4 Куг21
1Кугыжалан шогалмыж годым Манассий латкок ияш лийын. Тудо Иерусалимыште витле вич ий вуйлатен. Аважын лӱмжӧ Хефциба лийын.2Господьын израиль эрге-влак деч поктен колтымо калык-шамычын йырнык йӱлаштым шуктен, тудо Господь шинча ончылно шуко осал пашам ыштен.3Езекий ачажын кӱкшакалаште шалатыме кумалме вер-влакым Манассий угыч чоҥен, Вааллан жертвенник-шамычым шогалтен да Израиль кугыжа Ахав семын Ашера меҥгым ыштен. Тудо кавасе шӱдыр-влаклан кумалын, нунылан вуйжым савен.4Манассий жертвенник-шамычым Господьын пӧртыштат чоҥен шогалтен, а вет тудын шотышто Господь «Иерусалимыште Мыйын лӱмем илаш тӱҥалеш» манын каласен.5Господьын пӧртшын кок кудывечыштыжат тудо кавасе шӱдыр-влаклан жертвенник-шамычым чоҥен,6шке эргыжым тул гоч колтен. Манассий мужедын, юзыланен, колышын чонжым ӱжын лукшо ден юзо-влакым тарлен. Икманаш, Господь шинча ончылно шуко осал пашам ыштен, Тудын шыдыжым луктын.7Тыгак Ашера меҥгым ыштыктен да Господьын пӧртешыже шогалтен. А Господь тиде пӧрт нерген Давид ден тудын Соломон эргыжлан тыге ойлен: «Тиде пӧртыштӧ да израиль тукым-влакын мландыштышт ойырен налме Иерусалим олаштем Мыйын лӱмем курымеш илаш тӱҥалеш.8Мый тыге ыштем: Моисей тарземын пуымо чыла законжым, Мыйын чыла кӱштымашем тыршен шуктат гын, израильтян-влак ончыкшым ача-кочаштлан пуымо мландем деч ӧрдыжтӧ кусныл кошташ огыт тӱҥал».9Но израильтян-шамыч колыштын огытыл. Манассий нуным чын корно гыч кораҥден, да нуно Господьын израиль эрге-шамычын чурийышт ончыч пытарыме калык-влак деч шукырак осалым ыштеныт.10Тунам Господь шке пророк тарзыж-влак гоч ойлен:11«Манассий, Иуда кугыжа, йырнык пашам тудын деч ончыч лийше аморрей-шамыч деч шукырак ыштен. Шке шояк юмыжо-влак дене тудо Иудам сулыкыш пуртен.12Сандене Израильын Господь Юмыжо тыге ойла: ”Иерусалим ден Иуда ӱмбаке Мый тугай кугу ойгым кондем, могайым колмеке, кажныжын кок пылышыштыжат йоҥгалт кая”.13Иерусалим ӱмбаке Самарийым висыме кандырам да Ахав тукымым висыме воткандырам колтем. Кузе кӱмыжым ӱштыт да кумыктен пыштат, тугак Иерусалим гыч чыла айдемым ӱштыл шуэм.14Шке калыкем кокла гыч утлен кодшо-влакымат Мый коден каем, нуным тушман кидыш пуэм. Чыла тушманышт нуным агаш да толаш тӱҥалыт,15вет Мыйын шинча ончылнем нуно осал пашам ыштеныт, кугезе кочаштын Египет гыч лекме кече гыч таче кече марте Мыйын шыдем луктыныт».16Иудам сулыкыш пуртымо да Господь шинча ончылно осал пашам ыштыктыме деч посна Манассий эше шуко титакдыме вӱрым йоктарен, тудын дене пӱтынь Иерусалимым темен.17Манассийын моло пашаже, чыла мом ыштымыже, могай сулыкыш пурымыж нерген «Иуда кугыжа-шамычын курымсерыш книгаштышт» возымо.18Вара Манассий шке ача-кочаж-влак деке ушнен. Тудым шке полатшын садыштыже, Уззан садвечыштыже, тоеныт. Тудын олмеш кугыжалан Амон эргыже шогалын.19Кугыжалан шогалмыж годым Амон коло кок ияш лийын. Тудо Иерусалимыште кок ий кугыжаланен. Аважын лӱмжӧ Мешуллемеф, тудо Ятба гыч Харуцын ӱдыржӧ лийын.20Манассий ачаж семынак тудо Господь шинча ончылно шуко осал пашам ыштен.21Тудо чыла шотыштат ачажын корныжым тошкен: ачажын кумалме шояк юмыжо-шамычлан кумалын, нунылан вуйжым савен.22Тудо ача-кочаж-влакын Господь Юмыштым коден, Тудын корныж дене коштын огыл.23Амонын тарзыже-шамыч тудын ваштареш заговорым ыштеныт, нуно кугыжам шке полатыштыжак пуштыныт.24Но Амон кугыжа ваштареш заговорым ыштыше-влакым элысе калык пуштын да тудын олмеш кугыжалан Иосий эргыжым шогалтен.25Амонын моло пашаже, чыла мом ыштымыже нерген «Иуда кугыжа-влакын курымсерыш книгаштышт» возымо.26Тудым Уззан садвечыштыже улшо шке шӱгарешыже тоеныт. Тудын олмеш кугыжалан Иосий эргыже шогалын.
Institute for Bible Translation, Finland