4 Куг15
1Израиль кугыжа Иеровоамын коло шымше ий вуйлатымыж годым Иудан кугыжажлан Азарий, Амасий эрге, шогалын.2Кугыжаланаш тӱҥалмыж годым Азарий латкуд ияш лийын, тудо Иерусалимыште витле кок ий вуйлатен. Аважын лӱмжӧ Иехолия, тудо Иерусалим гыч лийын.3Амасий ачаж семынак тудо Господьлан келшыше пашам ыштен.4Лач кӱкшакаласе кумалме вер-шамыч тыгак кодыныт. Калык тушто надырым конден, тӱтыртышым йӱлалтен.5Господь кугыжалан черым колтен, да Азарий колымо кечыж марте проказе дене черле лийын, посна пӧртыштӧ илен. Кугыжан полатыште тудын Иофам эргыже озаланен да элысе калыкым вуйлатен.6Азарийын моло пашаже, чыла мом ыштымыже нерген «Иуда кугыжа-влакын курымсерыш книгаштышт» возымо.7Вара Азарий ача-кочаж-влак деке ушнен, тудым нунын пелен Давид-Олаште тоеныт. Тудын олмеш кугыжалан Иофам эргыже шогалын.8Иуда кугыжа Азарийын кумло кандашымше ий вуйлатымыж годым Самарийыште Израильын кугыжажлан Захарий, Иеровоам эрге, шогалын да куд тылзе кугыжаланен.9Ача-кочаж-влак семынак Захарий Господь шинча ончылно шуко осал пашам ыштен. Израильым сулыкыш пуртышо Иеровоамын, Нават эргын, сулыкшо-влак деч тудо кораҥын огыл.10Захарий ваштареш Шаллум, Иавис эрге, заговорым ыштен: калык шинча ончылно тудын ӱмбак кидшым нӧлталын да пуштын, вара олмешыже кугыжалан шогалын.11Захарийын моло пашаже нерген «Израиль кугыжа-влакын курымсерыш книгаштышт» возымо.12Господь Ииуйлан тыге каласен улмаш: «Тыйын эргыч-влак Израиль престолышто нылымше тукым марте шинчаш тӱҥалыт». Тыгак лийын.13Шаллум, Иавис эрге, Иуда кугыжа Азарийын кумло индешымше ий вуйлатымыж годым кугыжалан шогалын да Самарийыште ик тылзе кугыжаланен.14Фирца гыч Менаим, Гадий эрге, Самарийыш толын, тушто Иавис эрге Шаллум ӱмбаке кидшым нӧлталын да тудым пуштын, вара олмешыже кугыжалан шогалын.15Шаллумын моло пашаже, тудын ыштыме заговоржо нерген «Израиль кугыжа-влакын курымсерыш книгаштышт» возымо.16Типсах олаште илыше-шамыч Менаимлан капкам почын огытыл. Тунам тудо Фирца гыч каен да Типсахым, тушто илыше-влакым да тудын йыр улшо чыла илемым кырен шалатен. Олаште улшо чыла мӱшкыран ӱдырамашын мӱшкырыштым пӱчкын.17Менаим, Гадий эрге, Иуда кугыжа Азарийын кумло индешымше ий вуйлатымыж годым Израильын кугыжажлан шогалын да Самарийыште лу ий кугыжаланен.18Господь шинча ончылно Менаим шуко осал пашам ыштен. Илыме чыла кечылаштыже тудо Израильым сулыкыш пуртышо Иеровоамын, Нават эргын, сулыкшо-влак деч кораҥын огыл.19Тунам [Израиль] мландыш Фул, Ассирий кугыжа, керылт пурен. Фул тудын велне лийже да кугыжа кучемвийжым пеҥгыдемдаш полшыжо манын, Менаим тудлан тӱжем талант шийым пуэн.20Тиде шийым Менаим израильтян-влаклан тӱлыктен. Ассирий