.8Мый тылат Саул озатын полатшым да тудын ватыже-влакым пуэнам. Тылат Мый Израиль ден Иудам кучыктенам. Тиде [тылат] шагал гын, эше ешарен пуэм ыле.9Молан тый Господьын шомакшым шотлен отыл да Тудын шинча ончылныжо осалым ыштенат? Хеттей Урийым тый колаш колтенат, тудым аммон-влакын кердышт дене пуштынат, а ватыжым шкаланет налынат.10Мыйым шотлыдыметлан да хеттей Урийын ватыжым налметлан ынде тыйын тукымет деч керде нигунам ок кораҥ”.11Тыге Господь ойла: ”Ойго тыланет шке ешет гычак лектеш, тидым Мый тыге ыштем. Тыйын шинча ончылнет ватет-влакым налам да вес еҥлан пуэм. Кечывал кечын тудо ватет-влак дене малаш возеш.12Тый шолып ыштенат, а Мый тидым уло Израиль ончылно кечывал кечын ыштем”».13Давид Нафанлан каласен: «Господь ончылно мый сулыкым ыштенам». Нафан Давидлан вашештен: «Сулыкетым Господь кудалтен. Тый от коло.14Но тыге ыштымет дене тый Господьын тушманже-влаклан Тудым мыскылаш амалым пуэнат, сандене шочшо эргыч кола».15Нафан мӧҥгыжӧ каен. Урий ватын Давид деч шочшо азаж ӱмбаке Господь шке кидшым нӧлталын, да тудыжо черланен.16Давид йоча верч Юмылан кумалын, пӱтым кучен да, шкет кодын, йӱдым кӱвар ӱмбалне эртарен.17Тудын деке пӧрт вуйлатыше-влак пуреныт да Давидым кӱвар ӱмбач кынелташ тӧченыт. Но тудо кынелын огыл, нунын дене пырля кочкынат огыл.18Шымше кечын йоча колен. Тарзе-влак тидын нерген Давидлан увертараш лӱдыныт. «Йочан эше илымыж годым Давид дене кутыраш тӧченна, но тудын мемнам колыштмыжат шуын огыл, – ойленыт нуно шке коклаштышт. – Кузе ме йочан колымыж нерген каласена? Тудо шкеж дене иктаж-мом ыштен кертеш».19Кунам Давид тарзыж-влакын шке коклаштышт шып кутырымыштым ужын, тудо йочан колымыж нерген тогдаен. «Йоча колен?» – тудо йодын. «Колен», – вашештеныт тудлан.20Тунам Давид кӱвар ӱмбач кынелын. Мушкылтмеке, шкенжым ӱй дене шӱрен. Вара вургемым вашталтен чиен да Господьын пӧртышкыжӧ каен, тушто кумалын. Мӧҥгыжӧ толмеке, кочкышым кондаш йодын. Кочкышым конденыт, да тудо кочкын.21Тарзыже-влак тудлан каласеныт: «Молан тый тыге ыштет, тидым кузе умылаш? Кунам йоча эше илыше ыле, тый шортынат, пӱтым кученат [да мален отыл], а колымекше кынелынат, кочкынат [да йӱынат]?»22Давид вашештен: «Кунам йоча эше илыше лийын, мый пӱтым кученам да шортынам. Шоненам – ала Господь мыйым серлага, да йоча илыше кодеш.23А кызыт йоча колен. Молан мылам пӱтым кучаш? Мый тудым пӧртылтен кертам мо? Жап шумеке, мый тудын деке каем, а тудо мый декем огеш пӧртыл».24Вара Давид Вирсавия ватыжым лыпландарен. Давид тудын дек пурен да мален. Тудыжо [мӱшкыраҥын да] эргым ыштен, тудлан Соломон лӱмым пуэн. Господь тиде эргым йӧратен25да пророк Нафаным колтен. Тудыжо Господьын кӱштымыж почеш йочалан Иедидиа лӱмым пуаш манын каласен.26А Иоав аммон-влакын Равва олашт ваштареш кредалын да кугыжан карманым сеҥен налын.27Иоав Давид деке уверзе-шамычым тыге каласаш колтен: «Мый Равва ӱмбак кержалтынам да вӱд улмо верым сеҥен налынам.28Кодшо сарзе-влакым пого да, олам авырен, тудым сеҥен нал. Олам мый налам гын, чап мыланем лиеш».29Давид чыла сарзым поген да ола деке каен, Равва ваштареш кредалын да тудым сеҥен налын.30Давид аммон кугыжан вуйжо гыч шӧртньӧ вуйшӱдышыжым поген налын. Вуйшӱдышын нелытше ик талант улмаш, тушто шергакан кӱ-влакат лийыныт. Тиде вуйшӱдышым Давидын вуйышкыжо упшалтеныт. Ола гыч Давид шуко поянлыкым луктын.31Тушто илыше калыкым наҥгаен да нуным пила, кӱртньӧ кирка да товар дене ыштыме пашаш, тыгак кермычым калыплаш шогалтен. Чыла аммон ола дене Давид тыге ыштен, вара веле уло сарзывийже дене Иерусалимыш пӧртылын.
Institute for Bible Translation, Finland