2 Кур.кн7
1Кунам Соломон кумалын пытарен, кава гыч тул волен да йӱлалтен пуымо ден моло надырым нелын, да пӧртым Господьын чапше темен.2Иерей-влак тушко пурен кертын огытыл, вет Господьын пӧртшӧ Тудын чапше дене темын улмаш.3Тул волымым да пӧртым Господьын чапше дене авалтымым ужмеке, израиль эрге-влак чыланат кӱм шарыман мландыш кумык возыныт, вара вуйыштым савеныт да Господьым моктеныт: «Тудо поро, порылыкшо Тудын курымеш!»4Кугыжа ден уло калык Господьлан надырым кондаш тӱҥалыныт.5Соломон кугыжа надырлан коло кок тӱжем шолдыра да шӱдӧ коло тӱжем тыгыде вольыкым конден. Тыге кугыжа ден уло калык Юмын пӧртым святитленыт.6Иерей-влак шке пашаштым ыштеныт, левит-шамыч Господьын семӱзгарже-влакым шоктеныт – нуным Давид кугыжа Господьым чапландараш ыштен улмаш. Нунын семышт почеш Давидат шке жапыштыже «Тудын порылыкшо курымеш!» манын, Господьым моктен. Левит-влак ваштареш шогышо иерей-шамыч пучым пуалтеныт, туштак чыла израильтян-влак шогеныт.7Соломон Господьын пӧртшӧ ончылно улшо кудывечын покшел ужашыжым святитлен. Тушто тудо йӱлалтен пуымо надырым да татулык надыр коям конден. Вет Соломонын ыштыме той жертвенникше йӱлалтен пуымо надырым, кинде надырым да татулык надырын кояжым кондашлан изи лийын.8Тунам Соломон пӱтынь Израиль дене пырля шым кечаш пайремым ыштен. Тушко Емафыш пурымо вер деч Египет чекысе эҥер марте илыше калык погынен, нуно пеш шукын лийыныт.9Кандашымше кечын пайремым мучашлыше погынымаш лийын, вет жертвенникым святитлымаш шым кече шуйнен, вара эше шым кече пайремленыт.10Шымше тылзын коло кумшо кечынже кугыжа еҥ-влакым мӧҥгышкышт колтен. Господьын Давид ден Соломонлан, шке Израиль калыкшылан ыштыме чыла поро пашажлан куаныше шӱм-чон дене нуно мӧҥгышкышт каеныт.11Тыге Соломон Господьын пӧртшӧ ден кугыжан пӧртым чоҥымо пашам пытарен. Мом тудо Господьын пӧртыштӧ да шкенжын пӧртыштӧ ышташ шонен пыштен, чыла сайын шуктен.12Йӱдым Соломонлан Господь кончен да тудлан каласен: «Мый Тыйын кумалметым колынам да Шкаланем тиде верым надыр кондымо пӧрт семын ойыренам.13Кунам Мый кавам петырем да йӱр ок лий, але шурнышырчыклан мланде ӱмбалысе чыла кушкылым кочкаш кӱштем, але шке калыкем ӱмбак осал черым колтем,14да кунам Мыйын лӱмем нумалше калыкем ӱҥышемеш, кумалаш да Мыйын чурием кычалаш тӱҥалеш, шке осал корныж гыч кораҥеш – Мый тидым кава гыч колам, нунын сулыкыштым кудалтем да мландыштым паремдем.15Тунам Мыйын шинчаончалтышем тиде верыште кумалмаш дек виктарыме, пылышем тӱткын колыштшо лиеш.16Тиде пӧртыштӧ Мыйын лӱмем курым-курымеш лийже манын, Мый тудым ойырен налынам да святитленам. Мыйын шинчам ден шӱмем эре тушко савырыме лийыт.17Тый Мыйын ончылнем Давид ачат семынак илаш, чылажымат кӱштымем семын ышташ, Мыйын пунчал ден устав-влакем шуктен шогаш тӱҥалат гын,18Давид ачатлан сӧрымем семынак, Мый тыйын кугыжа престолетым пеҥгыдемдем. Ачатлан Мый каласенам: ”Тыйын тукымет гыч еҥ Израильым эре вуйлаташ тӱҥалеш”.19Но те кораҥыда да Мыйын кӱштымаш ден пунчал-влакем кодеда, вес юмо-влаклан служитлаш да кумалаш тӱҥалыда гын,20Мый тыланда пуымо мландем гыч тендам пытарем да шке лӱмемлан святитлыме тиде храмым шке чурием ончыч кораҥдем, чыла моло калыклан тудым воштылтыш ден койдарчыкым ыштем.21Тунам тиде чапланыше храм воктеч эртен кайыше кажне еҥ ӧрын колта да каласа: ”Молан Господь тиде мланде да тиде храм дене тыге ыштен?”22Тудлан вашештат: ”Нуно Египет мланде гыч лукшо ача-кочаштын Господь Юмыштым коденыт да вес юмо-влак почеш каеныт, нунылан кумалыныт да служитленыт. Теве молан Господь нунын ӱмбак чыла тиде азапым конден”».
Institute for Bible Translation, Finland