4 Куг8
1Елисей саде ӱдырамашлан, кудын эргыжым ылыжтарен, каласен: «Ешет дене тышеч кай да кушто кертат, тушто иле. Господь тиде мландыш шужымашым колта, тудо шым ий шуйна».2Ӱдырамаш Юмын еҥын каласымыж семынак ыштен. Тудо шке ешыж дене тышечын каен да филистим мландыште шым ий илен.3Шым ий эртымеке, тудо филистим мланде гыч пӧртылын да кугыжа деке шке пӧртшӧ ден пасужым йодаш миен.4Кугыжа тиде жапыште Гиезий дене, Юмын еҥын тарзыж дене, кутырен. «Елисейын ыштыме ӧрыктарыше пашаж-влак нерген каласкале», – йодын тудо.5Кунам Гиезий кугыжалан Елисейын колышым ылыжтарымыж нерген каласкален, лачак саде ӱдырамаш кугыжа деке шке пӧртшӧ ден пасужым йодаш миен. Гиезий каласен: «Кугыжа озам, тиде – саде ӱдырамаш! А теве тудын эргыже, тудым Елисей ылыжтарен!»6Тунам кугыжа ӱдырамаш деч йодыштын. Тудыжо чыла каласкален пуэн. Кугыжа ӱдырамаш дене пырля ик полышкалышыжым колтен, тудлан кӱштен каласен: «Мо тудын лийын – чыла пӧртылташ, тыгак кайыме кечыж гыч тачысе кече марте пасу могай парышым конден – тек чыла пӧртылтат».7Кунам Сирий кугыжа Венадад черле лийын, Дамаскыш Елисей толын. Кугыжалан каласеныт: «Тышке Юмын еҥ толын».8Кугыжа Азаиллан кӱштен: «Кидышкет пӧлекым нал да Юмын еҥ деке кай. Йод тудын гоч Господьым: тиде чер деч паремам мо?»9Азаил Елисейым вашлияш каен да, нылле верблюд мыняр наҥгаен кертын, Дамаскын тынар эн сай сатужым пӧлеклан намиен. Азаил Юмын еҥ ончылан шогалын да каласен: «Тыйын Венадад эргыч, Сирийын кугыжаже, мыйым йодаш колтен – тиде чер деч паремеш мо?»10Елисей вашештен: «Кай, тудлан каласе: ”Паремат”. Но Господь мылам почо: тудо кола».11Елисей шинчаончалтышыжым Азаил ӱмбак виктарен да кужу жап ончен – тудыжо эсогыл аптыранен колтен. Вара Юмын еҥ шортын колтен.12Азаил йодын: «Молан мыйын озам шортеш?» Тудыжо вашештен: «Мый палем: тый израиль эрге-влаклан шуко осалым ыштет. Нунын карманыштым йӱлалтет, самырык-влакым керде дене пытарет, аза-шамычым руэн пуштат, мӱшкыран ӱдырамаш-влакын мӱшкырыштым пӱчкат».13Азаил каласен: «Кузе мый, тыйын тарзет, [колышо] пий, тыгай кугу пашам ыштен кертам?» Елисей вашештен: «Тый Сирийын кугыжаже лият, тидым мыланем Господь почо».14Азаил Елисей деч каен да шке кугыжа озаж деке толын. Венадад тудын деч йодын: «Мом тылат Елисей каласыш?» Азаил вашештен: «Тый паремат манын ойлыш».15Вес кечын тудо одеялым налын, вӱд дене нӧртен да, кугыжан чурийжым петырен, тудым тӱнчыктарен. Венадад колен, да олмешыже кугыжалан Азаил шогалын.16Израиль кугыжа Иорамын, Ахав эргын, визымше ий кугыжаланымыж годым Иуда кугыжа Иосафат олмеш кугыжалан Иорам эргыже шогалын.17Кугыжаланаш тӱҥалмыж годым тудо кумло кок ияш лийын да Иерусалимыште кандаш ий вуйлатен.18Иорамын ватыже Ахавын ӱдыржӧ лийын. Сандене тудо Ахав тукым семынак Израиль кугыжа-влакын корнышт дене коштын да Господь шинча ончылно шуко осал пашам ыштен.19Но Давид тарзыжлан кӧра Господьын Иуда кугыжанышым пытарымыже шуын огыл. Вет Тудо Давидлан «тукыметын лампыже нигунам ок йӧрӧ» манын сӧрен.20Иорам вуйлатыме годым Едом Иуда кугыжанышын кидше йымач лектын да шкаланже кугыжам шогалтен.21Тунам Иорам кугыжа орван сарзыж-влак дене пырля Цаирыш каен да тудым авырыше идумей-шамычым, орван сарзе вуйлатышыштым йӱдым кырен шалатен. Но вара Иудан сарзыже-влак станышкышт куржыныт.22Едом таче кече мартеат Иуда кид йымалне огыл. Тудын кидше йымач эше Ливна лектын.23Иорамын моло пашаже, чыла мом ыштымыже нерген «Иуда кугыжа-шамычын курымсерыш книгаштышт» возымо.24Вара Иорам шке ача-кочаж-влак деке ушнен, тудым нунын пелен Давид-Олаште тоеныт. Иорам олмеш кугыжалан Охозий эргыже шогалын.25Израиль кугыжа Иорамын, Ахав эргын, латкокымшо ий кугыжаланымыж годым Иуда мландым Охозий, Иорам эрге, вуйлаташ тӱҥалын.26Кугыжалан шогалмыж годым тудо коло кок ияш лийын да Иерусалимыште ик ий вуйлатен. Аважын лӱмжӧ Гофолия, тудо Израиль кугыжа Амврийын уныкаже лийын.27Охозий Ахав тукымын корныж дене каен. Ахав тукым семын тудат Господь шинча ончылно шуко осал пашам ыштен, вет Охозий Ахав тукым дене родо лийын.28Тудо Ахавын Иорам эргыж дене Галаадысе Рамофыш Сирий кугыжа Азаил ваштареш сар дене каен. Сириян-влак Иорамым сусыртеныт.29Сирий кугыжа Азаил дене Рамофышто кредалме годым сириян-влакын сусыртымышт деч эмлалташ манын, Иорам кугыжа Изреельыш пӧртылын. Сусыргышо Иорам, Ахав эрге, деке Изреельыш Иудан кугыжаже Охозий, Иорам эрге, толын.
Institute for Bible Translation, Finland