4 Куг25
1Седекийын кандаш ий, индеш тылзе да индеш кече вуйлатымекше, Вавилон кугыжа Навуходоносор уло сарзывийже дене Иерусалим ӱмбаке толын. Тудо олам авырен налын да йырже мланде кӱкшакам нӧлталын.2Седекий кугыжан латикымше ий кугыжаланымыж марте ола авырен шогымо лийын.3Тиде тылзын индешымше кечынже олаште пеш кугу шужымаш озаланен, калыкын кочкышыжо пытен.4Тунам тушман олан пырдыжшым шӱтен, да тушто улшо сарзе-влак кугыжан садвечыж воктенысе кок пырдыж кокласе капка гоч йӱдым куржыныт. Халдей-влак ола йыр шогеныт гынат, кугыжа тӧрвер велке куржын утлен.5Халдей сарзе-шамыч кугыжа почеш куржыныт да Иерихон тӧрверыште поктен шуыныт. Тудын сарзыже-влак куржын пытеныт,6а кугыжам руалтен кученыт да Вавилон кугыжа дек Ривлаш наҥгаеныт. Тушто тудлан судым ыштеныт.7Седекийын эргыж-влакым тудын шинча ончылныжак шӱшкыл пуштыныт, а Седекийын шинчажым шӱтеныт, вара тудым той шинчыр дене шинчырленыт да Вавилоныш наҥгаеныт.8Вавилон кугыжа Навуходоносорын латиндешымше ий вуйлатымыж годым визымше тылзын шымше кечынже Иерусалимыш капорол тӧра Навузардан, Вавилон кугыжан тарзыже, толын.9Тудо Господьын пӧртшым, кугыжан пӧртым, Иерусалимысе пӧрт-влакым – чыла кугу пӧртым – тул дене йӱлалтен.10Капорол тӧра пелен улшо халдей сарзе-шамыч Иерусалим йыр улшо пырдыжым шалатеныт.11Олаште кодшо калыкым, тыгак Вавилон кугыжа могырыш лупшалтше еҥ-влакым да моло тыглай калыкым капорол тӧра Навузардан пленыш наҥгаен.12Лач незер калык гыч икмыняр еҥым тудо виноград аҥа ден пасулаште пашам ышташ коден.13Халдей-шамыч Господьын пӧртшын той колонно ден орваже-влакым, «теҥыз» манме кугу той чанжым шалатеныт да тойым Вавилоныш наҥгаеныт.14Нуно эше кӱмыж, кольмо, вашкӱзӧ да изи ате-влакым – храмыште служитлыме годым кучылтмо чыла той ӱзгарым – налыныт.15Капорол тӧра тыгак шӧртньӧ да ший гыч ыштыме тулшол ате ден чаше-влакым наҥгаен.16Соломонын Господьын пӧртшылан ыштыме кок колоннышто, ик чаныште да орвалаште тойын шуко улмыжлан кӧра тудын нелытшым висен кертын огытыл.17Колонно латкандаш кынергут кӱкшытан лийын. Тушто кум кынергут кӱкшытан той колонно вуй лийын, а тудын йыр сетке ден гранат саска-влак тыгак той гыч ыштыме лийыныт. Кок колонныжат икгай улмаш.18Капорол тӧра кугу иерей Сераийым, тудын деч вара шогышо иерей Софонийым да кум капка оролым пленыш наҥгаен.19Ола гыч тудо тыгак сарзе-влак дене вуйлатен шогышо ик евнухым, кугыжан эн лишыл вич еҥжым, сарзывийын тӱҥ возкалышыжым – тудо элысе пӧръеҥ-влакым сарзе радамыш возен – да олаште лийше лӱмлӧ кудло еҥым налын.20Капорол тӧра Навузардан нуным Вавилон кугыжа дек Ривлаш наҥгаен.21Емаф мландысе Ривлаште Вавилон кугыжа нуным казнитлен пуштын. Тыге Иуда тукым еҥ-влак шке мландышт гыч наҥгайыме лийыныт.22Вавилон кугыжа Навуходоносор Иуда мландыште кодымо калыкын вуйлатышыжлан Годолийым, Ахикам эргым, Шафанын уныкажым, шогалтен.23Тидын нерген колмеке, Годолий дек Мицпаш сартӧра-влак шке еҥышт дене толыныт. Тиде – Измаил, Нефаний эрге, Иоханан, Карей эрге, Сераий, Нетофа гыч Танхумефын эргыже, Иезаний, Мааха гыч улшо еҥын эргыже, да нунын еҥышт.24Годолий нунылан да нунын еҥыштлан товатлен каласен: «Халдей-влаклан служитлаш ида лӱд. Элыштак кодса, Вавилон кугыжан кид йымакше кусныза – тендан дене чыла сай лиеш».25Но шымше тылзын кугыжа тукым гыч улшо Измаил, Нефаний эрге, Елишаман уныкаже, лу еҥ дене толын да Годолийым, тудын дене пырля Мицпаште улшо Иуда тукым еҥ ден халдей-влакым пуштын.26Тунам уло калык, изи гыч кугу марте, тыгак сартӧра-влак, халдей-шамыч деч лӱдын, Египетыш куржыныт.27Иуда кугыжа Иехонийын пленыште кумло шымше ий улмыж годым латкокымшо тылзын коло шымше кечынже Евилмеродах – тиде ийын тудо Вавилонын кугыжажлан шогалын улмаш – Иуда кугыжа Иехонийым казамат гыч луктын.28Тудын дене Вавилон кугыжа порын кутырен да тудым Вавилонышто улшо моло кугыжа деч кӱшкӧ шынден.29Иехоний казаматыште чийыме вургемжым вашталтен. Тидын деч вара тудо эре кугыжан ӱстелтӧрыштӧ кочкын.30Тудлан мо кӱлешым кугыжа деч эре пуэн шогеныт – кажне кечын, пытартыш кечыж марте.
Institute for Bible Translation, Finland