2 Кур.кн6
1Тунам Соломон каласен: «Господь ойлен: ”Мый тӱп пычкемышыште илаш тӱҥалам”.2Тыланет, [Святой,] мый кугу полатым нӧлтенам, Тый тушто курым-курымеш илаш тӱҥалат!»3Уло Израиль калык Соломон ончылно шоген. Кугыжа калык деке савырнен да нуным суапландарен4каласен: «Израильын Господь Юмыжо моктымо лийже! Мом Тудо мыйын Давид ачамлан сӧрен, тидым таче шке кидше дене шуктен. Господь тыге ойлен:5”Шке калыкем Египет гыч лукмем деч вара, шке лӱмемлан пӧртым чоҥаш манын, Мый израиль тукым-влакын мландыштышт ик оламат ойырен омыл, тыгак шке израиль калыкемын вуйлатышыжлан нигӧм шогалтен омыл.6Но Иерусалим Мыйын лӱмемлан илыме вер лийже манын, кызыт тиде олам ойыренам да шке Израиль калыкем вуйлаташ Давидым ойырен налынам”.7Мыйын Давид ачамын шӱмыштыжӧ Израиль Господь Юмын лӱмжылан храмым чоҥаш шонымаш лийын.8Но Господь тудлан каласен: ”Мыйын лӱмемлан храмым чоҥаш манын, шӱмыштет шонымаш уло. Тиде шонымашет пеш сай.9Но Мыйын лӱмемлан храмым тый огыл, а тый дечет шочшо эргыч чоҥа”.10Господь каласыме мутшым шуктен. Тудын ойлымыж семынак, Давид ачамым мый алмаштенам да Израиль престолыш шинчынам. Израиль Господь Юмын лӱмжылан храмым чоҥенам,11тушан шондыкым вераҥденам. Тушто израиль эрге-влак дене ыштыме Господьын ойпидышыже аралалтеш».12Погынышо израильтян-влак ончылно Соломон, Господьын жертвенникше ончыко шогалын, кидшым нӧлталын.13Тудо вич кынергут кужытан, вич кынергут лопкытан да кум кынергут кӱкшытан той кӱварым ыштен да кудывече покшеке шогалтен улмаш. Соломон саде кӱварыш шогалын, погынышо израильтян-влак ончылно сукен шинчын, кидшым кава деке нӧлталын14да каласен: «Израильын Господь Юмыжо! Тый гает Юмо каваштат, мландыштат уке. Тыйын ончылнет ару шӱм-чон дене коштшо тарзет-влак дене Тый ойпидышетым шуктен шогет, нунылан шке порылыкетым ончыктет.15Тый шке тарзетлан, мыйын Давид ачамлан, мо сӧрыметым шуктенат. Мом Тый шке умшат дене ойленат, таче тидым шке кидет дене ыштенат.16Господь, Израильын Юмыжо! Шке Давид тарзетлан, мыйын ачамлан, вес сӧрыметымат кызыт шукто. Тый тудлан каласенат: ”Эргыч-влак чын корно дене коштыт да тыйын семынак законем шуктен шогат гын, тыйын тукымет гыч лекше еҥ Мыйын ончылнем Израильын престолыштыжо эре шинчаш тӱҥалеш”.17Израильын Господь Юмыжо, тек Давид тарзетлан каласыме шомакет шукталтеш!18Чынжымак, еҥ-шамыч дене пырля Юмо мландымбалне илаш тӱҥалеш мо? Кава, эн кӱшыл кава-влак Тыйым шыҥдарен огыт керт. Тугеже мыйын чоҥымо тиде храм нерген мом ойлыман?19Но шке тарзетын кумалмыжым, тудын йодмыжым кол, Господь Юмем! Кол кумалмым да сӧрвален йодмым – нуным тарзет Тыйын ончыкет конда!20Тек Тыйын шинчаончалтышет тиде храм ӱмбаке йӱдшӧ-кечыже виктарыме лиеш, вет Тый тиде верыште Мыйын лӱмем лиеш манын сӧренат. Кунам тыйын тарзет, тиде вер деке савырнен, кумалаш тӱҥалеш, кол тудын сӧрвалымыжым.21Кол шке тарзетын да Израиль калыкетын йодмыштым, кунам нуно, тиде вер деке савырнен, кумалаш тӱҥалыт. Кол нуным пылпомыш гыч, шке илыме верет гыч – кол да серлаге!22Кунам иктаж-кӧ лишылъеҥже ваштареш сулыкыш пура, да тудын деч титакдыме улмыж шотышто товатмутым пуаш йодыт, а тудыжо товатлаш тиде храмысе жертвенник ончыко толеш –23кол пылпомыш гыч да шке тарзет-влак коклам тӧрлӧ. Титакан еҥлан пӧртылтӧ, тудын мом