4 Куг24
1Иоакимын кугыжаланымыж годым элыш Навуходоносор, Вавилон кугыжа, керылт пурен. Иоаким тудын кид йымалныже кум ий лийын, а вара ваштарешыже шогалын.2Тунам Господь, Иуда кугыжанышым пытараш манын, Иоаким ӱмбаке халдей, сириян, моав да аммон-влакым колтен. Тыге Господьын шке пророк тарзыж-влак гоч каласыме шомакше шукталтын.3Манассийын сулыкшылан, чыла мом ыштымыжлан Иудам шке чурийже деч кораҥдаш манын, тиде Господьын кумылжо почеш ыштыме лийын.4Манассийын титакдыме вӱрым йоктарымыжым да тудын дене Иерусалимым темымыжым Господь серлаген огыл.5Иоакимын моло пашаже да чыла мом ыштымыже нерген «Иуда кугыжа-влакын курымсерыш книгаштышт» возымо.6Вара Иоаким ача-кочаж-влак деке каен. Олмешыже кугыжалан Иехоний эргыже шогалын.7Вавилон кугыжа Египет кугыжан мландыжым Египет чекысе йогын деч Евфрат эҥер марте руалтен налын. Сандене Египет кугыжа тетла шке элже гыч лектын огыл.8Кугыжалан шогалмыж годым Иехоний латкандаш ияш лийын. Тудо Иерусалимыште кум тылзе кугыжаланен. Аважын лӱмжӧ Нехушта, тудо Иерусалим гыч Элнафанын ӱдыржӧ лийын.9Ачаж семынак тудо Господь ончылно шуко осал пашам ыштен.10Тиде жапыште Иерусалим ӱмбаке Навуходоносорын, Вавилон кугыжан, еҥже-влак толыныт да олам йыр авырен налыныт.11Тыгодым тушко Вавилон кугыжа Навуходоносор толын.12Иуда кугыжа Иехоний шке аваже, тарзыже, тӧраже да евнухшо-влак дене пырля Вавилон кугыжа дек лектын. Кандашымше ий кугыжаланымыж годым Вавилон кугыжа Иехонийым пленыш налын.13Навуходоносор Господьын пӧртшӧ ден кугыжан пӧрт гыч чыла шергакан арверым наҥгаен. Господьын каласымыж семынак, тудо Израиль кугыжа Соломонын Господьын храмжылан ыштыме чыла шӧртньӧ арвержым каткален.14Тудо Иерусалимыште илыше чыла еҥым – тӧра ден тале сарзе-влакым, нунышт лу тӱжем наре лийыныт, тыгак плотник ден апшат-шамычым – наҥгаен. Олаште незер-влак гына кодыныт.15Иехонийым тудо Вавилоныш наҥгаен. Тудо тыгак кугыжан аважым, ватыж ден евнухшо-влакым да элысе чыла лӱмлӧ еҥым Иерусалим гыч Вавилоныш кусарен.16Вавилон кугыжа эше шым тӱжем лӱмлӧ еҥым, тӱжем кидмастар ден апшатым, тыгак сарыш коштшо лӱддымӧ чыла еҥым Вавилоныш наҥгаен.17Иехоний олмеш Вавилон кугыжа Матфанийым, тудын чузайжым, кугыжалан шогалтен да тудлан Седекий лӱмым пуэн.18Кугыжалан шогалмыж годым Седекий коло ик ияш лийын да Иерусалимыште латик ий вуйлатен. Аважын лӱмжӧ Хамуталь, тудо Ливна гыч Иеремийын ӱдыржӧ лийын.19Иоаким семынак Седекий Господь ончылно шуко осал пашам ыштен.20Иерусалим ден Иудалан Господьын шыдыже пеш кугу лийын, сандене Тудо нуным шке чурийже деч кораҥден. Вара Седекий Вавилон кугыжа ваштареш шогалын.
Institute for Bible Translation, Finland