кугыжалан пуаш манын, кажне поян еҥ витле сикль шийым кондышаш улмаш. Тидын деч вара Ассирий кугыжа Израиль мландеш кодын огыл, мӧҥгеш шке мландышкыже пӧртылын.21Менаимын моло пашаже да чыла мом ыштымыж нерген «Израиль кугыжа-влакын курымсерыш книгаштышт» возымо.22Вара Менаим шке ача-кочаж-влак деке ушнен. Тудын олмеш кугыжалан Факий эргыже шогалын.23Факий, Менаим эрге, Иуда кугыжа Азарийын витльымше ий вуйлатымыж годым Самарийыште Израильын кугыжажлан шогалын да кок ий кугыжаланен.24Господь шинча ончылно Факий шуко осал пашам ыштен. Тудо Израильым сулыкыш пуртышо Иеровоамын, Нават эргын, сулыкшо-влак деч кораҥын огыл.25Факей, Ремалий эрге, кугыжан лишыл полышкалышыже, Факий ваштареш заговорым ыштен. Тудо Самарийысе кугыжан пӧрткӧргыштӧ кугыжа, Аргов да Арий ӱмбаке кержалтын, нуным пуштын. Тудын дене пырля Галаад гыч витле еҥ лийын. Вара тудо Факий олмеш кугыжалан шогалын.26Факийын моло пашаже да чыла мом ыштымыж нерген «Израиль кугыжа-влакын курымсерыш книгаштышт» возымо.27Факей, Ремалий эрге, Иуда кугыжа Азарийын витле кокымшо ий вуйлатымыж годым Самарийыште Израильын кугыжажлан шогалын да коло ий кугыжаланен.28Господь шинча ончылно Факей шуко осал пашам ыштен. Тудо Израильым сулыкыш пуртышо Иеровоамын, Нават эргын, сулыкшо-влак деч кораҥын огыл.29Израиль кугыжа Факейын вуйлатымыж годым Ассирий кугыжа Феглаффелласар толын да Ийон, Авел-Беф-Мааха, Ианох, Кедес, Гацор ола-влакым, Галаад ден Галилей кундемлам да пӱтынь Неффалим мландым руалтен налын. Тушто илыше-влакым Ассирийыш наҥгаен.30Факей, Ремалий эрге, ваштареш Осий, Эла эрге, заговорым ыштен да тудым пуштын. Озий эрге Иофамын колымшо ий вуйлатымыж годым Осий Факей олмеш кугыжалан шогалын.31Факейын моло пашаже да чыла мом ыштымыж нерген «Израиль кугыжа-влакын курымсерыш книгаштышт» возымо.32Израиль кугыжа Факейын, Ремалий эргын, кокымшо ий вуйлатымыж годым Иудан кугыжажлан Иофам, Озий эрге, шогалын.33Кугыжаланаш тӱҥалмыж годым Иофам коло вич ияш лийын да Иерусалимыште латкуд ий вуйлатен. Аважын лӱмжӧ Иеруша, тудо Садокын ӱдыржӧ лийын.34Озий ачаж семынак тудо Господьлан келшыше пашам ыштен.35Лач кӱкшакаласе кумалме вер-влак тыгак кодыныт. Калык тушто надырым конден, тӱтыртышым йӱлалтен. Иофам Господьын пӧртшын Кӱшыл капкажым чоҥен.36Иофамын моло пашаже да чыла мом ыштымыж нерген «Израиль кугыжа-влакын курымсерыш книгаштышт» возымо.37Тудо жапыште Господь Иуда ӱмбаке Сирий кугыжа Рециным да Факейым, Ремалий эргым, колташ тӱҥалын.38Вара Иофам шке ача-кочаж-влак деке ушнен. Тудым нунын пелен Давид кугезе кочажын олаштыже тоеныт. Тудын олмеш кугыжалан Ахаз эргыже шогалын.
Institute for Bible Translation, Finland