ыштымыжым шке вуйжо ӱмбак савыре, а чын ыштыше еҥым чыныш лук, тудлан чынлыкше почеш пӧртылтӧ.24Кунам тушман Израиль калыкетым Тыйын ончылно сулыкыш пурымыжлан кырен шалата, но нуно Тый декет савырнат, Тыйын лӱметлан чапым пуат да тиде храмыште Тыйым сӧрвален йодаш тӱҥалыт –25кол пылпомыш гыч да Израиль калыкетын сулыкшым кудалте, нуным ача-кочаштлан пуымо мландышкет пӧртылтӧ.26Кунам Тыйын ончылно сулыкыш пурымыштлан кӧра кава петырна да йӱр ок лий, да кунам нуно тиде вер деке савырнен кумалыт, Тыйын лӱметым чапландарат да шке сулыкышт деч кораҥыт, вет Тый нуным ӱҥышемденат –27кол пылпомыш гыч да шке тарзет-влакын, шке Израиль калыкетын, сулыкыштым кудалте. Нунылан кайышаш сай корным ончыкто, шке калыкетлан кучен илаш пуымо мландышке йӱрым колто.28Элым шужымаш але шучко чер авалта, когартыше мардеж але шемуржа, шурнышырчык але шукш-влак пытарат, але кучен илыме мландыштышт нуным тушман-влак шыгыремдылаш тӱҥалыт – икманаш, кеч-могай ойго але чер лиеш гын, –29да тыйын калыкет шке орлык ден ойгыштыжо тиде храм велыш кидшым шуялта – тунам ик айдемын але уло Израиль калыкетын кеч-могай кумалмыжым, кеч-могай йодмыжым30пылпомыш гыч, шке илыме верет гыч, кол да титакыштым кудалте. Шӱмыштӧ мо улмым пален, кажныжлан тудын пашаж почеш пӧртылтӧ. Вет айдемын шӱмыштыжӧ мо улмым Тый гына палет.31Тек нуно ача-кочаланна пуымо мландыштет ӱмырышт мучко Тый дечет лӱдын илат, Тыйын корнет дене коштыт.32Тыгак тыйын Израиль калыкет кокла гыч огыл улшо йот еҥ Тыйын кӱдыратле лӱмет ден нӧлталме виян кидетлан кӧра тора мланде гыч толеш да тиде храм ончылно кумалеш гын,33кол пылпомыш гыч, шке илыме верет гыч, да тудын чыла йодмыжым шукто. Тек мландымбалне улшо калык-влак Тыйын лӱметым пален налыт, тек нуно Израиль калыкет семынак Тый дечет лӱдын илат да тиде храмым Тыйын лӱметлан чоҥымем палат.34Кунам Тыйын калыкет тушман ваштареш Тыйын ончыктымо корнет дене кредалаш лектеш да, Тыйын ойырен налме олат ден Тыйын лӱметлан мыйын чоҥымо храм велыш савырнен, Тыланет кумалаш тӱҥалеш –35кумалме ден йодмыштым пылпомыш гыч кол да нуным арален нал.36Кунам нуно Тыйын ончылнет сулыкыш пурат – вет сулыкым ыштыдыме айдеме уке, – да Тый нунылан шыдешкет, нуным тушман кидыш пуэт, да нуным пленыш налыт, тора але лишыл мландыш наҥгаят,37да кунам пленыште улмо мландыште нунын ушышт пура, тушто Тый декет савырнат да ”ме сулыкыш пуренна, ме осалым ыштенна, титакан улына” манын кумалыт,38кунам нуно пленыш наҥгайыме мландыште Тый декет уло шӱм-чонышт дене савырнат да, шке мландышт велыш, кудым Тый ача-кочаштлан пуэнат, Тыйын ойырен налме олат, Тыйын лӱметлан мыйын чоҥымо храм велыш савырнен, Тыланет кумалыт –39пылпомыш гыч, шке илыме верет гыч, кумалме ден йодмыштым кол да нуным арален нал. Калыкет Тыйын ончылно могай сулыкыш пурен, тиде языкшым кудалте.40Юмем, тек тиде вер гыч кумалмаш дек Тыйын шинчаончалтышет виктарыме, пылышет тӱткын колыштшо лиеш!41А кызыт, Господь Юмем, тол шке илыме верышкет – Тый да Тыйын куатетын шондыкшо. Тек иерей-влакет, Господь Юмем, утарымаш дене вӱдылалтыт, ӱшанле еҥет-влак Тыйын порылыкетлан куанат!42Господь Юмем, шке шӱрен палемдыметым Шке дечет ит кораҥде, Давид тарзетлан ончыктымо порылыкетым ит мондо!»
Institute for Bible Translation, Finland