4 Куг7
1Елисей каласен: «Господьын шомакшым колыштса. Тыге Господь ойла: ”Эрла тиде жапыште Самарий капка воктене ик виса эн сай ложаш да кок виса шож ик сикль дене шогаш тӱҥалыт”».2Кугыжан лишыл полышкалышыже – кугыжа тудын кидшылан эҥертен – Юмын еҥлан каласен: «Господь кавасе окна-влакым почеш ыле гынат, тиде лийын кертеш мо?» Елисей вашештен: «Тый тидым шке шинчат дене ужат, но кочкаш от тӱҥал».3Тиде жапыште ола капкаш пурымаште проказе черан ныл еҥ шинчен. Нуно икте-весыштлан тыге ойленыт: «Мом ме тыште колымашым вучен шинчена?4Олашке пурена гын, тушто шужымаш – ме колена. Тыште шинчена гын, тыгак колена. Айста сириян-влакын станышкышт каена. Мемнам илышым кодат гын, илаш тӱҥалына, а пуштыт гын, колена».5Пычкемышалтмеке, нуно сириян-шамычын станышкышт каяш лектыныт. Кунам стан деке миен шуыныт, туштыжо ик еҥат лийын огыл.6Господь теве мом ыштен улмаш: сириян-влаклан орва кочыртатыме, имне шинчалме да кугу сарзывий лӱшкымӧ йӱк шоктен. Нуно икте-весыштлан каласеныт: «Тиде Израиль кугыжа, мемнан ӱмбак кержалтышт манын, хеттей ден египет кугыжа-влакым тарлен!»7Рӱмбалгаш тӱҥалмеке, нуно кынелыныт да, омашыштым, имньыштым, осёлыштым коден, тушеч куржыныт. Станым, кузе лийын, туге коден, нуно шкеныштым утарен куржыныт.8Саде проказе черан-влак стан деке толыныт да ик омашыш пуреныт. Тушто нуно кочкын-йӱыныт, ший ден шӧртньым, вургемым налыныт да каеныт, чыла тидым шылтеныт. Вара пӧртылыныт, вес омашыш пуреныт – туштат налын каеныт да шылтеныт.9Вара икте-весыштлан каласеныт: «Ме йоҥылыш ыштена. Таче – куан увер кече, а ме тидын нерген нигӧлан огына ойло. Волгыжмо марте шуйкалена гын, мемнан ӱмбаке титак возеш. Каена да тидын нерген кугыжан пӧртлан увертарена».10Нуно каеныт, оласе капка орол-влакым ӱжыныт да каласеныт: «Ме сириян-шамычын станышкышт коштынна. Тушто иктат уке, нимогай айдеме йӱк ок шокто. Лач йолыштымо имне ден осёл-влак да омаш-шамыч шогат. Стан кузе шоген, чылажат тугак кодын».11Капка орол-влак еҥ-шамычым ӱжыныт, уверым кугыжан пӧртыш колтеныт.12Кугыжа йӱдым кынелын да шке тарзыж-влаклан каласен: «Мом сириян-шамыч мемнан дене ыштынешт, мый тыланда каласем. Шужен шинчымынам нуно палат. Пасушто шылаш манын, нуно стан гыч лектыныт да тыге шонат: ”Кунам ола гыч лектыт, ме нуным илышынек руалтен кучена да олашке керылт пурена”».13Тудын ик тарзыже темлен: «Тек олаште кодшо имне-влак кокла гыч визытшым налыт да мо лиймым пален налаш каят. Вет утаралт кодшо-шамычым садак колышо израиль сарзе-влакын пӱрымашышт вуча. Колтена нуным, тек ончал толыт».14Нуно кок мужыр имньым кок орвашке кычкеныт. Кугыжа нуным сириян-шамычын сарзывийышт почеш колтен, тыге каласен: «Кайыза да мо тушто лийын – пален налза».15Нуно сириян-влакын кышашт почеш Иордан марте каеныт да ужыныт: сириян-шамычын вашкен куржмышт годым кышкен кодымо вургем ден арвер корно мучко кийылтыт. Колтымо еҥ-шамыч пӧртылыныт да тидын нерген кугыжалан увертареныт.16Тунам калык ола гыч лектын да сириян-влакын станыштым эрыктен лектын. Господьын каласымыж семынак, ик виса эн сай ложаш да кок виса шож ик сикль дене шогаш тӱҥалыныт.17Кугыжа саде лишыл полышкалышыжым – кугыжа тудын кидшылан эҥертен – капка воктеке эскераш шогалтен улмаш. Тушто тудым калык тошкен пуштын. Юмын еҥже каласыме семынак, тудо колен. Кунам кугыжа Юмын еҥ дек толын,18тудыжо кугыжалан тыге каласен улмаш: «Эрла тиде жапыште Самарий капка воктене ик виса эн сай ложаш ден кок виса шожым ик сикль дене ужалаш тӱҥалыт».19Тунам кугыжан лишыл полышкалышыже Юмын еҥ деч тыге йодын: «Господь кавасе окна-влакым почеш ыле гынат, тиде лийын кертеш мо?» Юмын еҥ вашештен: «Тый тидым шке шинчат дене ужат, но кочкаш от тӱҥал».20Тиде еҥ дене тыгак лийын. Тудым калык капка воктене тошкен каен, да тудо колен.
Institute for Bible Translation, Finland