2 Куг11
1Шошым, кунам кугыжа-влак сар дене каят, Давид Иоавым, тудын дене пырля шке тарзыже-шамычым да чыла израиль эрге-влакым походыш колтен. Нуно аммон-влакым кырен шалатеныт да Равва олаштым авырен налыныт. А Давид Иерусалимыште кодын.2Ик кастене Давид вакшышыж гыч кынелын да кугыжа полат леведыш ӱмбалне коштын. Тушечын тудо мушкылтшо ӱдырамашым ужын. Саде ӱдырамашыже пеш мотор улмаш.3Давид тудын нерген пален налаш колтен. Тудлан каласеныт: «Тиде – Вирсавия, Елиамын ӱдыржӧ, хеттей Урийын ватыже».4Тудым кондышт манын, Давид шке тарзыже-влакым колтен, да Вирсавия толын. Тидын деч ончыч ӱдырамаш эрныме йӱлам эртен улмаш. Давид тудын дене мален, вара тудыжо мӧҥгыжӧ пӧртылын.5Ӱдырамаш мӱшкыраҥын, тидын нерген тудо Давидлан уверым колтен.6Тунам Давид Иоавлан тыгай кӱштымашым колтен: «Мый декем хеттей Урийым колто». Иоав тыгак ыштен.7Урий тудын деке толын. Давид тудын деч Иоав да сарзе-влак нерген, сарын кузе каен шогымыж нерген йодыштын.8Вара Давид Урийлан каласен: «Кай мӧҥгышкет, йолетым муш да каналте». Урий кугыжан полатше гыч лектын, почешыже кугыжа деч сийым намиеныт.9Но Урий мӧҥгыжӧ каен огыл, йӱдым тудо шке озажын тарзыж-влак дене пырля кугыжан полат капка воктене мален.10Урий мӧҥгыжӧ миен огыл манын, Давидлан увертареныт. Тудыжо Урийлан каласен: «Тый вет корно гыч толынат. Молан мӧҥгышкет каен отыл?»11«Юмын шондыкшо, Иуда ден Израильын сарзыже-влак омашыште илат, Иоав озам ден тудын сарзыже-шамыч нурышто малат, – вашештен Урий. – Тугеже кузе мый, шке пӧртышкем каен, кочкын-йӱын да ватем дене мален кертам? Тыйын чонет да илышет дене товатлем – мый тыге ыштен ом керт!»12Давид каласен: «Таче кечынат тыштак код, а эрла мый тыйым колтем». Урий Иерусалимыште эше вес кече марте кодын.13Давид тудым ӱстелтӧрыш ӱжын, да нуно пырля кочкын-йӱыныт. Давид тудым руштмешкыже йӱктен. Но кастене Урий адакат мӧҥгышкыжӧ огыл, а озажын тарзыж-влак дене пырля малаш каен.14Эрдене Давид Иоавлан серышым возен да Урий дене пырля колтен.15Тушто тудо тыге возен: «Урийым эн талын кредалме верыш шогалтыза да тудын деч чакныза – тек тудо пуштмо лиеш».16Олам авырыме годым Иоав эн тале тушман сарзе-влакын кушто улмыштым пален, сандене Урийым лач тиде верыш шогалтен.17Кунам олаште илыше-шамыч Иоав дене кредалаш лектыныт, Давидын икмыняр сарзыже колен. Нунын коклаште хеттей Урият лийын.18Иоав Давид деке кредалмашын кузе кайымыж нерген радамын каласкалаш еҥым колтен.19Тудлан тыге кӱштен каласен: «Кугыжалан кредалмашын кузе кайымыж нерген каласкалымекет,20тудо шыдешкен да тыге каласен кертеш: ”Молан ола деке тынар чак миенда? Тендан ӱмбак пырдыж гыч лӱйкалаш тӱҥалмым пален огыдал мо?21Кӧ Иероваалын Авимелех эргыжым пуштын? Ӱдырамаш огыл мо пырдыж ӱмбач тудын ӱмбак кидвакш кӱм шуэн [логалтен], да тудыжо Тевецыште колен? Молан те пырдыж деке тынар чак миенда?” Тидлан тый тыге вашеште: ”Тыйын хеттей Урий тарзетат колен”».22[Иоав деч колтымо еҥ Иерусалимыш кугыжа дек] каен. Тудо толын да Давидлан Иоавын мом ойлаш кӱштымыжым, кредалмашын кузе кайымыжым каласкален. [Давид Иоавлан шыдешкен да колтымо еҥлан каласен: «Молан те кредалаш ола деке чак миенда? Тендам пырдыж гыч пытараш тӱҥалмым пален огыдал мо? Кӧ Иероваалын Авимелех эргыжым пуштын? Ӱдырамаш огыл мо пырдыж ӱмбач тудын ӱмбак кидвакш кӱм шуэн, да тудыжо Тевецыште колен? Молан те пырдыж деке чак миенда?»]23Уверзе Давидлан каласен: «Ончыч нуно мемнам сеҥен тольыч да ваштарешна нурышко лектыч. Но вара ме нуным капка марте поктен толна.24Тунам пикшызе-влак пырдыж гыч тарзет-шамыч ӱмбак лӱйкалаш тӱҥальыч, да кугыжан икмыняр тарзыже колыш. Хеттей Урий тарзетат колыш».25Тунам Давид уверзылан каласен: «Иоавлан тыге ойло: ”Мо лийме тыйым ынже ойгандаре. Керде ик гана иктым, вес гана весым пытара. Ола ваштареш сарым вияҥде да тудым шалате”. Иоавым тыге кумылаҥде».26Марийжын колымыж нерген Урийын ватыже колын да марийже шотышто шортмо йӱлам эртарен.27Кунам шортмо жап эртен, Давид тудым шкеж деке полатыш кондаш еҥ-влакым колтен. Тудо Давидын ватыже лийын да тудлан эргым ыштен. Но Давидын тыге ыштымыже Господьын шинча ончылныжо осал паша лийын.
Institute for Bible Translation, Finland